Abena Myanmar Abapuswike Icikuuku ca Mwela Balibafwile

PA 2 May mu 2008, kwapitile icikuuku ca mwela icikalamba mu Myanmar icaonawile ifintu kabili pa milabasa ya mu fyalo ifingi balilandile pali ici cikuuku. Batile abantu nalimo 140,000 e bafwile nelyo abashamoneke ilyo ici cimwela capitile mu citungu wa Irrawaddy Delta.

Icapapwishe ca kuti tapali nangu umo pa Nte sha kwa Yehova uwacenekwe muli iyi ncende. Icikalamba icalengele ca kuti ilyo ici cimwela caishile, baNte baileuba mu Mayanda yabo aya Bufumu ayakuulwa bwino nga nshi. Mu ncende imo, baNte 20 e lyo na bekala mushi bambi 80 baikele pa mutenge wa Ng’anda ya Bufumu pa ma-awala 9 ilyo amenshi yalefulilako fye ukufika ku mamita 5. Tapali nangu umo pali aba uwafwile. Lelo ica bulanda ca kuti, abantu 300 muli uyu mushi balifwile. Mu mishi iingi Amayanda ya Bufumu fye e yashaonaike.

Ilyo papitile inshiku shibili, aba ku maofeshi ya Nte sha kwa Yehova mu Yangon batumine aba kuya-afwilisha aba mu cilonganino caba mu Bothingone. Batwele ku Bothingone umupunga, amenshi, amakandulo, ne fintu fimbi kabili pa kuti bafike uku bapitile mu ncende ishaonaike, bapuswike kwempe ku bapupu, kabili balesanga ne fitumbi ifyabola. Pali bonse abaileko mu kwafwilisha abantu, baNte e babalilepo ukufika. Ilyo bapeele baNte bali kulya ifintu, balilandile na bo ifya mu Baibolo pa kuti babakoseleshe kabili balibapeele amaBaibolo e lyo ne fitabo filanda pali Baibolo, pantu ifipe fyabo fyonse fyalyonaike.

Ifyacitile baNte abaculile pa mulandu wa ici cikuuku fyali ifisuma icine cine. Nte umo uwa mu citungu ca Irrawaddy umwapitile ici cimwela atile: “Ifintu fyesu fyonse nafyonaika: amayanda,  ifyo twalimine, e lyo na menshi ya kunwa na yo nayakowela pa mulandu wa mulamba. Lelo, baNte tabasakamene nge fyo abantu bambi basakamene. Bacetekele Yehova no kuteyanya kwakwe. Tukakonka fyonse ifyo bakatweba, nampo nga bakatila twikale muno mwine mu mushi nelyo tuye kumbi.”

Ibumba lya baNte 30, abo ifipe fyaonaike, baleimba inyimbo sha Bufumu ne nsansa ilyo bale-enda ulwendo lwa ma-awala 10 ukuya ukwali aba kubapeela ifya kulya, ifya kufwala, no mwa kwikala. Ilyo bashilafika uko baleya, baumfwile ukuti kwali ukulongana kukalamba ukwa Nte sha kwa Yehova mu musumba wali mupepi. E ico batile bali no kusangwa kuli uku kulongana intanshi pa kuti basansamushiwe muli Baibolo no kwampana na Bena Kristu banabo.

Muli iyi ncende, amayanda ya Nte sha kwa Yehova 35 yalyonaike sana, amayanda 125 yalyonaikeko panono, e lyo Amayanda ya Bufumu 8 na yo yalyonaikeko panono. Icawemeko ca kuti amaofeshi ya Nte sha kwa Yehova tayaonaike sana.

Ilyo ici cimwela capitile fye, tapali nangu umo uwalefuma nangu ukuya ku maofeshi ya Nte sha kwa Yehova pantu ifimuti ifikulu fyaliwile no kucilika imisebo yali mupepi. Ilyo papitile fye ama-awala ayanono apo icikuuku capwilile, abantu ukucila 30 ababombela pa maofeshi ya Nte sha kwa Yehova batendeke ukubombela pamo na balefumya ifimuti mu musebo. Ilyo balebomba, abantu baimine fye baletamba, balepapa no kupapa. Mukwai tapapitile ne nshita, kwaishile ibumba lya baNte banamayo abaletele ifya kunwa ne fisabo ifya kupeela abalebomba umulimo na bena mupalamano, kabili abantu balipapile sana ilyo bamwene ifi. Ilyo kalemba wa lyashi umo amwene ifyalecitika, aipwishe ati, “Bushe aba bantu abalebomba bwino ifi ni bani?” Ilyo bamulondolwelele, atile, “Abantu bonse nga balebombela pamo nge fyo Inte sha kwa Yehova bacita, nga caliwama sana!”

BaNte bwangu bwangu bapangile amabumba yabili aya kwafwilisha abantu abapuswike. Kwali abantu abengi abaipeeleshe ukubombela pamo na ya mabumba. Mu nshiku fye ishinono, baNte abo amayanda yaonaike balibakuulile ayapya. Ilyo ibumba lyaile mu kukuulila Nte umo ing’anda, abena mupalamano balipapile nga nshi. Umwina mupalamano umo atile: “Uyu mwanakashi balemukuulila ing’anda kuli baNte banankwe. Tapali nangu umo pa baBuddha mpepa na bo uwaishile mu kungafwa. Kanshi na ine nga nalisangwike Inte ilyo anshimikile!”

Ilyo aba kukuula ne bumba lya kwafwilisha babebetele ing’anda imo mu Thanlyn iyaonaike, balipapile ilyo baNte abaleikala muli iyi ng’anda babebele ati: “Ifwe tuliko eyefilya. Ing’anda yesu tayonaike sana. Tapali ubwafya, kuti twaikala ifi fine! BaNte bamo tabakwete na mayanda. Kabiyeni mubafwe!”

Mu ncende imo iyaba mu Yangon, abantu bamo bafwaile ukuyauba mwi calici. Lelo, iciibi calikomenwe kabili tapali uwaingilemo. Abantu balikalipe sana kabili balefwaya no kupantula iciibi. Lelo, Inte sha kwa Yehova balyafwile abantu abengi ukuuba mu Mayanda ya Bufumu ilyo kwali ici cikuuku. Pa Ng’anda ya Bufumu iya mu Dala, baNte abaupana balipokelele abena mupalamano 20 abaileko ukuti boobeko. Ulucelo, aba bantu baishile mu kuuba basangile ukuti amayanda yabo yalyonaike kabili bali ne nsala. Uyu Nte umwaume asangile abaleshitisha umupunga no kushita uwa kuliisha balya bantu bonse.

Mu lupwa lumo ulwa mu Yangon, mwaliba Inte sha kwa Yehova e lyo na bapepa ku macalici yambi. Ilyo icikuuku capwile, ulupwa lonse lwapepele pamo ne Nte sha kwa Yehova ku Ng’anda ya Bufumu. Mulandu nshi? Umo uwa muli ulu lupwa atile: “Aba ku calici ku mwesu batile bali no kwisa tumona icikuuku nga capwa, nomba tabaishile. BaNte fye e baishile. Mwalitupeele umupunga na menshi.  Tamwaba nga aya macalici yambi!” Aba muli ulu lupwa abashali Inte sha kwa Yehova balitemenwe sana ifyo basambilile mu Ulupungu lwa kwa Kalinda ulwaleti “Yehova Alomfwa Inkuuta Yesu” kabili baleasukapo no kwasukapo.

Umwanakashi umo uwalesambilila Baibolo ne Nte sha kwa Yehova aishile mu kulongana ilyo papitile umulungu umo apo ici cimwela capwilile. Pa kulongana, kwali ukubelenga kalata iyafumine ku maofeshi ya Nte sha kwa Yehova, umo balondolwele ifyacitilwe pa kwafwa abaculile no kushimika ifyacitikile abapuswike ici cikuuku. Ilyo balebelenga iyi kalata, uyu mwanakashi atendeke ukulila. Alitemenwe sana ilyo aumfwile ukuti baNte bonse balisangilwe kabili bali fye bwino. Pa numa, balimupeeleko ifya kubomfya kabili balimutanikile ne tenti mupepi ne ng’anda yakwe. Atile baNte balimusakamene sana.

Yesu atile: “Nga muletemwana, e lyo bonse bakeshiba ukuti muli basambi bandi.” (Yohane 13:35) Kabili umusambi Yakobo atile icitetekelo ca cine cimonekela ku milimo isuma. (Yakobo 2:14-17) Inte sha kwa Yehova balakonka sana aya mashiwi kabili balabombesha ukulanga uku kutemwa ilyo baleafwa abalecula.

[Amashiwi pe bula 11]

Baibolo itila icitetekelo ca cine cimonekela ku milimo isuma