Bushe Lesa Nani?

BUSHE kuti mwa-asuka shani ici cipusho? Bamo batontonkanya ukuti Lesa balimwishiba bwino, batila munabo sana. Bambi bena bamona kwati Lesa alibataluka sana. Balisumina ati e ko aba lelo tabamwishiba bwino. Nga ca kuti mwalisumina ati Lesa e ko aba, bushe kuti mwa-asuka shani aya mepusho yali pe samba?

1. Bushe Lesa alasangwa fye konse?

2. Bushe Lesa alikwata ishina?

3. Bushe Yesu e Lesa Wa Maka Yonse?

4. Bushe Lesa alansakamana?

5. Bushe Lesa alitemwa imipepele yonse?

Nga mwaipusha abantu ifi fipusho, bakamwasuka ifyalekanalekana. Kanshi teti tupape ifi kwaba ifisambilisho fya kupanga fye ne fya bufi ifyo abantu basambilisha pali Lesa.

Ico Ifyasuko Fyacindamina

Ilyo Yesu Kristu alelanshanya no mwanakashi uwasumine muli Lesa uo asangile pa cishima, Yesu atile calicindama sana ukwishiba icine pali Lesa. Uyu mwanakashi, uwali umwina Samaria, alisumine ukuti Yesu ali ni kasesema. Lelo pali cimo icamusakamike. Uko uyu mwanakashi alepepa te ko Yesu alepepa. Ilyo umwanakashi alandile pa fyo bapusene mu mipepele, Yesu alimwebele ukwabula ukupita mu mbali ati: “Imwe mupepa ico mushaishiba.” (Yohane 4:19-22)  Kanshi Yesu alishibe ukuti te bantu bonse abaya ku mapepo abaishiba bwino Lesa.

Bushe filya Yesu alandile ninshi calola mu kuti takuli uwingeshiba bwino Lesa? Awe. Yesu aebele uyu mwanakashi ati: “Bakapepa bene bene bakapepela Tata mu mupashi na mu cine, pantu Tata afwaya aba musango yu balemupepa.” (Yohane 4:23) Bushe na imwe mwaba pa bapepela Lesa “mu mupashi na mu cine”?

Nacicindama sana ukwishiba ifyo mwingasuka ici cipusho. Mulandu nshi? Yesu alandile ukuti calicindama sana ukwishiba icishinka ilyo apepele ati: “Pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.” (Yohane 17:3) Ca cine, pa kuti mukekale umuyayaya ku ntanshi kano mwaishiba icine pali Lesa!

Bushe umuntu kuti aishiba icine pali Lesa? Ee kuti aishiba! Nomba bushe kuti mwaishiba shani icine? Yesu ailondolwele ati: “Nine nshila ne cine no mweo. Takuli uwisa kuli Tata kano aishila muli ine.” (Yohane 14:6) Kabili atile: “Takuli uwaishiba ifyo Wishi aba kano Umwana, na untu Umwana afwaya ukusokolwela.”—Luka 10:22.

Kanshi ifyo Yesu Kristu, Umwana wa kwa Lesa, alesambilisha e fingatwafwa ukwishiba Lesa. Na kuba, Yesu atulaile ati: “Nga mwaikalilila mu fyo nsosa, ninshi ca cine muli basambi bandi, kabili mukeshiba icine, ne cine cikamulenga ukuba abantungwa.”—Yohane 8:31, 32.

Bushe Yesu kuti ayasuka shani yalya amepusho yasano ayo twipwishe pa kubalilapo?

[Icikope pe bula 4]

Bushe mupepa Lesa uo mushaishiba bwino?