1-3. Finshi fyalengele ukuti Paulo acetekele sana Yehova? (Moneni icikope icili pa muulu.)

ABENA KRISTU abaleikala mu Roma baali mu bwafya sana. Balibapatile ica kuti balibapeele umulandu wa koca umusumba wa Roma mu 64 C.E., kabili balibapeele no mulandu wa kupata abantu. Na imwe nga ca kuti e ko mwali pali ilya nshita, nalimo nga balimwikete no kumucusha sana. Bamunyinenwe bamo nalimo nga balibepeye ku finama nelyo ukubapopela pa fimuti no kuboca abatuntulu.

² Nalimo ni pali iyi yine inshita epo umutumwa Paulo bamuposele mu cifungo mu Roma pa muku wa cibili. Bushe Abena Kristu bambi balile ku kumwafwa? Paulo afwile aali ne fyamusakamike, pantu alembeele Timote ati: “Ilyo nalelubulula umuku wa kubalilapo tapali uwali kuli ine, lelo bonse balinshile, bekapeelelwapo umulandu pali ici.” Nangu ca kuti takwali Abena Kristu bambi abakumwafwa ilyo ali mu cifungo alishibe ukuti kwali uwalemwafwa. Alembele ati: “Lelo Shikulu aiminine kuli ine no kumpeela amaka.” Ca cine Shikulu Yesu apeele Paulo amaka ayo alekabila. Bushe ayo amaka bamupeele yamwafwile  shani? Paulo atile: “Kabili balimpokolwele ku kanwa ka nkalamo.”—2 Tim. 4:16, 17. *

³ Ilyo umutumwa Paulo aibukishe ifyo apitilemo, fyalimukoseshe ica kuti fya mwafwile ukucetekela ukuti Yehova aali no kumwafwa ukushipikisha amesho alepitamo nayo aali no kupitamo ku ntanshi. Nakuba atwalilile ukulanda ati: “Shikulu akampokolola ku mulimo onse uubi.” (2 Tim. 4:18) Ukwabula ukutwishika, Paulo alisambilile ukuti ukwafwa uko Yehova no Mwana wakwe bapeela kwalicindama sana ukucila ukwa bantunse!

4, 5. (a) Bushe nani uutwafwa lyonse? (b) Cinshi mufwile ukucita pa kuti bucibusa bwenu na Yehova bulekoselako?

⁴ Bushe inshita shimo ilyo mulepita mu mafya mumona kwati nabamulekelesha? Nalimo amafya yamo ayo mwingakwata kuti yaba kukanakwata incito, amafya ya pa sukulu, ukulwalilila, nelyo amafya yambi. Nalimo ilyo mwalepita muli aya mafya mwalyebeleko bamo ukuti bamwafwilisheko, lelo tamwatemenwe pantu bamwafwileko fye panono. Kwena, amafya yamo ayo tukwata abantu te kuti bayapwishe. Nga abantu bafilwa ukupwisha amafya tukwata, bushe tufwile ukukonka ifyo Baibolo itweba ukuti tufwile ‘ukutetekela Yehova’? (Amapi. 3:5, 6) Bushe uku kufunda kwa fye? Awe iyo! Lesa alatwafwa icine cine, nge fyo amalyashi ayengi aya mu Baibolo yalanga.

⁵ E ico ukucila ukulaenda ne cikonko ku mukoshi ilyo abantu bafilwa ukupwisha amafya ayo mukwata, mufwile ukulapashanya umutumwa Paulo uwacetekele sana muli Yehova ilyo ali na mafya kabili Yehova akamwafwa. Nga mwacita ifi, icitetekelo cenu muli Yehova cikakoselako kabili bucibusa bwenu nankwe bukaba ubwa cine cine.

6. Mulandu nshi nalimo cingafisha ukucetekela Yehova maka maka ilyo tuli na mafya?

⁶ Bushe nga muli no bwafya ubukalamba, kuti mwaleka ukusakamana nga mwaeba Yehova mwi pepo no kucitapo fimo ukulingana na maka yenu kabili mwacetekela no kuti alamwafwa? Ee, kuti mwaleka ukusakamana! (Belengeni Amalumbo 62:8; 1 Petro 5:7.) Ukucita ifi kwalicindama nga mulefwaya ukuba na bucibusa na Yehova. Lelo kuti cayafya ukucetekela ukuti Yehova akamupeela ifyo mufwaya. Mulandu nshi? Icishinka cimo ca kuti, te lyonse Yehova asuka amapepo ilyo line fye mwapepa.—Amalu. 13:1, 2; 74:10; 89:46; 90:13; Haba. 1:2.

7. Mulandu nshi uwo Yehova limo ashasukila amapepo yesu ilyo line fye?

⁷ Mulandu nshi uwo Yehova limo ashasukila amapepo lilya line fye twapepa? Muleibukisha ukuti Yehova apashanya bucibusa twakwata nankwe kuli bucibusa buba pa mwana na wishi. (Amalu. 103:13) Umwana tenekela ukuti abafyashi balamupeela fyonse ifyo alomba nelyo ukumupeela ilyo line fye alomba. Abana limo balomba fye icilombe lombe. Fimo ifyo abana balomba, abafyashi te kuti babapeele ilyo line fye. Fimbi ifyo abana balomba tabafitemwa sana nelyo bambi te kuti bafitemwe. Na kabili, abafyashi nga balepeela umwana conse ico alomba, kuti caba kwati umwana e ulebatungulula. Yehova na o apo alishiba bwino ifingatuwamina, nalimo te kuti atupeele ilyo line fye ifyo twamulomba. Apo ni Kabumba wesu, Shikulwifwe uwatutemwa, kabili Shifwe wa ku muulu, alikwata  amaka ya kucitila ifi. Nga ca kuti Yehova aletupeela fyonse ifyo twalomba, ilyo line fye twalomba, bucibusa bwesu nankwe te kuti bube ubwa cine cine.—Linganyeniko Esaya 29:16; 45:9.

8. Apo te kuti tushipikishe amafya yonse, cinshi ico Yehova atulaya?

⁸ Cimbi icingalenga ukuti Yehova eyasuka amapepo yesu ilyo line fye ca kuti alitwishiba bwino. (Amalu. 103:14) E ico tenekela ukuti kuti twashipikisha amafya ku maka yesu fye fwe bene lelo alatwafwa nga filya umufyashi afwa umwana wakwe. Kwena, inshita shimo tulomfwa kwati te kuti tutwalilile ukushipikisha. Lelo Yehova alitweba ukuti te kuti asuminishe ababomfi bakwe ukucula ukucila pa fyo bengashipikisha. E ico, nga mwaba na mafya “akafwaya na pa kuti mufuminemo.” (Belengeni 1 Abena Korinti 10:13.) Kanshi, te kuti tutwishike ukuti Yehova aleshiba bwino amafya ayo twingashipikisha.

9. Cinshi ico tufwile ukucita nga twamona ukuti Yehova tatwafwile ilyo line fye twapepa?

⁹ Nga ca kuti Yehova tatwafwile ilyo line fye twapepa, tufwile ukulolela pali ena pantu e waishiba ilyo engatwafwa. Muleibukisha ukuti na o alalolela, pantu lyonse alafwaisha ukutwafwa. Baibolo itila: “Yehova akatwalilila ukulolela ukumupaala, kabili akema pa kuti amubelele uluse. Pantu Yehova ni Lesa wa mulinganya. Ba nsansa bonse abamulolela.”—Esa. 30:18.

10-12. (a) Mafya nshi ayo Umwina Kristu uulesunga lupwa wakwe uwalwala ubulwele ubushipola engakwata? (b) Bushe ukucetekela Yehova ilyo muli na mafya kuti kwakuma shani bucibusa bwenu na ena? Landeni pa cacitike.

¹⁰ Nga muli na mafya ayakalamba kuti mwaumfwa nga filya Paulo aumfwile, kuti caba kwati muli mu “kanwa ka nkalamo” nelyo muli mupepi na “kanwa ka nkalamo.” Pali utu tushita kuti cayafya sana ukucetekela Yehova, lelo e cintu icacindama ico mufwile ukucita. Ku ca kumwenako, tutile muletensha lupwa wenu uwalwala ubulwele ubushipola. Nalimo mulapepa na kuli Lesa ukuti amupeele amano na maka. * Nga ca kuti mwacita fyonse ifyo mufwile ukucita, ukwabula no kutwishika tamwakatwalilile ukusakamana sana pantu mukeshiba ukuti Yehova naishiba bwino ubwafya mukwete kabili ali no kumwafwa ukushipikisha!—Amalu. 32:8.

¹¹ Inshita shimo kuti cayafya ukushipikisha amafya. Nalimo badokota kuti bamweba ifyapusanapusana. Nelyo balupwa abo mwacetekele ukutila kuti bamusansamusha nalimo kuti balenga ubwafya mukwete ukukulilako. Mufwile ukutwalilila ukulomba Yehova ukuti alemukosha. Mufwile ukutwalilila ukupalama kuli ena. (Belengeni 1 Samwele 30:3, 6.) Ilyo ubwafya bukapwa, bucibusa bwenu na Yehova bukakoselako.

¹² Ba Linda * baishileishiba ukuti ifi twalandapo pa muulu fya cine pa numa ya kutensha abafyashi babo pa myaka iingi ukufikila ilyo abafyashi babo bafwile. Ba Linda batile, “Ilyo twaletensha abafyashi, ine, abena mwandi na ndume yandi ilingi line tatwaleishiba ifya kucita. Inshita shimo tatwalekwata na maka ya kucita icili conse. Lelo nga twatontonkanya pa nshita ilyo twali na mafya, cilatwafwa ukumona bwino bwino ifyo Yehova atwafwile. Alitukoseshe no kutupeela ifyo twalekabila, na lintu fye twalemona ukuti tapali ifyo twingacita.”

13. Bushe ukucetekela muli Yehova kwayafwile shani nkashi umo uwakwete amafya ayalekanalekana?

¹³ Ukutetekela Yehova no mutima wesu onse kuti kwatwafwa ilyo tuli na mafya. Pa  nshita ilyo abalume ba ba Rhonda abashali ba Nte, balembeshe ukuti icupo cipwe, bandume ba ba Rhonda babasangile no bulwele ubwitwa lupus, ubulwele ubwipaya. Papitile fye imyeshi inono abakashi ba ba ndume yabo balifwile. Ilyo aya mafya yapwile, ba Rhonda batendeke bupainiya bwa nshita yonse. Pa numa, banyinabo balifwile. Cinshi cayafwile ba Rhonda ukushipikisha? Balandile ukuti: “Nalepepa kuli Yehova cila bushiku, nalemweba ne fintu ifyo nalepingulapo ukucita ifyalemoneka ifinono. Ici calengele ukuti ncetekele sana Yehova. Nasambilile ukulashintilila pali ena ukucila ukushintilila pa mano yandi nelyo pa ya bantu bambi. Kabili alingafwile icine cine, alensakamana muli fyonse ifyo nalekabila. Ici calengele ukuti ndebombela pamo na Yehova.”

14. Cinshi ico Umwina Kristu uwa cishinka uwo lupwa wakwe atamfiwa mu cilonganino engacetekela?

¹⁴ Natulande na pa bwafya bumbi. Elenganyeni ifyo cingaba nga ca kuti lupwa wenu atamfiwa mu cilonganino. Mwalisambilila ifyo Baibolo yalanda pa fyo mufwile ukucita ku muntu uwatamfwiwa mu cilonganino. (1 Kor. 5:11; 2 Yoh. 10) Kwena limo cilafya sana ukukonka ifyo Baibolo yalanda pa fyo tufwile ukucita ku muntu uwatamfwiwa. * Bushe kuti mwacetekela ukuti Shinwe wa ku muulu kuti amukosha pa kuti mukonke ifyo Baibolo yalanda pa fya kucita ku watamfwiwa? Bushe kuti mwamona iyi nshita ukuti e lyo mufwile ukukosha bucibusa bwenu na Yehova no kupalama kuli ena?

15. Mulandu nshi uwo Adamu ashaumfwilile ifunde lya kwa Yehova mu Edeni?

 ¹⁵ Tontonkanyeni pa muntu wa kubalilapo Adamu. Bushe alemona ukuti kuti akaana ukumfwila Yehova no kutwalilila ukuba no mweo? Iyo, pantu Amalembo yatweba ukuti Adamu “tabamubepele iyo.” (1 Tim. 2:14) Nomba, cinshi calengele akaane ukufwila Lesa? Adamu alitemwishishe umukashi wakwe, e calengele ukuti alye icisabo ico Efa amupeele. Aufwilile ishiwi lya mukashi wakwe ukucila ukumfwila Lesa wakwe, Yehova.—Ukute. 3:6, 17.

16. Ni nani uwo tulingile ukutemwa sana, kabili mulandu nshi?

¹⁶ Bushe ici cilolele mu kuti tatufwile ukutemwa sana balupwa lwesu? Awe iyo! Lelo uwo tufwile ukutemwa sana ni Yehova. (Belengeni Mateo 22:37, 38.) Na kuba nga twatemwa sana Yehova, balupwa lwesu nampo nga balabombela Yehova nelyo iyo kuti banonkelamo. Kanshi twalilileni ukutemwa sana Yehova no kumucetekela. Kabili nga ca kuti namusakamikwa sana pa filecita lupwa wenu uwatamfiwa, ebeni Yehova mwi pepo fyonse ifili ku mutima. * (Rom. 12:12; Fil. 4:6, 7) Nga muli no bwafya bwa musango yu, e lintu mufwile ukucetekela sana Yehova. Ici cikalenga mukashintilile pali Yehova ukuti nalimo ku ntanshi kuti ifintu fyaba bwino.

17. Kuti twalanga shani ukuti twalicetekela Yehova nga tulebombesha mu mulimo wa kubila imbila nsuma?

¹⁷ Mulandu nshi Paulo ‘bamupokolwelele ku kanwa ka nkalamo?’ Alandile ati: “Ukuti mbile nga nshi imbila nsuma na bena fyalo bonse bomfwe.” (2 Tim. 4:17) Nga filya fine Paulo aali, na ifwe nga twaba abacincila mu kubila imbila nsuma, tulacetekela ukuti Yehova ‘akatupeela’ fyonse ifyo tukabila. (Mat. 6:33) Fwe babila imbila nsuma iya Bufumu, ‘twaliseekeshiwa imbila nsuma,’ kabili Yehova atumona ukuti “tubombela pamo” nankwe. (1 Tes. 2:4; 1 Kor. 3:9) Nga tulebombesha mu mulimo wa kwa Lesa, cikatwangukila ukulolela ukuti Yehova alatwafwa.

18. Finshi tufwile ukulacita pa kuti tulecetekela sana Yehova no kukosha bucibusa bwesu nankwe?

¹⁸ Kanshi, ino e nshita ya kuti tulekosha bucibusa bwesu na Lesa. Nga kwaba ifyatusakamika, e nshita ya kupalama sana kuli Yehova. E ico, nga tuleisambilisha lyonse Icebo ca kwa Lesa, tuli no mute wa kupepa, kabili tuli abacincila mu milimo ya kwa Lesa, tufwile ukucetekela ukuti Yehova akatwalilila ukutwafwa mu mafya ayo tulepitamo e lyo nayakesa ku ntanshi.