BA GUY HOLLIS PIERCE, abaali mwi Bumba Litungulula ilya Nte sha kwa Yehova, bapwishishe umulimo wabo pano isonde pali Cibili pa 18 March, mu 2014. Baali ne myaka 79, ilyo isubilo lyabo lyafikilishiwe ilya kuyaba pamo na Kristu uo bakateka nankwe.—Heb. 2:10-12; 1 Pet. 3:18.

Ba Guy Pierce bafyalilwe mu Auburn, mu California, ku United States. Bafyelwe pa 6 November mu 1934, kabili babatishiwe mu 1955. Baupile ba Penny abo batemenwe sana mu 1977, kabili balikwete no lupwa. Apo baali bafyashi, baali sana ne cikuuku. Bonse babili batendeke bupainiya mu 1982, kabili mu 1986, ba Guy Pierce balitendeke ukubomba mu muputule umo babombele pa myaka 11 mulya mwine mu United States.

Mu 1997 ba Guy Pierce na bena mwabo batendeke ukubombela pa Bethel ya ku United States. Ba Pierce balebombela ku Dipatimenti ya Mulimo kabili mu 1998 balibasontele ukuba kafwa mu Komiti Isakamana Ababomba pa Bethel iya mwi Bumba Litungulula. Pa 2 October mu 1999, ilyo kwali ukukumana kwa pa mwaka ukwaba Watch Tower Bible and Tract Society of Pennsylvania e lyo babilishe ukuti ba Pierce na basontwa ukuba mwi Bumba Litungulula. Ilyo bashilafwa babombele mu makomiti pamo nga Komiti Isakamana Ababomba pa Bethel, Komiti ya Kulemba, Komiti ya Kusabankanya na Komiti ya Bakampanya.

Abantu abengi balitemenwe sana ba Guy Pierce pa mulandu ne cifyalilwa cabo icisuma, baleumfwana sana na bantu kabili baleseka nabo. Lelo icalengele sana ukuti abantu babatemwe, ni co nabo balitemenwe abantu, baali abaiceefya, balicindike sana amafunde na mashiwi ya kwa Lesa ayatutungulula, kabili baali ne citetekelo icakosa sana muli Yehova. Tabaletwishika nangu fye panono ukuti amalayo ya kwa Yehova yakafikilishiwa kabili ifi fine e fyo balefwaya ukuti abantu mu calo conse beshibe.

Ba Pierce balebombesha mu mulimo wa kwa Yehova, balebuka lucelo celo kabili ilingi line balebomba mpaka ubushiku sana. Baleya mu fyalo ifyalekanalekana mu kukoselesha aba bwananyina kabili balekwata inshita iya kulanshanya na ba mu lupwa lwa Bethel ukubikako fye na balebeta ukuti besheko nabo, kabili balelanshanya na bonse abalefwaya ukuti babapandeko amano, no kubafwako muli fimo. Nangu pakapite imyaka iingi, aba ababwananyina bakalaibukisha bukapekape bwabo, ifyo baali bwino ne fyo babakoseleshe ukubomfya Baibolo.

Ba Pierce na bena mwabo bakwete abana 6, na beshikulu e lyo ne fishikulula. Balikwete na bana abengi mu cilonganino ca kwa Yehova. Pa Cibelushi pa 22 March, 2014 e lyo kwali ilyashi lya cisansamushi pa Bethel ya ku Brooklyn kabili abalandile ilyashi ni ba Mark Sanderson abo baali nabo mwi Bumba Litungulula. Muli ili lyashi, balandile na pe subilo lya ku muulu ilyo munyinefwe Pierce akwete kabili babelengele amashiwi ya kwa Yesu aya kuti: “Mu ng’anda ya kwa Tata mwaba apa kwikala apengi. . . . Nga naya no kumupekanishisha apa kwikala, nkesa na kabili, no kumupokelela ku mwandi, ukuti uko nkaba e ko na imwe mukabe. Kabili uko ine ndeya, namwishiba inshila.”—Yoh. 14:2-4.

Kwena tukalamufuluka munyinefwe Pierce, lelo tulesekelela pantu ‘alishibe inshila’ ya kubwikalo bwakwe ubwa muyayaya.