ICIPANDE CA KUSAMBILILAMO 39
Ifyo Twingacita nga ca Kuti Lupwa Wesu Aleka Ukubombela Yehova
‘Imiku iingi balemulungulusha.’—AMALU. 78:40.
ULWIMBO 102 ‘Muleafwa Abanaka’
IFYO TWALASAMBILILA *
1. Bushe abantu bomfwa shani nga ca kuti uwa mu lupwa atamfiwa?
BUSHE mwalikwatapo lupwa wenu uwatamfiwa? Nga ca kuti ica musango uyu camucitikila, kulaba ukumfwa sana ubulanda! Ba Hilda batile: “Ilyo abena mwandi bafwile pa numa ya kwikala nabo imyaka 41 mu cupo, nalemona kwati tapali nangu cimo icali no kucitika icali no kundetela ubulanda sana ukucila pa mfwa ya bena mwandi. * Nomba ilyo umwana wandi atamfiwe mu cilonganino, asha na bena mwakwe na bana bakwe, ala calimputwile umusana.”
Yehova alishiba ifyo mumfwa ubulanda pa fyo lupwa wenu aleka ukumubombela (Moneni paragrafu 2 na 3) *
2-3. Ukulingana na mashiwi yaba pa Amalumbo 78:40, 41, bushe Yehova omfwa shani nga ca kuti umo aleka ukumubombela?
2 Baleni tontonkanyeni pa fyo Yehova aumfwile ububi ilyo bamalaika bamupondokele! (Yuda 6) Kabili ne fyo camukalipe ilyo abantu abo atemenwe, abena Israele, baikalile fye ukumupondokela. (Belengeni Amalumbo 78:40, 41.) Muleibukisha ukuti Shifwe wa ku Muulu na o wine alomfwa ububi nga ca kuti umo uo mwatemwa aleka ukumubombela. Aleshiba ne fyo muleumfwa ububi pa filecitika. Kanshi akulamukoselesha no kumutungilila.
3 Muli cino cipande twalasambilila pa fyo twingacita nga ca kuti lupwa wesu aleka ukubombela Yehova. Twalasambilila ne fyo twingakoselesha aba mu cilonganino abakwata lupwa uwatamfiwa. Intanshi natulande pa fyo tushifwile ukulatontonkanya nga ca kuti lupwa wesu atamfiwa.
MWILAIPEELA IMILANDU
4. Bushe abafyashi abengi bomfwa shani nga ca kuti umwana wabo atamfiwa?
4 Nga ca kuti umwana atamfiwa mu cilonganino, ilingi abafyashi balaipeela imilandu ukuti nalimo tababombeshe ukumusambilisha ifingamwafwa ukutwalilila ukubombela Yehova. Ilyo umwana wa ba Luke umwaume atamfiwe, batile: “Naleipeela sana imilandu. Nshalekwata no tulo. Ici calenkalifya umutima ica kuti inshita shimo nalelila no kulila.” Ba Elizabeth abo umwana wabo umwaume atamfiwe nabo batile: “Nalemona kwati nshamukushishe bwino. Naleumfwa kwati nalifililwe ukusambilisha umwana wandi icine.”
5. Bushe nani twingapeela umulandu nga ca kuti umo aleka ukubombela Yehova?
5 Tufwile ukulaibukisha ukuti Yehova alitupeela insambu sha kuisalila ifya kucita. Ici calola mu kutila, kuti twasalapo ukulamupepa nelyo iyo. Abacaice bamo balipingulapo ukulabombela Yehova ne cishinka, nangu ca kuti abafyashi babo tabalemubombela. Bambi nabo abafyashi babo balibasambilishe icine bwino bwino, lelo ilyo bakulile bapingwilepo ukukanabombela Lesa. Kanshi ukulingana ne fyo twamona, cila muntu alingile ukupingulapo nampo nga kubombela Yehova nelyo iyo. (Yosh. 24:15) E co mwe bafyashi mwe bakwata umwana uwatamfiwa mwilaipeela imilandu!
6. Bushe abana bomfwa shani nga ca kuti umufyashi atamfiwa?
6 Inshita shimo umufyashi e wingatamfiwa kabili asha no lupwa lwakwe. (Amalu. 27:10) Ica musango uyu nga cacitika cilalenga abana ukumfwa sana ubulanda, pantu ilingi abana basambilila ku bafyashi. Ba Esther abo bawishi batamfiwe batile: “Nalelila sana pantu nalishibe ukuti tabalekele ukubombela Yehova, lelo bapingwilepo ukuleka ukumubombela ku mufulo fye. Nalitemwa sana batata, kanshi ilyo batamfiwe nalesakamana sana. Lyonse nga natontokanyapo naletulumuka no kutulumuka ica kuti nalebulwa no tulo.”
7. Bushe Yehova omfwa shani pa bana abakwata abafyashi abatamfiwa?
7 Mwe bana, nga ca kuti abafyashi benu balitamfiwa, muleibukisha ukuti na ifwe bene tulomfwa sana ububi nge fyo fye na imwe mumfwa. Muleibukisha ukuti Yehova alishiba ifyo cimukalipa pali ifi fyacitika. Yehova alimutemwa alitemwa ne fyo mutwalilila ukumubombela ne cishinka, kabili ifwe bonse mu cilonganino tulatemwa sana ifi mwaba ne cishinka kuli Yehova. Mwilaipeela imilandu pa fyo abafyashi benu bapingulapo ukucita. Nga fintu tulandilepo kale, Yehova alipeela cila muntu insambu isha kuisalila, nampo nga kumubombela nelyo iyo. Kabili umuntu onse uwaipeela no kubatishiwa, afwile “ukuisendela icipe cakwe umwine.”—Gal. 6:5.
8. Finshi aba mu lupwa bafwile ukulacita ilyo balelolela lupwa wabo ukubwelela kuli Yehova? (Moneni akabokoshi akaleti “ Bweleleni Kuli Yehova.”)
8 Nga ca kuti lupwa wenu alitamfiwa, ukwabula no kutwishika mulafwaisha ukuti akabwelele kuli Yehova. Finshi mwingalacita ilyo mulelolela ukuti akabweshiwe? Mulekosha icitetekelo cenu. Nga mulekosha icitetekelo cenu, mukalenga bambi mu lupwa bakalemupashanya kabili nalimo no watamfiwa kuti acitapo cimo. Ukucita ifi kukamwafwa ukuba na maka ya kushipikisha. Kanshi natulande pa fyo mufwile ukucita pa kukosha icitetekelo cenu.
IFYO MWINGACITA PA KUKOSHA ICITETEKELO CENU
9. Finshi mwingacita pa kuti mulekosha icitetekelo cenu? (Moneni akabokoshi akaleti “ Amalembo Ayengamusansamusha nga ca Kuti Lupwa Wenu Aleka Ukubombela Yehova.”)
9 Mule-esha na maka ukukosha icitetekelo cenu. Calicindama sana ukutwalilila ukukosha icitetekelo cenu e lyo ne citetekelo ca balupwa wenu. Bushe kuti mwacita shani ifyo? Muleleka Yehova alemukosha ukupitila mu kulabelenga Icebo ca kwa Lesa no kulatontonkanya pa fyo mulebelenga e lyo no kulalongana lyonse. Ba Joanna abo bawishi na bankashi nabo balekele ukulabombela Yehova, batile: “Ndomfwako bwino nga nabelenga pa bantu abalembwa mu Baibolo pamo nga Abigaili, Estere, Yobo, Yosefe e lyo na Yesu. Ifyo bacitile filankoselesha sana kabili filatalalika umutima wandi. Inyimbo ishaibela na sho shilankoselesha sana.”
10. Bushe amashiwi yaba pa Amalumbo 32:6-8, yatusansamusha shani nga tuli no bulanda?
10 Mule-eba Yehova fyonse ifili ku mutima. Nga muli no bulanda sana, mwilaleka ukupepa kuli ena. Mulepapaata Shifwe wa kutemwa ukuti alemwafwa ukulamona ifintu nge fyo ena afimona, kabili mulemulomba ukuti ‘alemucenjesha no kumusambilisha inshila iyo mufwile ukuyamo.’ (Belengeni Amalumbo 32:6-8.) Kwena tacayanguka ukweba Yehova fyonse ifili ku mutima. Na lyo line Yehova aleshiba fyonse ifilemukalifya. Alimutemwa icine cine kabili afwaya ukuti mulemupongolwela fyonse ifili ku mutima.—Ukufu. 34:6; Amalu. 62:7, 8.
11. Ukulingana na mashiwi yaba pa AbaHebere 12:11, mulandu nshi tulingile ukulamwena ukuti ifyo Yehova atusalapula fyabelako ku busuma bwesu? (Moneni akabokoshi akaleti “ Ukutamfya Umuntu mu Cilonganino Kulanga Ukuti Yehova Alitutemwa.”)
11 Mwilailishanya pa fyo baeluda bapingwile umulandu. Ukutamfya umuntu mu cilonganino ni nshila isuma iyo Yehova abikako. E nshila isuma iya kwafwilamo umuntu uwaleka ukubombela Yehova, e lyo no kucingilila aba mu cilonganino. (Belengeni AbaHebere 12:11.) Aba mu cilonganino bamo nalimo kuti batila baeluda tabapingwile bwino umulandu. Lelo muleibukisha ukuti ilingi line abalanda ifyo tabafwaya ukulanda pa fyo uwalufyenye acitile. Apo tatwishiba ifishinka fyonse, tufwile ukucetekela ukuti baeluda abali muli komiti ya bupingushi balibombeshe na maka yabo yonse ukukonka ifyo Amalembo yalanda e lyo no kupingwilako Yehova.—2 Imila. 19:6.
12. Fisuma nshi fyafuminemo ilyo bamo bakonkele ifyo Yehova alanda pa batamfiwa?
12 Nga muletungilila ifyo baeluda bapingwile ukutamfya lupwa wenu, kuti mwalenga atendeka ukubombela Yehova na kabili. Ba Elizabeth abo tulandilepo kale, batile: “Tacayangwike ukukanalanda no mwana wesu uwali umukalamba. Nomba ilyo abweshiwe alisumine ukuti cali fye bwino filya fine bamutamfishe. Kabili ilyo papitile inshita, aishilelanda ukuti alisambilileko kuli filya fyamucitikile.” Balandile no kuti: “Nalisambilileko ukuti ifyo Yehova atusalapula fyabelako ku busuma bwesu.” Abena mwabo ba Mark nabo balandile ukuti umwana wesu aishiletweba ukuti: “Filya mushalelanda na ine fyalilengele ukuti ntendeke ukubombela Yehova na kabili.” Ba Mark batile balatasha sana Yehova filya abafwile ukutwalilila ukuba aba cishinka.
13. Finshi fingamwafwa ukukanaumfwa sana ubulanda?
13 Mulelandako ne fibusa abengomfwikisha ifyo muleumfwa. Muleba pamo na Bena Kristu abakalamba mu fya kwa Lesa, abengamwafwa ukukananenuka. (Amapi. 12:25) Ba Joanna abo tulandilepo kale batile: “Naleumfwa kwati naba neka, nomba ukulanda ne fibusa kwalengele nashipikisha.” Nomba finshi mwingacita nga ca kuti bamo mu cilonganino balanda fimo ifyamukalifya?
14. Mulandu nshi tulingile ukutwalilila “ukulashipikishanya no kubelelana uluse”?
14 Mwilafulwa bwangu nga ca kuti bamunyinefwe nelyo bankashi balanda fimo ifingamukalifya. Ukulanda fye icishinka, tatwingenekela ukuti aba bwananyina bonse bakulalanda fye ifisuma. (Yako. 3:2) Bonse tatwapwililika, kanshi mwilapapa nga ca kuti uwa bwananyina teshibe ifya kulanda nelyo nga amweba fimo mu kukanaishiba ifyamukalifya. Muleibukisha ifyo umutumwa Paulo atufundile ukuti: “Muleshipikishanya no kubelelana uluse nga umo ali ne ca kuilishanya ku munankwe.” (Kol. 3:13) Nkashi umo uo uwa mu lupwa lwakwe atamfiwe atile: “Yehova alingafwa ukwelela aba bwananyina abalefwaya ukunkoselesha lelo abankalifye mu kukanaishiba.” Finshi aba bwananyina mu cilonganino bengacita pa kukoselesha abo lupwa wabo atamfiwa?
IFYO ABA MU CILONGANINO BENGAMWAFWA
15. Finshi twingacita pa kwafwa abo lupwa wabo atamfiwe nomba line?
15 Muleba ne cikuuku kabili muletemwa balupwa lwa muntu uwatamfiwa. Ba Miriam balandile ukuti baletiina ukuya mu kulongana ilyo ndume yabo atamfiwe. Batile: “Nshaishibe ifyo aba bwananyina bali no kulanda nga naya mu kulongana. Lelo bamunyinefwe na bankashi abengi bali sana no bulanda pa fyacitike. Kabili tabalelanda ifyabipa pali ndume yandi uwatamfiwe. Ifi bacitile fyalengele nilaumfwa kwati naba neka.” Nkashi umbi na o alandile ukuti: “Ilyo umwana wesu atamfiwe, ifibusa fyesu fyaleisa mu kutukoselesha. Bamo balenjeba fye ukwabula ukupita na mu mbali ukuti tabaishibe ifya kunjeba. Bambi balelilila pamo na ine, e lyo bambi nabo balenembela amakalata ya kunkoselesha. Ifyo balecita fyalingafwile sana!”
16. Bushe aba mu cilonganino kuti batwalilila shani ukulakoselesha no kwafwa abakwata lupwa uwatamfiwa?
16 Muletwalilila ukukoselesha abo lupwa wabo atamfiwa. Ino nshita e lyo balefwaisha sana ukubatemwa no kubakoselesha. (Heb. 10:24, 25) Inshita shimo abo lupwa wabo atamfiwa balamona ukuti aba mu cilonganino balaleka ukulanda nabo, kwati limbi nabo balitamfiwa. Tatufwile ukuleka balemona kwati nabo balitamfiwa! Abacaice abo abafyashi babo batamfiwa balakabila ukubakoselesha sana e lyo no kubatasha pa fyo batwalilila ukuba aba cishinka. Ba Maria abo abena mwabo batamfiwe kabili basha no lupwa, batile: “Bamunyinefwe na bankashi baleisa ku ng’anda, balenjipikilako ifya kulya, kabili twaleba nabo pamo ilyo tulesambilila na bana. Nabo baleumfwa ububi pa fyacitike kabili balelilila pamo na ine. Balenandilako ilyo abantu bambi balelanda ifya bufi pa fyacitike. Ala balenkoselesha icine cine!”—Rom. 12:13, 15.
Aba bwananyina balalanga ukutemwa nga balebika amano ku bakwata lupwa uwatamfiwa (Moneni paragrafu 17) *
17. Finshi baeluda bengacita pa kusansamusha ababa no bulanda?
17 Baeluda mulesangako inshita yakukoselesha abo lupwa wabo atamfiwa. Mwalikwata umulimo uwaibela uwa kusansamusha abo lupwa wabo aleka ukubombela Yehova. (1 Tes. 5:14) Kuti mwabakoselesha nga mulelandako na bena ilyo mushilatendeka ukulongana e lyo na pa numa ya kulongana. Mulebatandalila kabili mulebapepelako. Mulebombako nabo umulimo wa kubila imbila nsuma kabili limo kuti mwabetako ilyo mukwata amapepo ya lupwa. Baeluda bafwile ukulasakamana impaanga sha kwa Lesa ababa no bulanda e kutila ukuba no luse, e lyo no kubalanga ukuti balibatemwa icine cine.—1 Tes. 2:7, 8.
MWILATWISHIKA UKUTI BAKABWELA KABILI TWALILILENI UKUCETEKELA YEHOVA
18. Ukulingana ne lembo lya kwa 2 Petro 3:9, bushe Lesa afwaya ukuti abantu abaleka ukumubombela bacite cinshi?
18 Yehova “tafwaya umuntu nangu umo ukonaika lelo afwaya ukuti bonse bakalapile.” (Belengeni 2 Petro 3:9.) Ubumi bwa muntu bwalicindama kuli Lesa nangu engacita ulubembu ulwabipisha. Muleibukisha ukuti Yehova alilipile umutengo uukalamba sana, e kutila ubumi bwa Mwana wakwe uo atemwa, pa kuti atulubule ku lubembu. Cikuuku cikuuku, Yehova alaafwa bonse abaleka ukumubombela pa kuti batendeke ukumubombela na kabili. Ifyo Yesu alandile mu cilangililo ca mwana uwapondweke, e fishininkisha ici. (Luka 15:11-32) Abengi abalekele ukubombela Shifwe wa ku muulu uwaba no kutemwa, balitendeka ukumubombela na kabili. Bamunyinefwe na bankashi mu cilonganino balibapokelele na maboko yabili. Ba Elizabeth abo tulandilepo kale, balitemenwe sana ilyo umwana wabo abweshiwe. Balandile ukuti: “Ndatasha sana kuli bonse abaletukoselesha ukuti tutwalilile ukucetekela ukuti umwana wesu akatendeka ukubombela Yehova na kabili.”
19. Mulandu nshi tulingile ukutwalilila ukucetekela Yehova?
19 Tufwile ukulacetekela Yehova lyonse. Tatweba ukucita ifintu ifingatuletelela. Ni Shifwe uwaba na bukapekape kabili uwa luse, alitemwa sana bonse abamutemwa kabili abamupepa. Muleibukisha ukuti Yehova takatale amusha ilyo muli na mafya. (Heb. 13:5, 6) Ba Mark abo tulandilepo kale batile: “Yehova tatalile atusha. Alaba mupepi na ifwe lyonse ilyo tuli na mafya.” Yehova akatwalilila ukumupeela “amaka yacila aya bantunse.” (2 Kor. 4:7) Kanshi kuti mwatwalilila kuba ne citetekelo cakosa no kuba ne subilo na lintu lupwa wenu aleka ukubombela Yehova.
ULWIMBO 44 Ipepo lya Muntu Uuli no Bulanda
^ para. 5 Tulomfwa sana ubulanda nga ca kuti uo twatemwa aleka ukubombela Yehova. Muli cino cipande twalasambilila ifyo Lesa omfwa ica musango uyu nga cacitika. Twalasambilila pa fingakoselesha balupwa lwa muntu uutamfiwe, e lyo ne fyo bengacita pa kutwalilila ne citetekelo cakosa. Na kabili twalasambilila ne fyo aba mu cilonganino bonse bengafwa no kukoselesha balupwa lwa muntu uutamfiwe.
^ para. 1 Amashina yamo ayali muli cino cipande nabayalula.
^ para. 79 UBULONDOLOSHI BWA CIKOPE: Nga ca kuti umulume aleka ukubombela Yehova kabili asha no lupwa lwakwe, abena mwakwe na bana balaculilamo
^ para. 81 UBULONDOLOSHI BWA CIKOPE: Baeluda babili nabaya mu kukoselesha ulupwa lumo mu cilonganino.
