Ino E Nshita ya Kusalapo

“Lesa abumbile umuntu mu cipasho cakwe, mu cipasho cakwe e mo amubumbiile; umwaume no mwanakashi e fyo ababumbile.”—Ukutendeka 1:27.

AYA mashiwi ayaishibikwa sana ayaba fye ku ntendekelo ya Baibolo yatweba icintu cimo icaba pa fyacindamisha sana ifyo Lesa ‘acita ifyayemba kabili ifyo acitile pa nshita yalinga.’ Ico Lesa acitile ca kutila apangile abantunse babili aba kubalilapo, Adamu na Efa, abali abapwililika. (Lukala Milandu 3:11) Apo Yehova Lesa e wa babumbile, abebele ukutila: “Fyaleni, fuleni, kumaneni pe sonde no kulimapo, kabili muleteka isabi lya muli bemba ne fipupuka mu lwelele na fyonse ifya mweo ifikulika pe sonde.”—Ukutendeka 1:28.

Mu mashiwi Lesa alandile kuli balya bantu ba ntanshi, alilondolwele ubufwayo bwakwe. Balingile ukufyalana no kulasakamana isonde no kulisangusha lyonse ukuba paradaise pa kuti baleikalamo pamo na bana babo. Takwali inshita yatantikilwe libela ukuti e yo bali no kwikala pa calo nelyo ukufwa. Lelo Lesa alibalaile ifintu ifisuma sana. Nga ca kuti basalile ukumfwila Lesa no kutwalilila ukumfwana nankwe, nga balikeele umutende ne nsansa umuyayaya.

Nomba bena tabasalile bwino iyo, e ico baletelele abantunse bonse, pantu batampile  ukulakota no kufwa. Na kuba umuntu waliko kale sana Yobo atile: “Umuntu uwafyalwa ku mwanakashi, ubumi bwakwe bwipi kabili bwaisulamo amacushi.” (Yobo 14:1) Nomba ni pi patampiile ubu bwafya?

Baibolo ilondolola ukutila: “Filya ulubembu lwaingilile mu muntu umo pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.” (Abena Roma 5:12) Uyu “muntu umo,” ukwabula no kutwishika ni Adamu, uwapulile mwi funde lya kwa Lesa ku mufulo fye nangu ca kutila Lesa alimulondolwelele bwino bwino. (Ukutendeka 2:17) Ifyo Adamu asalilepo ukucita, fyalengele ukuti apanye ishuko lya kwikala umuyayaya muli paradaise pano calo. Aletelele na bana aishilefyala bonse, pantu nabo bene tabakwete ili shuko, kabili alibambukishe no lubembu ne mfwa. Kwena apa pene e po fyonse fyaonaikile. Lelo bushe ifintu tafyakawame ku ntanshi?

Ilyo Ifintu Fikawama

Ilyo papitile imyaka iingi nga nshi, uwaimbile amalumbo umo ilyo atungulwilwe no mupashi aimbile ati: “Abalungama e bakekala mu calo, kabili bakekalamo umuyayaya.” (Amalumbo 37:29) Pa kutila tushininkishe ukuti ubu bulayo Lesa alaile mu Edeni bukafikilishiwa nangu cibe shani, Icebo ca kwa Lesa cilalondolola bwino sana ifyo akacita nomba line ukuti: “Akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.” Lyena Lesa umwine atila: “Moneni! Ndelenga ifintu fyonse ukuba ifipya.”—Ukusokolola 21:4, 5.

Apo icintu conse calikwata inshita ya ciko, icipusho twingepusha ca kutila, Ni lilali ifintu fikawama, pa kuti ubulayo bwa kwa Lesa bukafikilishiwe? Inte sha kwa Yehova, abalemba ino magazini, balesha na maka ukulashimikila abantu no kubeba ukuti inshita tufikilepo e ilya Baibolo itila “inshiku sha kulekelesha” kabili ne nshita ya kuti Lesa ‘alenge ifintu fyonse ukuba ifipya’ naipalama nga nshi. (2 Timote 3:1) Tulemukoselesha ukusambilila Baibolo pa kuti mwishibe ifyo ifintu fikawama ku ntanshi. Kabili tulemukoselesha no kuti: “Fwayeni Yehova, mwe bantu, ilyo engasangwa. Lilileni kuli ena ilyo acili mupepi.” (Esaya 55:6) Kanshi mwilamona kwati ifilemucitikila mu bumi fyalitantikilwa lileba iyo, nga mulefwaya ukwikala umuyayaya ku ntanshi, mwe bene mufwile ukucitapo cimo!

[Amashiwi pe bula 8]

“Moneni! Ndelenga ifintu fyonse ukuba ifipya”