Ifintu 5 Ifilingile Ukumulenga Ukutiina Lesa no Kukanatiina Abantu

UMULUMENDO umo alipapile nga nshi. Icacitike calimupeseshe amano. Alisambilile ifintu ifipya ilyo alanshenye ne Nte sha kwa Yehova shibili. Uyu muntu aleipusha umwine pa myaka iingi ico Lesa asuminishisha ukucula, lelo nomba balimwaswike bwino ukubomfya Baibolo. Taishibe ukuti mu Baibolo mwaliba amashiwi ya musango yu ayacindama kabili ayasansamusha.

Mukwai tapapitile ne nshita ukutula apo abalendo bakwe bailile, banakulubantu abo alesonkelako ing’anda baishilepunka fye iciibi no kwingila mu mwakwe no kumwipusha bukali bukali ati, “Bushe balya abacisa ni bani?”

Uyu mulumendo alipapile ica kuti alifililwe no kwasuka.

Aba banakulubantu baishilemupatila abati, “Nimbeshiba kabili nga baisapo pano na kabili, ninshi ukafumepo ukuyefwayako ing’anda kumbi!”

E fyo bapamine iciibi no kuya baya.

Abasambi ba kwa Kristu Balishiba Ukuti Abantu Kuti Babakaanya

Icacitikile uyu mulumendo cintu icicitika ilingi line. Icebo ca kwa Lesa, Baibolo, cilondolola ukutila: “Bonse abafwaisha ukwikala ukulingana na bukapepa muli Kristu Yesu bakabacusha.” (2 Timote 3:12) Abena Kristu ba cine tabatemwikwa ku bengi kabili e fyo caba ukufuma fye kale. Cinshi cabela ifi? Umutumwa Yohane aebele Abena Kristu banankwe ati: “Twalishiba ukuti  tuli ba kwa Lesa, lelo icalo conse calaala mu maka ya mubifi.” Satana Kaseebanya na kabili bamulondolola ukuti ni “nkalamo iilebuluma, iilefwaya untu ingalya.” (1 Yohane 5:19; 1 Petro 5:8) Cimo ico Satana abomfya pa kutufuupula, kutiina abantu kabili kwaba pa nshila abomfya ishibomba bwino sana.

Nangu fye ni Yesu Kristu, uwacitile ifisuma ifingi kabili uushacitilepo ulubembu, balemuseka no kumucusha. Atile: “Bampatile apabula umulandu.” (Yohane 15:25) Pa bushiku bamwipailepo, aebele abasambi bakwe ifyali no kubacitikila, ukuti: “Aba muli ici calo nga bamupata, mwishibe ukuti babalilepo ukupata ine ilyo bashilamupata. Ibukisheni amashiwi ayo namwebele, ukuti, Umusha tacila pali shikulu wakwe. Nga bacushishe ine, na imwe bakamucusha.”—Yohane 15:18, 20.

Pa mulandu wa aya mashiwi, abengi tabalefwaya ukwishibikwa ukuti baba mu kupepa kwa cine, bambi nabo tabalefwaya no kuba Bena Kristu. Baibolo itweba pa bantu bamo abalefwaya Yesu inshita imo, ukutila: “Takwali uwalelanda pali ena apabuuta pantu baletiina abaYuda.” (Yohane 7:13; 12:42) Bashimapepo baletiinya abantu ukuti onse uwatetekela Kristu bali no kumutamfya mwi sunagoge. Kanshi, ukutiina abantu kwalengele abengi ukukanaba Abena Kristu.—Imilimo 5:13.

Baibolo itweba ukuti ilyo icilonganino ca Bena Kristu capangilwe, abantu “batampile ukucusha nga nshi” aba mu cilonganino ca mu Yerusalemu. (Imilimo 8:1) Na kuba, mu calo ca Roma conse, abantu balecusha Abena Kristu. Abalashi ba mu Roma baebele umutumwa Paulo ati: “Twalishiba ukuti bonse fye balalanda ifyabipa pali iyi mipepele.” (Imilimo 28:22) Ca cine, Abena Kristu ba cine balebakanya mu ncende ishingi.

Nangu fye ni lelo, Satana alabomfya ukutiina abantu pa kuti acilikile abantu abengi ukuba abasambi ba cine aba kwa Kristu. Abantu ba cishinka abasambilila Baibolo ne Nte sha kwa Yehova balabakanya nangu ukubaseka ku sukulu, pa ncito, ku bena mupalamano, nangu ku banabo. Nalimo kuti batiina ati abantu bakaleka ukubacindika, bakabapata ku banabo, nangu ukutila bambi tabakalebafwa. Mu ncende shimo isha mu mishi, bashibulimi balatiina kuti abena mupalamano babo kuti balakaana ukubafwa ukulobolola ifisabo nangu ukucingilila ifitekwa fyabo. Lelo nangu ca kuti kwaliba amafya ya musango uyu, abantu abengi nga nshi balacetekela Lesa no kukonka ifyaba mu Cebo cakwe, nga filya Yesu Kristu alecita. Yehova alabapaala ilyo balecita ifi.

Ico Tulingile Ukutiinina Lesa, Ukucila Ukutiina Abantu

Baibolo itweba ukuti tufwile ukutiina Lesa, te kutiina umuntu iyo. Itila: “Ukuba na katiina kuli Yehova e ntendekelo ya kuba na mano.” (Amalumbo 111:10) Aka katiina ilembo lyalandapo kukanafwaya ukukalifya Lesa, uwatupangile, te kuba no mwenso iyo. Ukutiina Lesa kwendela sana pamo no kumutemwa. Nomba cinshi tulingile ukutiinina Lesa ukucila ukutiina abantu? Natulande pa fishinka fisano.

1 Yehova e Wapulamo. Yehova alikwata sana amaka ukucila abantunse. Nga tuli na katiina kuli Lesa, ninshi tulelanga ukuti tupepa Uwa Maka Yonse, kuli uyo “inko shaba nge toni lya menshi ukufuma mu ca kutapilamo amenshi.” (Esaya 40:15) Pa mulandu wa kuti Lesa e wakwatisha amaka, alikwata amaka ya kucimfya “icanso conse ico” bapangila ababa ne cishinka kuli ena. (Esaya 54:17) Kabili apo e ukapingula uulingile ukukwata umweo wa muyayaya, tatufwile ukuleka icili conse ukutucilikila ukusambilila pali ena no kucita ukufwaya kwakwe.—Ukusokolola 14:6, 7.

2 Lesa akatwafwa no kutucingilila. Pa Amapinda 29:25, Baibolo itila: “Ukututuma abantu citeyo, lelo uutetekela Yehova akacingililwa.” Ukutiina abantu citeyo pantu kuti kwatulenga ukutiina ifyo abantu balelanda no kucita ica kuti twaleka ukulanda pa fya kwa Lesa ifyo twatetekela. Lesa alitweba ukuti alikwata amaka ya kutupususha, pantu atila: “Witiina, pantu ndi na iwe. Wilasakamana, pantu nine Lesa obe. Nkakukosha. Nkakwafwa. Nkakutungilila no kuboko kwandi ukwa ku kulyo ukwa bulungami.”—Esaya 41:10.

3 Lesa alitemwa abantu abamupalama. Umutumwa Paulo alembele aya mashiwi ya kukoselesha aya kutila: “Ninshininkisha ukuti nangu ni mfwa nangu mweo nangu  ni bamalaika nangu mabuteko nangu fintu ifyabapo nangu fintu ifikesabako nangu fya maka nangu ifya pa muulu nangu ifya pa nshi nangu ifyabumbwa tafyakabe na maka ya kutupaatulako ku kutemwa kwa kwa Lesa ukwaba muli Kristu Yesu Shikulwifwe.” (Abena Roma 8:37-39) Nga tulecetekela Lesa no kumumfwila, kuti twamona ubusuma bwaba mu kutemwa kushipwa ukwa kwa uyu Lesa Uwapulamo ukucila bonse. Ala mwandini ukutemwikwa kuli Lesa lipaalo icine cine!

4 Tulatasha pali fyonse ifyo Lesa atucitila. Yehova e Kabumba wesu, uwatupeela ubumi. Na kabili, alitupeela ifyo tukabila mu bumi e lyo ne filenga ubumi ukuwama. Ca cine, e upeela ica bupe conse icisuma. (Yakobo 1:17) Davidi, umuntu wa cishinka uwaletasha pa cikuuku ca kwa Lesa, alembele ati: “Ifyo mwacita fingi, mwe Yehova Lesa wandi, imilimo yenu iyapesha amano na matontonkanyo yenu kuli ifwe na fyo fingi . . . Fyalifulisha ica kutila te kuti mfipende.”—Amalumbo 40:5.

5 Bamo abatukaanya kuti ba-aluka. Kuti mwa-afwa abamukanya pa kukanabwelela inuma lelo ukutwalilila fye ukulatiina Lesa no kumutemwa. Tontonkanyeni pa fyo cali kuli balupwa lwa kwa Yesu. Pa kubala, tabamutetekele, lelo batile: “Napena.” (Marko 3:21; Yohane 7:5) Pa numa, ilyo Yesu afwile no kubuuka, abengi pali aba balimusumine. Bamunyina ba kwa Yesu, Yakobo na Yuda, balilembeleko na Baibolo. Kwali na Sauli uwalecusha Abena Kristu, uyo nomba aishileba umutumwa Paulo. Bamo abatucusha kuti bamona ukuti twalishiba icine ca mu Baibolo nga twashipikisha no kutwalilila aba cishinka.—1 Timote 1:13.

E fyacitike kuli Aberash, umwanakashi wa ku Africa, uwalepepa kuli Lesa ukuti amwafwe ukwishiba icine. Ilyo atendeke ukusambilila Baibolo ne Nte sha kwa Yehova, balupwa lwakwe na bashimapepo balemukanya. Balupwa lwakwe bamo, abalesambilila Baibolo, bena balitiinine abantu no kuleka ukusambilila. Lelo ena apapeete Lesa ukuti amukoshe no kumwafwa ukushipa kabili alibatishiwe no kuba Inte ya kwa Yehova. Bushe ifintu fyaishileba shani? Balupwa lwakwe 8 balishipile na bo no kutendeka ukusambilila Baibolo na kabili, kabili ino nshita baleya pa ntanshi mu kusambilila Baibolo.

Kuti Mwaleka Ukutiina Abantu

Nga tamulefwaya ukulatiina abantu, mufwile ukubombesha ukukosha ukutemwa mwatemwa Lesa. Kuti mwacita ifi nga mulesambilila Baibolo no kutontonkanya pa malembo pamo nga AbaHebere 13:6, apatila: “Yehova e kaafwa wandi; nshakatiine. Cinshi ico umuntu engancita?” Mwilalaba umulandu cawamina ukutiina Lesa ukucila ukutiina abantu.

E lyo muleibukisha no kuti mukapaalwa nga nshi nga mulekonka ifyo mwasambilila muli Baibolo. Kuti mwasanga ifyasuko fisuma ku mepusho yacindama ayo mwakwata. Kuti mwaba na mano ayengamwafwa ukwishiba ifya kucita nga mwakwata amafya. Nangu ca kuti ifintu nafibipa nga nshi pali ino nshita, kuti mwakwata isubilo ilisuma. Kabili kuti mwapepa kuli Lesa wa maka yonse pa nshita iili yonse.

Umutumwa Yohane alembele ati: “Icalo cileya pamo no lunkumbwa lwa ciko, lelo uucita ukufwaya kwa kwa Lesa akekalilila umuyayaya.” (1 Yohane 2:17) Ino e nshita ya kuba uwashipa no kulatiina Lesa. Ukucila ukutiina abantu, kuti mwasalapo ukucita ifi Lesa atweba ati: “We mwana wandi, ube na mano, kabili ulenge umutima wandi ukusekelela, pa kuti njasuke uulenseebanya.” (Amapinda 27:11) Ala mwandini ili lishuko icine cine!

Muleibukisha ukuti tapali umuntunse uwingamupeela ico Lesa akapeela ku bamutiina: “Icilambu ca kuiceefya no kutiina Yehova fyuma no bukata no mweo.”—Amapinda 22:4.

[Icikope pe bula 14]

Pa mulandu wa kuti Aberash alishipile, balupwa lwakwe 8 balitwalilila ukusambilila Baibolo