1. Mulandu nshi bucibusa bwesu na Yehova bulingile ukubeela ubwakosa?

BUSHE muli Nte ya kwa Yehova iyaipeela kabili iya batishiwa? Nga muli ba Nte, ninshi mwalikwata icintu icacindama sana, bucibusa bwenu na Lesa. Lelo calyafya ukutwalilila ukuba ifibusa fya kwa Lesa pa mulandu wa kuba mu calo ca kwa Satana na pa kukanaba abapwililika. Abena Kristu bonse balakwata ubu bwafya. Kanshi bucibusa bwesu na Lesa bufwile ukuba ubwakosa sana.

2. (a) Bushe ifibusa fya cine cine fyaba shani? (Moneni futunoti.) (b) Kuti twakosha shani bucibusa bwesu na Yehova?

² Bushe bucibusa bwenu na Yehova bwaba shani? Bushe kuti mwafwaya ukuti bukoseleko? Baibolo pali Yakobo 4:8 yalilanda ifyo mwingacita, yatila: “Palameni kuli Lesa, na o akapalama kuli imwe.” Ili lembo lilanda pa fintu fibili ificitika pa kukwata ubu bucibusa. * Nga twatendeka ukucita ifingatupalamika kuli Lesa, na o alatendeka ukupalama kuli ifwe. Nga twatwalilila  ukucita ifiletupalamika kuli ena, bucibusa bwesu na Yehova bulakoselako. Ne ci cikalenga bucibusa bwesu ukuba ubwa cine cine. Tukatendeka ukulamona Lesa nga filya Yesu alemumona. Yesu atile: “Uwantumine wa cine, kabili . . . Ine nalimwishiba.” (Yoh. 7:28, 29) Finshi ifyo mufwile ukucita pa kuti mupalame kuli Yehova?

3. Finshi ifingalenga ukuti tulelanshanya na Yehova?

³ Ukulanshanya lyonse na Yehova kwalicindama pa kuti mulepalama kuli ena. Finshi mufwile ukucita pa kuti mulelanshanya na Lesa? Finshi mwingacita pa kuti mulelanshanya na cibusa wenu uwikala ukutali? Nalimo kuti mulelembeshanya amakalata e lyo nalimo kuti mulelanshanya pa foni. Kuti mwalalanda na Yehova lyonse ilyo mulepepa kuli ena. (Belengeni Amalumbo 142:2.) Kabili Yehova kuti alanda na imwe nga mulebelenga Baibolo no kutontonkanya pa fyo mulebelenga. (Belengeni Esaya 30:20, 21.) Nomba natulande pa fyo uku kulanshanya na Yehova kwingakosha bucibusa bwesu nankwe, pa kuti bucibusa bwesu bube ubwa cine cine.

4, 5. Bushe Yehova alanda shani na imwe ukubomfya Icebo cakwe? Landeni pa ca kumwenako.

⁴ Ukwabula ukutwishika mwalishiba ukuti mu Baibolo mwaliba amashiwi ayo Lesa alembela abantu bonse. Lelo bushe Baibolo yalilanda na pa fyo mufwile ukucita pa kuti mupalame kuli Yehova? Ee, yalilanda. Ilanda shani? Ilyo muleisambilisha Baibolo, muletontonkanya pa fyo ilanda na pa fyo mwingabomfya ifyo mulesambilila mu mikalile yenu; nga mulecita ifi ninshi mulesuminisha Yehova ukulanda na imwe ukupitila mu Cebo cakwe. Ici cikalenga mukabe ifibusa sana na Yehova.—Heb. 4:12; Yako. 1:23-25.

⁵ Ku ca kumwenako, belengeni no kutontonkanya pa mashiwi ayo Yesu alandile aya kuti, “mwilalonganikila ifyuma pano isonde.” Nga ca kuti mulamona ukuti mwalibika amano ku fya Bufumu, ninshi ukwabula ukutwishika Yehova alamutasha. Lelo nga mwamona ukuti mufwile ukuleka ukucita fimo pa kuti mulebika amano ku fya Bufumu, ninshi Yehova namwafwa pa fyo mufwile ukucita pa kuti mupalame kuli ena.—Mat. 6:19, 20.

6, 7. (a) Bushe ukusambilila Baibolo kuti kwakuma shani ifyo twatemwa Yehova ne fyo atutemwa? (b) Buyo nshi tulingile ukukwata ilyo tuleisambilisha Baibolo?

⁶ Nga tulebelenga Amalembo no  kutontonkanyapo kuti catwafwa ukwaluka no kulunduluka mu fya kwa Lesa. Kulalenga tuletasha sana inshila shisuma isho Yehova acitilamo ifintu, no kulenga tulemutemenwako. Kabili nga twatemenwako Lesa, na ifwe alatutemwa sana, ici cilakosha bucibusa bwesu na ena.—Belengeni 1 Abena Korinti 8:3.

⁷ Nga tulefwaya ukupalama kuli Yehova, calicindama ukukwata ubuyo ilyo tuleisambilisha Amalembo. Baibolo pali Yohane 17:3 itila: “Nomba pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.” Kanshi, ilyo tuleisambilisha Amalembo te kufwaya fye ukwishiba ifyo yalanda lelo ‘kwishiba’ bwino sana Yehova.—Belengeni Ukufuma 33:13; Amalu. 25:4.

8. (a) Cinshi ico twingatontonkanya nga twabelenga pa fyo Yehova acitile ku Mfumu Asaria ifyalembwa pali 2 Ishamfumu 15:1-5? (b) Bushe ukwishiba Yehova bwino kuti kwatwafwa shani ukuleka ukumutwishika?

⁸ Nga twaishiba bwino sana Yehova, tukaleka ukulasakamikwa sana nangu ca kuti twabelenga pali fimo ifyo acitile lelo twafilwa ukumfwikisha icalengele ukuti acite ifyo. Ku ca kumwenako, kuti mwacita shani nga mwamona ifyo Yehova acitile ku Mfumu Asaria iya baYuda? (2 Isha. 15:1-5) Nangu ca kuti “abantu bali bacili balepeela amalambo pa fifulo fya kupepelapo no kufutumwinapo icushi ca malambo,” Asaria ena “alecita ifyalungama mu menso ya kwa Yehova.” Lelo, “Yehova apumine imfumu ku bulwele, kabili yali ne fibashi mpaka no bushiku yafwile.” Mulandu nshi? Ili lyashi talyalanda icalengele. Bushe tufwile ukusakamikwa pa kukanaishiba umulandu Yehova akandiile Imfumu Asaria? Te kuti tusakamikwe nga ca kuti twalishiba bwino sana inshila Yehova acitilamo ifintu. Tufwile ukwishiba no kuti Yehova lyonse alatusalapula “ukusalapula ukwalinga.” (Yer. 30:11) Uku kwishiba kulenga twashininkisha ukuti nangu tatwishibe icalengele ukuti Yehova acite filya kuli Asaria, kuti twacetekela ukuti ubupingushi bwakwe bwali ubwalungama.

9. Cinshi calengele ukuti Yehova apume Asaria ne fibashi?

⁹ Lelo kwalibako Amalembo na yambi ayalanda pali ili lyashi. Imfumu Asaria baleyita no kuti Imfumu Usia. (2 Isha. 15:7, 32) Na kabili pali 2 Imilandu 26:3-5, 16-21, tusambililapo ukuti nangu ca kuti Usia inshita imo alecita ifyalungama mu menso ya kwa Yehova, mu kulekelesha ‘umutima wakwe walituumikwe mpaka ailetelela.’ Apo aali ne cilumba, alefwaya ukuti abombe umulimo uwo bapeele fye bashimapepo. Bashimapepo 81 baile kuli ena no kwesha ukumulungika. Bushe cinshi Usia acitile? Alangile ukuti ali ne cilumba sana pantu “alifuliilwe” bashimapepo. E mulandu wine Yehova amupumine ne fibashi!

10. Mulandu nshi tushifwile lyonse ukulaenekela Yehova ukutweba umulandu acitila fimo, kabili kuti twakosha shani ukucetekela kwesu mu nshila acitilamo ifintu?

¹⁰ Lekeni tumfwikishe icishinka. Nga ca kuti ifyebo ifingatwafwa ukumfwikisha ilyashi limo tafyalembelwe mu Cebo ca kwa Lesa nga filya caba ku malyashi yambi ayaba mu Baibolo, bushe kuti mwacita shani? Bushe kuti mwalatwishika ukuti Lesa alilungama? Nelyo bushe kuti mwatontonkanya ukuti muli Baibolo mwaliba ifyebo ifitwafwa ukucetekela ukuti Yehova lyonse alacita icalungama, no kuti e utweba icalungama ne calubana? (Amala. 32:4) Ilyo twaishiba bwino Yehova, tulatemwa no kutasha sana inshila acitilamo ifintu ica kuti te kuti tulefwaya no kwishiba fyonse ifilenga acite ifintu fimo. Nga mulesambilila no  kutontonkanya pa fyo Lesa atweba mu Cebo cakwe, ukutasha kwenu kukaya kulekulilako. (Amalu. 77:12, 13) Ici cikalenga bucibusa bwenu na Yehova ukukoselako kabili bukaba ubwa cine cine.

11-13. Mwaishiba shani ukuti Yehova alakutika ku mapepo? (Moneni icikope icili pa ntendekelo ya cino cipande.)

¹¹ Tulapalama kuli Yehova ukupitila mwi pepo. Tulamulumbanya, tulamutasha, kabili tulalomba ukuti atutungulule. (Amalu. 32:8) Lelo nga ca kuti mulefwaya ukuba ifibusa fya cine cine ifya kwa Yehova, mufwile ukucetekela ukuti alomfwa amapepo.

¹² Abantu bamo basumina ukuti mwi pepo tamwaba ubunonshi ubuli bonse. Batila icilenga abantu ukulanda ukuti ipepo lyabo nalyasukwa, ni co nabalanda ifyaciba ku mukoshi, baishiba no bwafya bakwete, kabili babika na mano ku fya kupwisha ubo bwafya. Inga imwe, finshi filenga mwishibe ukuti Yehova alomfwa amapepo yenu ayafuma pa nshi ya mutima?

¹³ Tontonkanyeni pali ici: Ilyo Yesu ashilaisa pano isonde, alimwene uko Yehova aleyasuka amapepo ya babomfi bakwe abantunse. Kabili ilyo Yesu ali pano isonde alepepa pa kweba Wishi wa ku muulu ifyo aleumfwa. Nga ca kuti Yesu alishibe ukuti Yehova talekutika ku mapepo, bushe nga alepepa no bushiku bonse? (Luka 6:12; 22:40-46) Bushe nga alisambilishe na basambi bakwe ifya kupepa eshiba ukuti ipepo talyafwa nangu panono? Ukwabula no kutwishika, Yesu alishibe ukuti ipepo e nshila ya cine cine iya kulandilamo na Yehova. Pa nshita imo atile: “Tata, ndemutootela ukuti mwang’umfwa. Ca cine, nalishiba ukuti lyonse mulang’umfwa.” Na ifwe tufwile ukucetekela ukuti Yehova ‘alomfwa ipepo’ nga twapepa.—Yohane 11:41, 42; Amalu. 65:2.

14, 15. (a) Bushe ukulumbula ifyo tulefwaya mu mapepo yesu kuti kwatwafwa shani? (b) Bushe ukupepa kwayafwile shani nkashi umo ukukosha bucibusa bwakwe na Yehova?

¹⁴ Nga mulepepa mu kulungatika, mukalaishiba bwino ifyo Yehova akalayasuka amapepo yenu, nangu ca kuti inshila ayasukilamo nalimo te kuti muiluke bwangu.  Amapepo nga yayasukwa yalalenga mwacetekela sana Yehova. Na kabili, nga mule-eba Yehova fyonse ifili ku mukoshi, ninshi akapalama sana kuli imwe.

¹⁵ Natulande pali ba Kathy. * Nangu ca kuti baleshimikila lyonse, tabatemenwe ukushimikila imbila nsuma. Balandile ukuti: “Nshatemenwe umulimo wa kushimikila, nangu panono. Ilyo nalekele incito, eluda umo ankoseleshe ukutila kuti nabomba bupainiya bwa nshita yonse; kabili alimpeele na formu ya bupainiya. Napingwilepo ukubomba bupainiya, lelo nalitendeke ukupepa cila bushiku kuli Yehova ukuti angafwe ukutemwa umulimo wa kushimikila imbila nsuma.” Bushe Yehova alyaswike amapepo yabo? Ba Kathy batile: “Uno mwaka e walenga butatu muli bupainiya. Apo ndashimikila inshita iikalamba no kusambilila kuli bankashi bambi, calingafwa ukwishiba bwino ifya kushimikila imbila nsuma. Pali ino nshita nalitemwa sana umulimo wa kushimikila. Ne cacindamisha ca kuti nalipalama sana kuli Yehova ukucila ifyo nali kale.” Kanshi, amapepo ya ba Kathy yalibafwile ukukwata bucibusa bwa cine cine na Yehova.

16, 17. (a) Finshi ifyo tulingile ukulacita pa kuti bucibusa bwesu na Yehova bulekoselako? (b) Cinshi tukasambilila mu cipande cikonkelepo?

¹⁶ Tufwile ukutwalilila ukulakosha bucibusa bwesu na Yehova. Tufwile ukulacitapo fimo ifingatupalamika kuli Yehova pa kuti na o apalame kuli ifwe. Natutwalilile ukulalanshanya lyonse na Lesa ukupitila mwi sambililo lya Baibolo e lyo ne pepo. Ici cikalenga bucibusa bwesu na Yehova ukulakoselako pa kuti tukalecimfya amatunko.

¹⁷ Limo te mulandu na mapepo twingapepa, amafya yesu kuti yatwalilila. Ici kuti calenga icicetekelo cesu muli Yehova ukucepa. Kuti twatendeka ukutwishika nga ca kuti Yehova alomfwa amapepo yesu, nelyo nga alatumona ukuti tuli fibusa fyakwe. Kuti twacita shani ilyo twaba na mafya ya musango uyu pa kuti tulange ukuti bucibusa bwesu na Lesa bwa cine cine? Ifi e fyo tukalandapo mu cipande cikonkelepo.