1. Bushe icitetekelo cacindama shani? (Moneni icikope icili pa muulu.)

BUSHE mwalitala amuipushapo ukuti, ‘Bushe Yehova akampususha mu bucushi bukalamba?’ Umutumwa Paulo alandile ukuti nga tulefwaya tukapusuke tulingile ukuba ne citetekelo. Atile: “Ukwabula icitetekelo te kuti tusekeshe Lesa.” (AbaHebere 11:6) Nalimo ici kuti caumfwika icayanguka, lelo icishinka ca kuti “te bantu bonse ababa ne citetekelo.” (2 Abena Tesalonika 3:2) Aya amalembo yabili yalatwafwa ukwishiba umulandu cacindamina ukulakosha icitetekelo cesu.

2, 3. (a) Bushe icitetekelo cesu cacindama shani? (b) Fishinka nshi twalalandapo muli cino cipande?

² Umutumwa Petro alilandilepo pa citetekelo ‘icaeshiwa.’ (Belengeni 1 Petro 1:7.) Ubucushi bukalamba nabupalama sana, kanshi tulefwaikwa ukuba “abantu abakwata icitetekelo icikatupususha.” (AbaHebere 10:39) Kanshi tufwile ukubombesha pa kuti tukoshe icitetekelo cesu. Tulefwaikwa tukabe pa bantu abakapusuka ilyo Yesu Kristu, uwaba Imfumu yesu akasokololwa. E ico nga filya fine fyalandile umwaume awalombele Yesu ukukosha icitetekelo cakwe, na ifwe bene kuti twatila: “Njafweni ukukosha icitetekelo candi!” (Marko 9:24) Nelyo nga filya fyalandile abatumwa, nalimo na ifwe kuti  twatila: “Tulundileniko icitetekelo.”—Luka 17:5.

³ Muli cino cipande, twalalanda pali ifi fishinka fitatu: ifyo twingakosha icitetekelo, ifyo twingalanga ukuti twalikwata icitetekelo icakosa, no mulandu twingacetekelela ukuti Lesa akatwasuka nga twamulomba ukutulundilako icitetekelo.

4. Fya kumwenako fya bani ifingakosha icitetekelo cesu?

⁴ Icitetekelo calicindama nga nshi, e co Yehova atupeelela ifya kumwenako ifingi mu Baibolo ifya bantu abali ne citetekelo. Fyonse ifi “fyalembelwe ku kutufunda.” (Abena Roma 15:4) Ifyo tubelenga pali Abrahamu, Sara, Isaki, Yakobo, Mose, Rahabu, Gideone, Baraki, na bambi abengi kuti fyakosha icitetekelo cesu. (AbaHebere 11:32-35) Na muno nshiku mwine, kwaliba amalyashi ayasuma sana aya bamunyinefwe na bankashi ababa ne citetekelo icakosa. * (Moneni futunoti.)

5. Finshi filanga ukuti Eliya alitetekele sana Yehova, kabili cipusho nshi tulingile ukuyipusha?

⁵ Ica kumwenako ica mu Baibolo, ni kasesema Eliya. Ilyo muletontonkanya pa ca kumwenako cakwe, tontonkanyeni na pa fintu fisano umo alangile ukuti alicetekele sana Yehova. (1) Ilyo Eliya aebele Imfumu Ahabu ukuti Yehova aali no kulenga imfula ukukanaloka, amwebele ukwabula no kutwishika ukuti: “Na pali Yehova Lesa wa kwa Israele uo njiminina pa ntanshi yakwe, mu myaka iyi tamwakabe umume nangu ni mfula.” (1 Ishamfumu 17:1) (2) Eliya alicetekele ukuti Yehova aali no ku mupeela ifyo alekabila pamo na bambi ilyo imfula ishali no kulaloka mu calo. (1 Ishamfumu 17:4, 5, 13, 14) (3) Na kabili, Eliya alicetekele ukuti Yehova aali no kubuusha umwana wa kwa mukamfwilwa. (1 Ishamfumu 17:21) (4) Taletwishika ukuti umulilo wa kwa Yehova wali no koca ilambo ilyo aali no kutuula pa lupili lwa Karmele. (1 Ishamfumu 18:24, 37) (5) Na lintu imfula ishilaloka, Eliya aebele Ahabu ukuti: “Nina, kabiye, ulye no kunwa; pantu kuli ukubulukuta kwa mfula.” (1 Ishamfumu 18:41) Pa numa ya kusambilila pali ifi fyonse ifyacitikile Eliya, kanshi nomba kuti twayipusha atuti, ‘Bushe nalikwata icitetekelo icakosa nge cakweteko Eliya?’

6. Cinshi tulingile ukulomba kuli Yehova pa kuti tukwate icitetekelo?

⁶ Apo te kuti tukwate icitetekelo pa lwesu, tulingile ukulomba Lesa ukuti atupeele umupashi wa mushilo. Cinshi twalandila ifi? Pantu icitetekelo cisabo ca mupashi wa  mushilo. (Abena Galatia 5:22) Cisuma sana ukukonka ifyo Yesu atwebele ukuti tulelomba umupashi wa mushilo. Atile Yehova ‘akapeela umupashi wa mushilo ku bamulomba.’—Luka 11:13.

7. Londololeni ifyo mwingalakosha icitetekelo cenu.

⁷ Nga twatetekela sana Lesa, tulingile fye ukutwalilila ukumutetekela. Icitetekelo kuti twacilinganya ku mulilo. Nga e lyo twakosha fye umulilo, ulubingu lulakula sana. Lelo nga tatulebikapo inkuni, umulilo ulalota, wasuka washima. Nga tulebikapo inkuni ulubingu lulatwalilila ukubilima. Ifi fine e fyo ciba ku citetekelo cesu. Nga tulebelenga no kusambilila icebo ca kwa Lesa cila bushiku, tukatemenwako Yehova ne Cebo cakwe, Baibolo. Lyena, icitetekelo cesu cikatwalilila ukuba icakosa.

8. Finshi fingamwafwa ukulakosha icitetekelo cenu?

⁸ Tamulingile ukupelela fye pa kwishiba ifyo mwasambilile ilyo mushilabatishiwa. (AbaHebere 6:1, 2) Lelo mufwile ukulasambilila na pa masesemo ayafikilishiwa kale. Ukucita ifi kukamwafwa ukutwalilila ukulakosha icitetekelo cenu. Na kabili, ukulabelenga Icebo ca kwa Lesa kukamwafwa ukwishiba nga ca kuti icitetekelo cenu calikosa nelyo iyo.—Belengeni Yakobo 1:25; 2:24, 26.

9, 10. Bushe ifyakonkapo fikosha shani icitetekelo cesu? (a) Ifibusa ifisuma (b) Ukulongana (c) Ukubila imbila nsuma

⁹ Umutumwa Paulo atile Abena Kristu kuti ‘bakoseleshanya, umo na umo ku citetekelo ca mubiye.’ (Abena Roma 1:12) Ni mwi aya amashiwi yalola? Nga tulebishanya pamo na ba bwananyina, icetetekelo cesu kuti cakosa. Ca cine, icitetekelo cesu cilakosa maka maka nga tulebishanya na ba bwananyina abakwata icitetekelo ‘icaeshiwapo.’ (Yakobo 1:3) Ifibusa ifibi filonaula icitetekelo, lelo ifibusa ifisuma filacikosha. (1 Abena Korinti 15:33) E mulandu wine batucincishisha ukulalongana lyonse. Pa kulongana kuti ‘tulekoseleshanya.’ (Belengeni AbaHebere 10:24, 25.) Na kabili, ifyo tusambilila pa kulongana filakosha icitetekelo cesu. Baibolo itila “umuntu atetekela ilyo aumfwa amashiwi.” (Abena Roma 10:17) E ico mufwile ukuipusha amuti, ‘Bushe ndalongana lyonse?’

¹⁰ Na cimbi icitwafwa ukukosha icitetekelo cesu kulabila imbila nsuma no kusambilishako bambi icine ca mu Baibolo. Na kabili, nga filya fine fyali Abena Kristu ba ku kale, na ifwe tulasambilila ukucetekela Yehova no kuba abashipa pa kulanda.—Imilimo 4:17-20; 13:46.

11. Cinshi calengele ukuti Kalebu na Yoshua bakwate icitetekelo icakosa, kabili kuti twabapashanya shani?

¹¹ Tulatetekela sana Yehova nga twamona ifyo atwafwa na fintu asuka amapepo yesu. Ifi fine e fyo cali na kuli Kalebu na Yoshua. Balilangile ukuti balitetekele Yehova ilyo baile mu kulengula Icalo ca Bulayo.  Mu kupita kwa nshita, icitetekelo cabo calekoselako ilyo balemona ifyo Yehova alebafwa. E calengele Yoshua ebe abena Israele ukuti: “Tapali amashiwi nangu yamo pa mashiwi yonse ayasuma ayo Yehova amwebele ayashacitika.” Kabili atile: “E ico tiineni Yehova no kumubombela mu cishinka na mu cine.” Alundilepo no kuti: “Lelo ine na ba mu ng’anda yandi twakulabombela Yehova.” (Yoshua 23:14; 24:14, 15) Nga twatetekela Yehova no kumona ifyo atwafwa, icitetekelo cesu cikakoselako.—Amalumbo 34:8.

12. Kuti twalanga shani ukuti twalikwata icitetekelo icakosa?

¹² Kuti twalanga shani ukuti twalikwata icitetekelo icakosa? Umusambi Yakobo atile: “Ndekulanga icitetekelo candi ku milimo yandi iisuma.” (Yakobo 2:18) Ifyo tucita e filanga ukuti twalikwata icitetekelo. Natumone.

13. Tulanga shani ukuti twalikwata icitetekelo nga tuleshimikila abantu imbila nsuma?

¹³ Inshila iikalamba iya kulangilamo ukuti twaliba ne citetekelo, kulashimikila. Cinshi twalandila ifi? Pantu nga tuleshimikila, ninshi tulelanga ukuti twalisumina ukuti impela naipalama no kuti ‘tayakacelwe.’ (Habakuki 2:3) Pa kuti twishibe nga ca kuti icitetekelo cesu calikosa, tulingile twayipusha ukuti: ‘Bushe nalicindamika umulimo wa kushimikila abantu imbila nsuma? Bushe ndesha na maka ukwebako bambi pali Lesa? Bushe ndafwayako inshila ishingangafwa pa kuti ndeshimikila sana abantu imbila nsuma?’ (2 Abena Korinti 13:5) E ico pa kulanga ukuti icitetekelo cesu calikosa, tufwile ‘twaisosela fwe bene no kupusuka,’ e kutila ukulabila imbila nsuma.—Belengeni Abena Roma 10:10.

14, 15. (a) Kuti twalanga shani ukuti twalikwata icitetekelo mu fyo tucita cila bushiku? (b) Shimikeni icacitike icilangilila umo calola ukukwata icitetekelo icakosa.

 ¹⁴ Na kabili, nga tuleshipikisha amafya ayo tukwata mu bumi, ninshi tulelanga ukuti twalitetekela Yehova. Nga ca kuti, natulwala, natufuupulwa, tuli no bulanda, tuli bapiina nelyo nga natukwata amafya yambi, tufwile ukutetekela ukuti Yehova na Yesu ‘bakatwafwa pa nshita tulekabila ubwafwilisho.’ (AbaHebere 4:16) Inshila na imbi iyo tulangilamo ukuti twalitetekela Yehova, ni lintu twamulomba ukuti atwafwe. Yesu atile kuti twalomba Yehova ukutupeela ‘ifya kulya fya buno bushiku ukulingana ne fyo tulekabila.’ (Luka 11:3) Ifyo tubelenga mu Baibolo filangilila ukuti Yehova kuti atupeela fyonse ifyo tulekabila. Ku ca kumwenako, ilyo imfula ishaleloka mu Israele, Yehova alepeela Eliya ifya kulya na menshi. Baibolo itila “bamwankole ulucelo balemuletela umukate ne nama, ne cungulo na co balemuletela umukate ne nama, kabili alenwa amenshi mu mumana.” (1 Ishamfumu 17:3-6) Na ifwe twalitetekela ukuti Yehova kuti atupeela ifyo tulekabila.

¹⁵ Twalitetekela ukuti, nga tulekonka amashiwi ya kwa Lesa ayatutungulula tatwakafilwe ukupeela ifyo aba mu lupwa lwesu balekabila. Nkashi Rebecca uwaupwa uwikala ku Asia, alondelwele ifyo ena no lupwa lwakwe bakonka amashiwi yaba pali Mateo 6:33 na Amapinda 10:4. Atile abena mwakwe balilekele incito pantu balemona ukuti incito balebomba yalelenga  belacita fyonse ifya kukosha bucibusa bwabo na Yehova. Lelo bali na bana bane abo balesunga, e ico batampile ubukwebo bwa kulashitisha ifya kulya. Apo balebombesha, lyonse balekwata indalama isha kushitamo ifyo ulupwa lwabo lwalekabila. Atile: “Twalimwene ukuti Yehova tatulekeleshe. Tatwalelepo insala.” Bushe na imwe kwaliba ifyamucitikilapo ifyakoseshe icitetekelo cenu?

16. Cinshi cikacitika nga twatetekela Lesa?

¹⁶ Tatufwile ukulatwishika ukuti nga ca kuti tulekonka ifyo Yehova atusambilisha, akalatwafwa. Paulo ayambwile amashiwi ya kwa Habakuki ilyo atile: “Uwalungama akaba no mweo pa mulandu wa citetekelo cakwe.” (Abena Galatia 3:11; Habakuki 2:4) E mulandu wine tulingile ukutetekela Lesa uwingatwafwa. Paulo alandile ati Lesa e o ‘tulecindika uwaba na maka ya kucita fyonse no kulundapo ukucila na pa fyo twingalomba nangu pa fyo twingatontonkanya.’ (Abena Efese 3:20) Ababomfi ba kwa Yehova balesha na maka ukucita ifyo Lesa afwaya, lelo balishiba ukuti te fyonse bengacita. Ala tulatasha nga nshi pa fyo Lesa atwafwa na pa fyo atupaala nga tubombesha.

17. (a) Bushe Yesu ayaswike shani abatumwa bakwe? (b) Cinshi cingalenga twatetekela ukuti Yehova akatulundilako icitetekelo nga twamulomba?

¹⁷ Ifyo twasambilila muli cino cipande nalimo fyalenga twaumfwa nge fyo abatumwa baumfwile ilyo baipwishe Yesu abati: “Tulundileniko icitetekelo.” (Luka 17:5) Yesu alyaswike abatumwa mu nshila iyaibela ilyo abatumine umupashi wa mushilo pa Pentekoste mu 33 C.E., uwabafwile ukumfwikisha ukufwaya kwa kwa Lesa. Ici icacitike calikoseshe icitetekelo cabo. Finshi fyacitike pa numa? Balitendeke kampeni iikalamba nga nshi iya kushimikila abantu imbila nsuma. (Abena Kolose 1:23) Bushe na ifwe kuti twatetekela ukuti nga twalomba ukutulundilako icitetekelo bakatupeela? Yehova alitulaya ukuti akatupeela “cikulu fye nacilingana no kufwaya kwakwe.” —1 Yohane 5:14