1. Bushe Paulo alemona shani abalebombesha mu mulimo wa kwa Yehova?

UMUTUMWA Paulo aleibukisha bonse abalebombesha mu kushimikila imbila nsuma. Alembele ukuti: “Lyonse twibukisha umulimo mubomba pa mulandu wa citetekelo cenu ne fyo mubombesha pa mulandu wa kutemwa kwenu e lyo ne fyo mushipikisha pa mulandu wa kusubila Shikulwifwe Yesu Kristu pa ntanshi ya kwa Lesa wesu kabili Shifwe.” (1 Tes. 1:3) Yehova na o alebukisha bonse abamubombela ne cishinka te mulandu balebombesha nangu balebomba fye panono.—Heb. 6:10.

2. Finshi twalasambilila muli cino cipande?

² Bamunyinefwe abengi mu nshiku sha ku numa e lyo na muno nshiku bali-ipeleshe ukubombela Yehova mu mulimo wa nshita yonse. Natulande pa fyo bamo babombele mu nshita ya batumwa. Twalalanda na pa milimo iyalekanalekana iyo ababa mu mulimo wa nshita yonse pali ino nshita babomba na pa fyo twingalabafwa.

3, 4. (a) Bushe bamunyinefwe bamo balebomba shani mu nshita ya batumwa? (b) Balesanga shani ifyo balekabila?

³ Pa numa fye ya kubatishiwa, Yesu atendeke umulimo uwali no kubombwa mu calo conse. (Luka 3:21-23; 4:14, 15, 43) Ilyo afwile, abatumwa bakwe balitwalilile ukushimikila. (Imil. 5:42; 6:7) Abena Kristu bamo pamo nga Filipi, bali bamishonari mu Palestine.  (Imil. 8:5, 40; 21:8) Paulo na bamishonari bambi baleya mu kubombela ku fifulo ifyabelele ukutali sana. (Imil. 13:2-4; 14:26; 2 Kor. 1:19) Bamo pamo nga Silbani (Sila), Marko, na Luka balebombako no mulimo wa bukalemba. (1 Pet. 5:12) Abena Kristu abanakashi nabo balebombela pamo na aba bamunyinefwe. (Imil. 18:26; Rom. 16:1, 2) Ifyalembwa pa fyo aba bamishonari baleshimikila fyalenga tuleumfwa bwino nga tulebelenga Amalembo ya Bwina Kristu aya ciGriki kabili bushininkisho bwa kuti Yehova alebukisha ababomfi bakwe.

⁴ Bushe Abena Kristu ba kubalilapo abalebomba umulimo wa nshita yonse balebafwa shani mu fyo balekabila? Limo limo, balebapeelako ifya kulya, kabili balebafwa na mu fintu fimbi ku Bena Kristu banabo, lelo tabalelomba ukuti balebafwa. (1 Kor. 9:11-15) Bamunyinefwe ne filonganino baleitemenwa ukubafwilisha. (Belengeni Imilimo 16:14, 15; Abena Filipi 4:15-18.) Paulo na bo alebomba nabo mu mulimo wa bumishonari limo limo balebombako incito pa kuti balekwata ifyo balekabila.

5. Finshi abaupana bamo ababa mu mulimo wa nshita yonse balandile pa mulimo babomba?

⁵ Na muno nshiku mwine, kwaliba abengi sana ababombesha mu milimo yalekanalekana mu mulimo wa nshita yonse. (Moneni akabokoshi akaleti “ Imilimo Yalekanalekana Iyaba mu Mulimo wa Nshita Yonse.”) Bushe bomfwa shani pa fyo basalapo ukulabomba mu mulimo wa nshita yonse? Ici e cipusho mufwile ukubepusha, kabili ifyo bakamweba fikamwafwa icine cine. Ku ca kumwenako: Munyinefwe umo uwabombelepo bupainiya bwa nshita yonse, bupainiya bwaibela, bumishonari, kabili uwabombelepo na pa Bethel mu calo cimbi atile: “Imona ukuti ukuba mu mulimo wa nshita yonse e cintu icacindama sana ico nasalilepo ukucita. Ilyo nali ne myaka 18, naliculile sana pa kuti nsalepo nampo kuya ku yuniversiti, ukuba mu mulimo wa nshita yonse, nelyo ukuba painiya. Ifyacitika fyalinsambilisha ukuti Yehova talaba nga ca kuti umo asalapo ukubomba mu mulimo wa nshita yonse. Uyu mulimo walingafwa ukubomfya bwino ukulamuka kwandi nelyo amaka yandi ukucila ifyo nali no kufibomfya nsalapo ukubomba incito ya ku mubili.” Umwina mwakwe alandile ukuti: “Umulimo onse uo nabomba mu cilonganino ca kwa Lesa ulangafwa ukulunduluka lwa ku mupashi. Yehova alatucingilila no kututungulula lyonse, aya mapaalo nga tatwayakwata atukanaipeelesha ukubombela Lesa mu mulimo wa nshita yonse. Cila bushiku ndatasha Yehova pa fyo tumubombela.” Bushe na imwe kuti mwalanda nge fi aba balandile?

6. Bushe Yehova omfwa shani pa fyo tumubombela?

⁶ Kwena bamunyinefwe bamo te kuti babombe mu mulimo wa nshita yonse pali ino nshita. Na lyo line, twalishiba ukuti Yehova alatasha nga nshi pa fyo bamubombela no mweo onse. Tontonkanyeni pali bonse abo Paulo alumbwile pali Filemone 1-3, ukubikako fye na bali mu cilonganino ca mu Kolose. (Belengeni.) Paulo aletasha sana pa milimo iyo balebomba na Yehova wine aletasha. Na imwe bene, Wifwe ya ku muulu alamutasha pa mulimo mubomba. Nomba kuti mwayafwa shani ababa mu mulimo wa nshita yonse?

7, 8. Bushe bapainiya babomba shani, kabili bambi mu cilonganino kuti babafwa shani?

⁷ Nga filya fine cali ku Abena Kristu ba kubalilapo, lipaalo ukukwata bapainiya abacincila mu filonganino. Bapainiya abengi balaipeelesha ukushimikila ama-awala 70 cila mweshi. Kuti mwabafwa shani?

⁸ Nkashi umo painiya uwe shina lya Shari atile: “Bapainiya bamoneka abakosa sana  pantu balashimikila cila bushiku. Na lyo line, balakabila ukubakoselesha. (Rom. 1:11, 12) Nkashi na umbi uwabombeleko bupainiya pa myaka iingi alandile pali bapainiya abali mu cilonganino umo aali ukuti: “Balabombesha nga nshi. Kanshi nga mwabasendako muli motoka pa kuya mu kushimikila, nelyo mwabetako ku ca kulya nangu mwabapeelako indalama isho bengashitamo fimo, balatasha nga nshi. Balamona ukuti, kanshi mwalibabikako amano.”

9, 10. Finshi bamo bacita pa kwafwa bapainiya mu cilonganino baba?

⁹ Inshila na imbi umo twingafwila bapainiya, kulabomba nabo mu kushimikila. Painiya uwe shina lya Bobbi atile: “Mu kati ka mulungu tulafwaya sana abakubomba nabo.” Painiya na umbi mu cilonganino cimo cine atile: “Tulafilwa ukusanga aba kubomba nabo mu cungulo kasuba.” Nkashi umo uwalebomba bupainiya nomba uubomba pa Bethel ya ku Brooklyn alandile pa fyo alebomba ati: “Nkanshi umo uwakwete motoka anjebele ukuti, ‘Ilyo ushikwete uwa kubomba nankwe ulenjeba, twakulaya bonse.’ Uyu nkashi alingafwile sana muli bupainiya.” Kabili nkashi uwe shina lya Shari atile: “Ilingi line, bapainiya abashimbe nga bainuka mu kushimikila balatalalilwa. Limo limo, kuti muleitako bamunyinefwe na bankashi abashimbe ku mapepo ya lupwa. Nga mulebetako na pa tushita tumbi ilyo mulecita fimo kuti batwalilila ukuba abakosa mu kubombela Lesa.”

¹⁰ Nkashi umo uwaba mu mulimo wa nshita yonse pa myaka nalimo 50 aibukishe ifyo alebomba na bankashi bambi abashimbe, atile: “Baeluda aba mu cilonganino twali baletandalila bapainiya lyonse pa numa ya myeshi ibili. Baletwipusha ifyo tuli ne fyo twalebomba na kabili baleipusha na pa fyaletusakamika. Balitubikileko sana mano. Baletutandalila pa ng’anda apo twaleikala pa kuti beshibe fyo twalekabila.” Ifyo aba baeluda balecita e fyo na Onesifore uwali mu Efese aleyafwa Paulo mu fyo alekabila.—2 Tim. 1:18.

11. Bushe bapainiya baibela babomba shani?

¹¹ Ifilonganino fimo fyalipaalwa pantu mwaliba bapiniya baibela. Aba bamunyinefwe na bankashi abengi balabomba ama-awala 130 mu kushimikila cila mweshi. Pa mulandu wa kuti bapoosa inshita iikalamba mu kushimikila na ku milimo imbi iya mu cilonganino,  bakwata fye inshita iinono iya kubomba imilimo imbi e lyo limo tabakwata na iyi inshita. Cila mweshi, iofeshi lya musambo lilabapeelako indalama ishinono pa kuti balebika sana amano ku mulimo wa kushimikila.

12. Bushe baeluda na bambi mu cilonganino kuti bayafwa shani bapainiya baibela?

¹² Bushe kuti twayafwa shani bapainiya baibela? Eluda umo uwaba pa Bethel kabili uulanshanya na bapaiya baibela abengi atile: “Baeluda balingile ukulalanshanya na bapaiya baibela pa kuti baleishiba ifyo balebomba e lyo bengeshiba ifyo bengalabafwa. Aba ababwananyina bamo bamona kwati bapainiya baibela balakwata fyonse ifyo balekabila pantu balabapeela indalama cila mweshi, lelo aba mu cilonganino kuti bayafwa aba bamuyinefwe mu nshila ishingi.” Bapainiya baibela pamo na ba nshita yonse balatemwa nga mulebomba nabo mu mulimo. Ala kuti cawama nga mulebomba nabo!

13, 14. (a) Finshi tufwile ukulaibukisha pali bakangalila ba muputule? (b) Finshi mwingacita pa kwafwa ababa mu mulimo wa kwenda?

¹³ Ilingi line tumona bakangalila ba muputule e lyo na bena mwabo ukuti balikosa sana mu fya kwa Lesa. Kwena cishinka ukuti balikosa, lelo nabo bene balafwaya ukubakoselesha, ukubomba nabo mu mulimo, e lyo no kuba nabo nga mwakwata akashita kasuma akakutuusha. Limo kuti balwala ica kuti babateeka na mu cipatala, e lyo limbi kuti balelwalila pa ng’anda. Pali iyi nshita, kuti batemwa sana nga tulebapempula no kubafwa mu fyo balekabila. E fyo Luka “kondapa uwatemwikwa” uwalembele ibuuku lya Imilimo, ayafwile Paulo na bo alebomba nabo mu mulimo wa kwenda.—Kol. 4:14; Imil. 20:5–21:18.

¹⁴ Bakangalila abenda e lyo na benamwabo balakabila ifibusa. Kangalila wa muputule umo atile: “Caba kwati ifibusa fyandi baleshiba nga kuli ifilensakamika. Balanjipusha ifipusho ifisuma ifilenga nabalondolwela ifilensakamika. Filya bakutika nga ndelondolola filalenga naumfwako bwino.” Bakangalila ba muputule e lyo na benamwabo balatasha nga nshi nga tulebabikako amano.

15, 16. Milimo nshi ababombela pa Bethel na pa Fikuulwa fya Kulonganinapo Ukulongana Ukukalamba babomba, kabili kuti twabafwa shani?

¹⁵ Mu fyalo fyonse, ababombela pa Bethel e lyo na pa Fikuulwa fya Kulonganinapo Ukulongana Ukukalamba babomba umulimo wa Bufumu uwacindama nga nshi. Nga ca kuti mu cilonganino cenu nelyo mu muputule umo mwaba mwaliba ababombela pa Bethel, kuti mwabebukisha shani?

¹⁶ Ilingi line, ilyo munyinefwe nelyo nkanshi aya mu kubombela pa Bethel, nalimo kuti alafuuluka sana balupwa ne fibusa. Kanshi nga bakwata ifibusa pa Bethel na mu cilonganino balatemwa nga nshi! (Marko 10:29, 30) Cila mulungu, balakwatako inshita ya kuya mu kulongana e lyo no kuya mu kushimikila. Lelo limo limo, balakwata imilimo na imbi pa Bethel. Ababa mu cilonganino nga baishiba ifyo aba bamunyinefwe babombesha no kulabatasha pa mulimo babomba, cilawama sana kabili bonse tulanonkelamo.—Belengeni 1 Abena Tesalonika 2:9.

17, 18. Milimo nshi imo ababombela umulimo wa nshita yonse mu fyalo fimbi babomba?

¹⁷ Abafuma ku fyalo fyabo no kuyabombela ku fyalo fimbi balakwata amafya ayalekanalekana. Basanga ifya kulya, indimi, intambi, ne fintu fimbi ifyo bashabelesha. Mulandu nshi basuminina ukufuma ku fyalo fyabo no kuya ku fyalo fimbi?

¹⁸ Pali aba bamunyinefwe, paba na bamishonari abapoosa inshita iikalamba mu  mulimo wa kushimikila. Balashimikila kabili balasambilisha bwino sana ica kuti na baba mu filonganino balasambililako ifingi ku fyo bakanshiwa. Iofeshi lya musambo lilabapekanishisha umwa kwikala e lyo lilabapeelako ne ndalama ishinono ishibafwa mu fyo balekabila. Bambi babombela pa Bethel e lyo bambi babomba umulimo wa kukuula amaofeshi ya musambo, amaofeshi ya bakapilibula mu fifulo umo balanda sana indimi bapilibula, Ifikuulwa fya Kulonganinamo Ukulongana Ukukalamba na Amayanda ya Bufumu. Aba bamunyinefwe balabapekanishisha ifya kulya, umwa kwikala, ne fintu fimbi ififwaikwa. Nabo bene balakwata inshita ya kuya ku kulongana no kushimikila nga filya fine caba ku babombela pa Bethel, kanshi balatwafwa mu nshila ishingi.

19. Cinshi tufwile ukulaibukisha pa babombela mu fyalo fimbi?

¹⁹ Kuti mwaibukisha shani aba babomfi ababomba umulimo waibela? Muleibukisha ukuti pa kubalilapo fye kuti cabakosela ukubelesha ifya kulya ifyo bashalyapo. Kanshi nga mulebeta ku ca kulya muleibukisha ukuti ifya kulya fimo kuti cabakosela ukulya; e ico kuti cawama nga mwabepusha ifya kulya ifyo bengatemwa ukulya nelyo ukusonda. Mulebatekanishisha ilyo balesambilila ululimi mulanda ne ntambi shenu. Nalimo kuti papita inshita pa kuti batampe ukulaumfwa fyonse ifyo mulelanda, lelo muleba ne cikuuku ilyo mulebafwa ukwishiba ifya kushimbula amashiwi. Ico bafwaya, kusambilila!

20. Bushe kuti twaibukisha shani ababomba umulimo wa nshita yonse na bafyashi babo?

²⁰ Ababomba umulimo wa nshita yonse balaya balekula, na bafyashi babo nabo balakota. Abafyashi babo nga ni ba Nte, ukwabula no kutwishika kuti batemwa sana ukuti abana babo batwalilila mu mulimo wa nshita yonse. (3 Yoh. 4) Kwena ababa mu mulimo wa nshita yonse bakesha apapelele amaka yabo ukusakamana abafyashi babo no kubafwa mu fyo balekabila. Na lyo line, abashaba mu mulimo wa nshita yonse bafwile ukulayafwa ababa mu mulimo wa nshita yonse ukulasakamana abafyashi abakoloci. Muleibukisha ukuti ababa mu mulimo wa nshita yonse balabomba imilimo iyacindamisha. (Mat. 28:19, 20) Bushe imwe pa lwenu nelyo icilonganino kuti mwayafwako abafyashi abakoloci abakwata abana ababa mu mulimo wa nshita yonse?

21. Bushe ababa mu mulimo wa nshita yonse bomfwa shani pa fyo babafwa na pa fyo bambi babakoselesha?

²¹ Icilenga bamunyinefwe ukutendeka umulimo wa nshita yonse, kufwaya ukubombela Yehova na bantu bambi, te kufwaya indalama. Ala balatasha nga nshi pali fyonse ifyo mucita pa kubafwa. Nkashi uubombela ku calo cimbi atile: “Na kalata fye iya kutasha pa milimo iyo ubomba ilalenga waumfwa ukuti bambi balikubikako amano no kuti balitemwa imilimo iyo ubomba.”

22. Bushe mumona shani umulimo wa nshita yonse?

²² Ala lipaalo nga nshi ukubombela Yehova mu mulimo wa nshita yonse. Uyu mulimo usuma icine cine kabili ulenga tuleba ne nsansa. Ulalenga twaipekanishisha libela ku mulimo uusuma sana uo ababomfi ba kwa Yehova aba cishinka bakalabomba ku ntanshi ilyo Ubufumu bwa kwa Lesa bukalateka isonde. E ico ifwe bonse ‘natuleibukisha umulimo babomba pa mulandu wa citetekelo cabo ne fyo babombesha pa mulandu wa kutemwa kwabo.’—1 Tes. 1:3.