1, 2. Bushe Yehova aatusambilisha shani ukumutemwa?

INSHILA iisuma umufyashi asambilishishamo abana bakwe, kulacita ifyo afwaya abana bakwe balecita. Umufyashi nga alanga abana ukuti alibatemwa, ninshi alebasambilisha ukuti nabo bamutemwe. Takwaba umuntu nangu umo uwatutemwa ukucila ifyo Shifwe Yehova atutemwa. Kanshi na ifwe kuti twamutemwa “pantu Lesa e wabalilepo ukututemwa.”—1 Yohane 4:19.

² Bushe Yehova atulanga shani ukuti “e wabalilepo ukututemwa”? Baibolo itila: “Ilyo twali tucili ababembu, Kristu alitufwilile.” (Abena Roma 5:8) Shifwe Yehova uwaba no kutemwa atumine Umwana wakwe ku kuba icilubula pa kuti atulubule ku lubembu ne mfwa. Ubu ubupe ubukalamba nga nshi e bwalenga ukuti tupalame kuli Yehova no kumulanga ukuti twalimutemwa. Ifi Lesa atupeele Umwana wakwe pa mulandu wa kututemwa, alitulanga ifyo na ifwe tufwile ukumutemwa. Alitusambilisha ukuti tatufwile ukuba bakaitemwe, lelo tufwile ukuba bakapekape.—1 Yohane 4:10.

3, 4. Kuti twalanga shani ukuti twalitemwa Lesa?

 ³ Ukutemwa e mibele ya kwa Yehova iyapulamo. E mulandu wine Yesu alandiile ukuti ifunde ilyacindama sana lya kuti: “Muletemwa Yehova Lesa wenu no mutima wenu onse, no mweo wenu onse, no kutontonkanya kwenu konse, na maka yenu yonse.” (Marko 12:30) Yehova afwaya ukuti tumutemwe ‘no mutima wesu onse.’ Yehova te kuti omfwe bwino nga ca kuti twatemwa umuntu umbi nelyo ifintu fimbi ukucila ifyo twamutemwa. Tatufwile ukupelela fye pa kumfwa ukuti twalitemwa Yehova, lelo tufwile ukumutemwa no ‘kutontonkanya kwesu konse’ e lyo na ‘maka yesu yonse.’ Ici cilolele mu kuti ifyo tutontonkanyapo e lyo ne fyo tucita fifwile ukulanga ukuti twalimutemwa.—Belengeni Mika 6:8.

⁴ Kanshi tulingile ukutemwa Yehova no mweo wesu onse e lyo na maka yesu yonse. Nga twabika Yehova intanshi mu bumi bwesu, ninshi tulemulanga ukuti twalimutemwa icine cine. Mu cipande cafumineko, twasambilile pa nshila shine isho Yehova alangilamo ukuti alitemwa abana bakwe. Nomba twalalanda pa fyo twingacita pa kuti tuletemenwako Yehova e lyo ne fyo twingamulanga ukuti twalimutemwa.

5. Nga twatontonkanya pali fyonse ifyo Yehova atucitila, finshi tufwile ukucita?

⁵ Nga ca kuti bamupeela ubupe, mufwile mulalanga uumupeele ukuti namutasha sana pali ubo bupe. Kabili mulabomfya bwino ica bupe bamupeela pantu ninshi namucitemwa. Yakobo alembele ukuti: “Ica bupe conse icisuma no bupe bonse ubwapwililika fifuma ku muulu, pantu Lesa e mwine wa fya mu muulu ifisanika ulubuuto, kabili taluka-aluka nge cinshingwa.” (Yakobo 1:17) Tulatasha sana Yehova pa fintu fyonse ifyo atupeela ifilenga tuleikala bwino no kuba ne nsansa. Tulamona ifyo atutemwa, kabili na ifwe tulafwaya ukumulanga ukuti twalimutemwa. Bushe na imwe mulafwaya ukulanga Yehova ukuti mwalimutemwa?

6. Finshi abena Israele balingile ukucita nga balefwaya ukuti Yehova atwalilile ukubapaala?

⁶ Yehova alepeela abena Israele ifintu ifisuma ifingi nga nshi. Pa myaka iingi, alibapeele amafunde ayalebatungulula kabili alebapeela fyonse ifyo balekabila. (Amalango 4:7, 8) Abena Israele balelanga ukuti baletasha pa fyo Yehova alebacitila nga baleumfwila amafunde abapeele. Ku ca kumwenako, ilyo balepeela amalambo kuli Yehova, balingile ukumupeela “ifisabo ifisuma ifyabalilapo ukupya.” (Ukufuma 23:19) Abena Israele balishibe ukuti Yehova ali no kutwalilila ukubapaala nga ca kuti balemumfwila muli fyonse.—Belengeni Amalango 8:7-11.

7. Kuti twabomfya shani ‘ifyuma fyesu’ ku kulanga Yehova ukuti twalimutemwa?

⁷ Na ifwe bene kuti twalanga Yehova ukuti twalimutemwa nga tulemupeela ‘ifyuma fyesu.’ (Amapinda 3:9) Nga tulebomfya ifyo twakwata ku kumucindika ninshi tulemupeela ifyuma fyesu. Ku ca kumwenako, kuti tulesangula indalama ku kutungilila umulimo wa Bufumu pa cilonganino cesu e lyo na mwi sonde fye lyonse. Nampo nga twalikwata ifyuma ifingi nelyo iyo, bonse fye kuti twabomfya ifyo twakwata ku kulanga Yehova ukuti twalimutemwa. (2 Abena Korinti 8:12) Lelo kwaliba na fimbi ifyo twingacita  pa kuti tulelanga Yehova ukuti twalimutemwa.

8, 9. Ni nshila nshi imbi iyo twingalangilamo ukuti twalitemwa Yehova? Cinshi ba Mike no lupwa lwabo bacitile?

⁸ Yesu atufundile ukuti tufwile intanshi ukufwaya Ubufumu no kuti tatufwile ukusakamikwa pa fya kulya ne fya kufwala. Shifwe alitulaya ukuti akulatupeela fyonse ifyo tukabila. (Mateo 6:31-33) Twalicetekela Yehova kabili twalishiba ukuti akatupeela fyonse ifyo tukabila. Na kuba nga ca kuti mwalitemwa umuntu ninshi no kumucetekela mwalimucetekela. E ico nga twacetekela sana Yehova, e lyo tukalamulanga na sana ukuti twalimutemwa. (Amalumbo 143:8) Kanshi kuti twayipusha atuti: ‘Bushe ifyo mpaanga ukucita e lyo ne fyo momfya inshita na maka yandi filalanga ukuti cine cine nalitemwa Yehova? Bushe nalicetekela ukuti lyonse fye Yehova akalampeela ifyo nkabila?’

⁹ Ba Mike no lupwa lwabo balicetekele Yehova. Ilyo ba Mike bali abaice, balefwaisha ukuya mu kubila imbila nsuma ku calo cimbi. Na lintu baupile bakwata na bana babili, tabalekele ukufwaya ukuya mu kubombela ku calo cimbi. Ilyo ba Mike no lupwa lwabo babelengele pali ba munyinefwe na bankashi abaile mu kubombela ukwali ukukabila ukukalamba, bapingwilepo ukwangusha imikalile. Balishitishe ing’anda yabo no kukuukila mu ng’anda iinono. Na kabili apo ba Mike balikwete akampani ka kuwamya mu fikuulwa, bapingwilepo ukucefyako akampani. Ici calengele ba Mike no lupwa lwabo ukukuukila ku calo cimbi, kabili balaipakisha sana ukubomba umulimo wa kushimikila. Ba Mike batile: “Twalishininkisha ukuti amashiwi Yesu alandile ayalembwa pali Mateo 6:33 ya cine.”

10. Busuma nshi bwaba mu kulatontonkanya sana pa fyo twasambilila pali Yehova nga filya Imfumu Davidi yalecita?

¹⁰ Imfumu Davidi yalembele ukuti: “Imyulu ilebila ubukata bwa kwa Lesa; no lwelele lulesosa umulimo wa minwe yakwe.” Kabili yatile: “Amafunde ya kwa Yehova yalifikapo, yalapuupuutula umuntu. Ifyo Yehova atwibukishako fyalicetekelwa, filenga uwapelwa mano ukuba na mano.” Ilyo Davidi atontonkenye sana pa mafunde ayasuma ayo Yehova apeela, na pa busuma bwa fyo abumba, alipaleme sana kuli Yehova kabili alefwaisha no kulanga ukuti alimutemenwe sana. Davidi atile: “Lekeni amashiwi ya mu kanwa kandi ne fyo umutima wandi utontonkanyapo fimusekeshe, mwe Yehova, Icilibwe candi icasansuka kabili Umulubushi wandi.”—Amalumbo 19:1, 7, 14.

11. Bushe kuti twabomfya shani ifyo Yehova atusambilisha ku kulanga ukuti twalimutemwa? (Moneni icikope pa ntendekelo ya cino cipande.)

¹¹ Muno nshiku Yehova alatusambilisha ifingi pa fyo aba, pa bufwayo bwakwe, pa fyo abumba, na pa Cebo cakwe. Abantu muno calo babakoselesha ukusambilila sana, nomba ukuya ku masambililo ya pa  muulu ilingi line kulenga bafilwa ukutwalilila ukutemwa Lesa. Yehova ena te fyo aba, tafwaya fye ukuti twishibe ifintu lelo alatwafwa no kuba aba mano. Afwaya tulebomfya ifyo tusambilila e lyo no kulasambilishako bambi. (Amapinda 4:5-7) Ku ca kumwenako, Yehova afwaya tuleyafwa abantu “ukwishiba bwino bwino icine” pa kuti bakapusuke. (1 Timote 2:4) Tulanga ukuti twalitemwa Yehova na bantu banensu nga tulesambilisha abantu abengi pa Bufumu bwa kwa Lesa ne fyo bukacitila abantunse.—Belengeni Amalumbo 66:16, 17.

12. Bushe nkashi umo uwacaice alandilepo shani pa bupe apokelele ukufuma kuli Yehova?

¹² Abaice nabo bene kuti balatontonkanya pa fyo Yehova abapeela ne fyo abasambilisha. Shannon alebukisha ifyo aumfwile ilyo ali pa kulongana kwa citungu ninshi ali fye ne myaka 11, ali na nkashi nankwe uwali ne myaka 10. Ilyo ali pali uku kulongana kwa citungu ukwali no mutwe waleti, “Ukuipeelesha kwa Bulesa,” baebele abacaice bonse ukwikala ku lubali lumo ulo bapekenye. Pa kubala Shannon ali no mwenso. Nomba alyumfwile bwino ilyo abacaice bonse babapeele icitabo ca Ifipusho Abacaice Bepusha, ne Fyasuko Ifingabafwa. Bushe aumfwile shani pali Yehova ilyo bamupeele ici citabo? Shannon atile: “Ilyo bampeele ici icitabo, e lyo nailwike ukuti Yehova e ko aba, kabili alintemwa icine cine. Twaliba ne nsansa nga nshi pantu Lesa wesu Yehova alatupeela ifya bupe ifisuma kabili ifyapwililika!”

13, 14. Cinshi tufwile ukucita nga ca kuti Yehova atufunda, kabili mulandu nshi?

¹³ Baibolo itila: “Uo Yehova atemwa alamufunda, ifyo na wishi afunda umwana mwaume uo atemwa.” (Amapinda 3:12) Nga tuleleka Yehova aletufunda no kutukansha, kuti tulecita ifisuma kabili kuti twaba no mutende. Kwena, “ukufunda konse takuleta insansa ilyo line, lelo kuleta ubulanda.” (AbaHebere 12:11) Nomba bushe tufwile ukucita shani nga ca kuti Yehova atufunda? Tatufwile ukusuula ifyo atufunda nelyo ukutwalilila ukufulwa nga tatutemenwe ukufunda kwakwe. Apo twalitemwa Yehova, tufwile no kumfwa nga atufunda e lyo no kwaluka umo tushicita bwino.

¹⁴ Mu nshiku sha kwa Malaki, abaYuda abengi tabaumfwilile Yehova. Tabaleumfwa no bubi nangu Yehova akaana ukupokelela amalambo balemupeela. Yehova alifulilwe kabili alibakalipile. (Belengeni Malaki 1:12, 13.) Na kuba, Yehova alibafundile pa miku iingi lelo balikeene ukumfwa. E ico abebele ukuti: “Nkatuma pali imwe icitiipu, kabili nkatiipa amapaalo yenu.” (Malaki 2:1, 2) Kanshi nga twatwalilila ukukaana ifyo Yehova atufunda, nelyo nga twasuula ukufunda kwakwe, tatwakatwalilile ukuba ifibusa fyakwe.

15. Mibele nshi abantu abengi bakwata iyo tushifwile ukuba nayo?

¹⁵ Icalo ca kwa Satana cikoselesha abantu ukuba ne cilumba na bukaitemwe. Abantu abengi tabafwaya ukubeba ifya kucita nelyo ukubalungika. Bamo basumina fye ukubapandako amano nga ca kuti bapelelwa. Ifwe tatufwile ukuba ifi iyo. Baibolo itweba ukuti tatufwile ‘ukupalana no bwikashi buno.’ Lelo tulingile ukwishiba ifyo Yehova afwaya kuli ifwe no kulacita ifimusekesha. (Abena Roma 12:2) Yehova abomfya icilonganino cakwe ku kutufunda pa nshita yalinga. Ku ca kumwenako, cilatusambilisha ifyo tushifwile ukucita nga tuli no mwaume nelyo umwanakashi uushili mwina mwesu, ifyo twingasala ifibusa ifisuma, e lyo ne fyo twingasala bwino ifya kuleseshamo icitendwe. Nga twakonka ukufunda ka kwa Yehova no kulacita ifimusekesha, tulanga ukuti twalimutemwa kabili tulatasha pa fyo atutungulula.—Yohane 14:31; Abena Roma 6:17.

16, 17. (a) Cinshi cacindamina ukubalilapo ukwishiba ifyo Yehova atontonkanya pa co tulefwaya ukucita ilyo tushilacicita? (b) Finshi abena Israele bacitile mu nshita ya kucetekela Yehova?

¹⁶ Abana abanono bashintilila pa bafyashi babo ku kubacingilila no kubafwa. Na bakalamba bene balalomba ubwafwilisho ku bafyashi babo. Nangu ca kutila balaipingwila ifya kucita, balishiba ukuti abafyashi babo kuti ba bapandako amano ayasuma. Shifwe Yehova alitupeela insambu sha kuipingwila ifyo tulefwaya. Nomba pa mulandu wa kuti twalimucetekela sana kabili twalimutemwa, lyonse tulamulomba ukuti aletwafwa kabili tulesha na maka ukwishiba ifyo atontonkanya pa fyo tulefwaya ukucita. Nga tuleshintilila pali Yehova, akatupeela umupashi wakwe uwa mushilo uukalatwafwa ukucita ifisuma.—Abena Filipi 2:13.

¹⁷ Mu nshiku sha kwa Samwele, abena Israele balibacimfishe ku baPelishiti ilyo balelwa nabo. Nomba mu nshita ya kuti bepushe Yehova pa fyo balingile ukucita, abena Israele batile: “Natuyesenda icipao ca cipangano ica kwa Yehova ku Shilo, ukuti ciise pa kati kesu no kuleka citupusushe mu minwe ya balwani besu.” Finshi fyacitike pa numa? “Abaipaiwe bali abengi icine cine, ica kuti mu bena Israele, aba pa makasa abaipaiwe bali 30,000. Ne cipao ca kwa Lesa calisendelwe.” (1 Samwele 4:2-4, 10, 11) Abena Israele baletontonkanya ukuti nga basenda icipao ca kwa Lesa, Yehova ali no kubafwa no kubacingilila. Tabaipwishe ukuti Yehova abafwe nelyo ukufwaya ukwishiba ifyo aletontonkanya pali uyu mulandu. Lelo bacitile ifyo abene baletontonkanya ukuti e fyali bwino, ne cafuminemo ca kuti balibacimfishe.—Belengeni Amapinda 14:12.

18. Cinshi Baibolo imusambilisha pa kutetekela Yehova?

¹⁸ Uwaimbile Amalumbo alitemenwe sana Yehova kabili aleshintilila pali ena, aimbile ati: “Lolela Lesa, pantu nkamutootela pa kuba umupusushi wandi. Mwe Lesa wandi, umutima wandi nausakamikwa. E co mwibukishisha.” (Amalumbo 42:5, 6) Bushe na imwe e fyo mumfwa pali Yehova? Bushe mumfwa ukuti mwalipalama kuli Lesa kabili mwalimucetekela? Nalimo kuti mwasanga ukuti mulingile ukumucetekela sana ukucila na pa fyo mwamucetekela. Baibolo itweba ukuti: “Tetekela Yehova no mutima obe onse kabili wishintilila pa mano yobe we mwine. Uko konse wenda umwishibe, na o akatambalika inshila shobe.”—Amapinda 3:5, 6.

19. Bushe mukalanga shani Yehova ukuti mwalimutemwa?

¹⁹ Ifi Yehova abalilepo ukututemwa, alitusambilisha ukumutemwa. Natuletontonkanya pa fintu ifingi ifyo atucitila ne fyo atutemwa. Natulelanga Yehova ukuti twalimutemwa no mutima wesu onse, no mweo wesu onse, no kutontonkanya kwesu konse, e lyo na maka yesu yonse.—Marko 12:30.