Aba ku Vatican Balefwaya Ukulesha Abantu Ukubomfya Ishina lya kwa Lesa

ABATUNGULULA Icalici lya ba Katolika balefwaya ukulesha abantu ukulabomfya ishina lya kwa Lesa ilyo balepepa mu calici. Uyu mwaka wapwile, ababa mu cipani ico beta ati Vatican Congregation for Divine Worship and the Discipline of the Sacraments batumine ulupapulo lwa mafunde yalelanda pali ili lyashi kuli bashikofu ba mu Katolika abakumene mu fyalo fyonse pano isonde ku kulanshanya fimo fimo. Na kuba Papa e wabebele ukuti bacite ifi.

Ulu lupapulo lwa mafunde ulwalembelwe pa 29 June mu 2008, lulasuusha sana ifunde lya mu calici ilya kukanafwaya ukulashimbula ishina lya kwa Lesa. Lutila nangu ca kuti balitukonkomesha ukukanabomfya ishina lya kwa Lesa, “muli ino myaka kwaliba umusango umo uwatendeka uwa kuti tufwile ukwishiba ifya kushimbula ishina lya cine ilya kwa Lesa wa bena Israele, uo twaishiba ukuti e Lesa wa mushilo uo ishina lyakwe lyalelembwa ne filembo fine ifya ciHebere ifyalemoneka muli uyu musango יהוה, e kutila YHWH.” Ulu lupapulo lwatile ishina lya kwa Lesa ilingi line balelilemba ati “Yahweh,” “Yahwè,” “Jahweh,” “Jahwè,” “Jave,” “Yehovah,” e lyo ne nshila na shimbi. * Nomba aba ku Vatican bena balefwaya ukusanga inshila ya kushimbwilamo ukulingana no lutambi lwe calici lya Katolika. Ne yo nshila balefwaya, ya kuti pe shina ilya filembo fine YHWH bakalepyanikapo ishiwi lya kuti “Shikulu.” Na kuba mu mapepo ya lukuta lwa ba Katolika, mu nyimbo, na mu masali, “tababomfya ishina lya kwa Lesa ilya YHWH kabili tabalishimbula.”

Pa kutungilila ico balelandapo, aba ku Vatican balembele mu lupapulo lwabo ukuti ifi filomfwana no lutambi lwe Calici lya Katolika. Ulu lupapulo lwatile nangu fye ni muli Baibolo iyo beta ati Septuagint iyo bapilibwile ukufuma ciHebere ukutwala mu ciGriki ninshi no buKristu tabulatampa, ishina lya kwa Lesa ilingi line balelilemba ati Kyʹri·os, ishiwi lya ciGriki ilyalola mu kuti “Shikulu.” E ico ulu lupapulo lwa mafunde lwatile, kanshi “Abena Kristu nabo bene ukutula fye na ku kale, tabaleshimbula ishina lya kwa Lesa ilyakwete ifilembo fine.” Nomba ifi balandile, filanga fye ukuti balisuula ubushininkisho ubwaishibikwa sana ubwa mu malembo. Na kuba Baibolo ya Septuagint tayakwata ishiwi lya kuti Kyʹri·os, lelo mwaba ishina lya kwa Lesa ilya filembo fine ilyo balelemba muli iyi nshila יהוה. Abasambi ba kwa Kristu aba kubalilapo balishibe ishina lya kwa Lesa kabili balelishimbula. Na Yesu wine alandile mwi pepo apepele kuli Wishi ukutila: “Nalenga beshibe ishina lyenu.” (Yohane 17:26) Nangu fye ni lilya ipepo aletulanga ifya kupepa, atusambilishe ukuti tufwile ukulapepa ati: “Shifwe wa mu muulu, ishina lyenu libe ilya mushilo.”​—Mateo 6:9.

E ico kanshi Abena Kristu bonse balingile ukufwaisha ukuti ishina lya kwa Lesa libe ilya mushilo. Ifi aba ku Vatican bafwaya ukuti baleshe abantu ukulabomfya ishina lya kwa Lesa tafipeela umucinshi kuli Yehova, umwine uwalandile ukuti: “Ili e shina lyandi ndi na lyo pe, lintu ne nkulo ishikesa ku ntanshi shakulankuutilamo.”—Ukufuma 3:15, Diocese of Mbala.

[Futunoti]

[Amashiwi pe bula 30]

“Ili e shina lyandi ndi na lyo pe.”—Ukufuma 3:15, Diocese of Mbala

[Icikope pe bula 30]

Baibolo ya Septuagint iyalembelwe mu nshiku sha batumwa. Ishina lya kwa Lesa ni lyo bashingulwishepo, lilemoneka mu filembo fine ifya ciHebere ifyo bapilibula ati YHWH

[Abatusuminishe]

Courtesy of the Egypt Exploration Society