Palameni Kuli Lesa

Kacema Uusakamana Impaanga

Mateo 18:12-14

‘BUSHE Lesa alansakamana?’ Nga mwaliyipushapo ici cipusho, ishibeni ukutila te imwe mweka. Fwe bengi tulapita mu macushi na mafya, kabili tulafwaya ukwishiba, nampo nga Kabumba wa muulu ne sonde ifishaikulila, alitubikako amano. Calicindama ukwishiba nga ca kutila Yehova Lesa alatusakamana pa lwesu. Ilyo Yesu uwaishibe bwino sana Yehova aali pano calo, alandile pa cilangililo icitulanga bwino bwino ukuti Lesa alatusakamana.

Yesu apashenye Lesa kuli kacema uusakamana impaanga ilyo asosele ukuti: “Umuntu nga akwate mpaanga umwanda umo (100) kabili yalubapo imo, bushe takashe amakumi pabula na pabula (99) mu mpili no kuya alefwaya imo iilubile? Kabili nga aisanga, ndemwebe cine cine nati, alasekelela apakalamba pali yene ukucila pa sha makumi pabula na pabula (99) ishishaluba. Ifyo fine na Tata uwaba mu muulu tafwaya ukuti umo uwa pali aba abanono alobe.” (Mateo 18:12-14) Natumone ifyo Yesu alangilile ukuti Yehova alasakamana umuntu umo na umo uumupepa.

Kacema alishibe ukutila afwile ukusakamana impaanga imo na imo. Nga ca kutila impaanga yafuma pa shibiye, aleishiba iilubile. Aleishiba ishina lya mpaanga imo na imo ilyo aipeele. (Yohane 10:3) Kacema uusakamana impaanga taletuusha mpaka fye asange impaanga ilubile no kuibwesesha ku shibiye. Nga aya mu kufwaya iilubile, te kutila alesha isho 99 ukwabula uwa kushisakamana. Bakacema ilingi line balecemena pamo no kuleka impaanga shabo shileba pamo. * Kanshi kacema uwaya mu kufwaya impaanga iilubile, aleshiila bakacema banankwe impaanga shakwe pa kuti bamumweneko. Nga asanga impaanga iilubile ili fye bwino, kacema alesekekela. Alesunsa impaanga yakwe pa kubeya iyaleba no mwenso no kuitwala ku shibiye pa kuti na yo icingililwe.—Luka 15:5, 6.

Mu kulondolola ici cilangililo, Yesu atile Lesa tafwaya ukuti “umo uwa pali aba abanono alobe.” Yesu alandile fi ninshi nasokapo kale abasambi bakwe ukuti tabafwile “ukupunwisha umo pali aba banono [abamutetekela].” (Mateo 18:6) Lelo cinshi icilangililo ca kwa Yesu citusambilisha pali Yehova? Citusambilisha ukuti, Yehova ni kacema uusakamana sana impaanga imo na imo, pamo na “banono,” e kutila balya abo aba muno calo bamona kwati tabacindama. Lesa alishiba uumupepa umo na umo kabili cila kapepa alicindama mu menso yakwe.

Nga mulefwaya ubushininkisho bwa kutila mwalicindama kuli Lesa, kuti cawama mwasambilila na fimbi pali Yehova Lesa, Kacema Mukalamba na pa fyo mwingapalama kuli ena. Nga mwacite fyo mukacetekela nga filya umutumwa Petro acetekele uo tatutwishika ukutila aliyumfwilile umwine uko Yesu alandile ici cilangililo ca mpaanga yaluba. Petro aishilelemba ukutila: “Mulepoosa amasakamika yenu yonse pali [Lesa], pantu asakamana imwe.”—1 Petro 5:7.

[Futunoti]