Umulimo wa kwa Maria mu Kufwaya kwa kwa Lesa
Umulimo wa kwa Maria mu Kufwaya kwa kwa Lesa
ILYO Yesu aleshimikila, umwanakashi umo abilikishe ati: “Lyalipaalwa ifumo ilyakusendele na mabele ayo waonkeleko!” Nga ca kuti Yesu alefwaya ukuti abantu balepepa banyina, apa nga epo aebele abantu ukulacita ifyo fine. Lelo atile: “Awe, Abapaalwa ni abo abomfwa no kukonka icebo ca kwa Lesa!”—Luka 11:27, 28.
Yesu tapeelepo banyina umucinshi waibela; nelyo ukweba abasambi bakwe ukulacite fyo. Nomba bushe aya mashiwi yalomfwana na filya abantu abengi abasumina bacindikisha Maria? Natulande pa mafundisho abantu abengi basambilisha pali Maria nyina kwa Yesu ne fyo Amalembo ya Mushilo yalandapo.
“We Wafulishe Nema,” “Walisenaminwa pa Banakashi Bonse”
Malaika Gabriele alyebele Maria umulimo ali no kubomba mu kufwaya kwa kwa Lesa. Pali iyo ine nshita, malaika aposeshe Maria ati: “Mwapoleni, we wapaalwa nga nshi, Yehova ali nobe.” (Luka 1:28) Mu nshila imbi aya mashiwi kuti yapilibulwa no kuti: “Mwapola, we wasenaminwa, Shikulu ali na iwe.” Pa numa, Elisabete aposeshe Maria na mashiwi ya kuti: “Walipaalwa pa banakashi bonse, kabili alipaalwa umwana uo ukafyala!” (Luka 1:42) Bushe aya mashiwi yalolele mu kuti Maria alingile ukupepwa?
Awe, nga mwayatontonkanyapo sana mwalamona ukuti temo yalolele. Nangu ca kuti Bakatolika balibika aya mashiwi mwi pepo bapepa kuli Maria, Baibolo iine tayalandapo ukuti tufwile ukupepa kuli Maria. Gabriele na Elisabete balishibe ukuti Maria alipeelwe umulimo wacindamisha uwa kufyala Mesia, lelo Amalembo tayalandapo ukutila tufwile ukupepa kuli Maria. Ilyo abasambi balombele ukuti Yesu abasambilishe ukupepa, tabebelepo ukulapepa kuli Maria, abebele ukulapepa kuli Wishi. Na kuba ipepo lyaishibikwa ilyo Yesu alangilile, lyayambila na mashiwi ya kuti: “Shifwe wa mu muulu.”—Mateo 6:9.
Akaba pa Bakalateka
Icisambilisho na cimbi icaseeka ca kuti Maria nomba ni “Namfumu wa mu muulu.” Nomba Baibolo tayamupeelapo ilumbo lya musango yu. Lelo kwena yalilanda ukuti Maria alikwata umulimo wacindama mu buteko bwa kwa Lesa ubwa ku muulu. Mulimo nshi uyo?
Yesu atile abasambi bakwe bamo aba cishinka, bakateka nankwe mu Bufumu bwakwe. (Luka 22:28-30) Yesu akapeela amaka ku basalwa ukubomba nga “bashimapepo ba kwa Lesa wesu, kabili bakaba bashamfumu abakalateka isonde.” (Ukusokolola 5:10) Kanshi Baibolo ilatwafwa ukwishiba ukuti Maria aba pali balya abapeelwa ili ishuko ilikalamba. Cinshi twalandile fi?
Nga muleibukisha, ilyo Yesu afwile, Maria ‘alepepa lyonse’ capamo na basambi ba kwa Yesu na bamunyina. Abantu 120 balilongene ku kupepela pamo ukubikako “na banakashi bamo.” (Imilimo 1:12-15) Baibolo itila ilyo “ubushiku bwa Pentekoste bwali tabulapwa, bonse bali pa ncende imo” ilyo umupashi wa mushilo waishile pali bena, no kubalenga ukulalandila mu ndimi bashaishibe.—Imilimo 2:1-4.
Apo Maria na o ali pali balya abapaalilwe, bushininkisho bwa kuti ena na banakashi bambi abapokelele umupashi wa mushilo, balisalilwe ukuba na Yesu mu Bufumu bwakwe ubwa mu muulu. Kanshi twalikwata ubushinino bwa kuti Maria ino nshita, aba na Yesu mu bukata bwacindamisha ubwa ku muulu. (Abena Roma 8:14-17) Tontonkanyeni pe shuko likakwata Maria na bambi abasalwa ukuteka na Yesu mu kufikilisha ukufwaya kwa kwa Lesa.
Ukuleta Amapaalo Ayakalamba
Ibuuku lya Ukusokolola, lyatila abantu 144,000 e bakabuushiwa ukuya ku muulu no kubomba pamo na Yesu nga bashimapepo, bakapingula, kabili ishamfumu. (Ukusokolola 14:1, 4; 20:4, 6) Apo bakaba ni bashimapepo, bakabomfya amaka ye lambo lya kwa Yesu ku bantunse bonse aba cumfwila, ukubafwa ukulapepa Lesa bwino, ukuba ne mibele isuma, no kuba abapwililika. (Ukusokolola 21:1-4) Likaba lishuko sana kuli bakapepa ba kwa Yehova bonse aba cishinka abakabako pali iyo nshita! *
Maria alibombele, kabili acili alikwata umulimo mu kufwaya kwa kwa Yehova. Maria alilinga sana ukumupashanya pantu ali uwaicefya, uwa citetekelo, uwa cumfwila, ali-ipeeleshe nga nacifyashi, e lyo maka maka pantu alishipikishe amesho. Filya abombele umulimo wa kufyala Mesia na filya akabomba umulimo wa kwafwa ukuleta amapaalo yakabelelela, alilinga ukumupeela umucinshi.
Lelo icikalamba twingasambililako kuli Maria ca kuti, ena na babomfi ba cishinka bambi aba kwa Lesa, bapepa Yehova, tabapepa lesa umbi. Maria na bambi abateka na Yesu ku muulu balasansula amashiwi yabo ukubilisha ukuti: “Ku Waikala pa cipuna ca bufumu [Yehova Lesa] na ku Mwana wa mpaanga [Yesu Kristu] kube ipaalo no mucinshi no bukata na maka pe na pe.”—Ukusokolola 5:13; 19:10.
[Futunoti]
^ para. 13 Nga mulefwaya ukwishibilapo na fimbi pali aya mapaalo, belengeni icipandwa 8 mu citabo citila, Bushe Cinshi Baibolo Isambilisha? icalembwa ne Nte sha kwa Yehova.
[Amashiwi pe bula 10]
Maria alilinga sana ukumupashanya pantu ali uwaicefya, uwa citetekelo, kabili uwa cumfwila