Wishi wa Bana ba Nshiwa
Palameni Kuli Lesa
Wishi wa Bana ba Nshiwa
WISHI wa bana ba nshiwa . . . ni Lesa mu bwikalo bwakwe ubwa mushilo.” (Amalumbo 68:5) Aya mashiwi ya kwa Lesa yatusambilisha icintu icisuma sana pali Yehova Lesa icitupalamika kuli ena, ne ci ca kuti alamona ubucushi abalanda bapitamo. Mu Mafunde apeele abena Israele, alilangile bwino ukuti alasakamana abana ba nshiwa. Lekeni tumone apo Baibolo yabalilapo ukulanda pa “mwana wa nshiwa,” pa Ukufuma 22:22-24.
Lesa asokele ati: “Mwilacusha . . . umwana wa nshiwa.” (Icikomo 22) Aya tayali fye mashiwi ya kupapaata abantu ukuti baleafwilisha abana ba nshiwa; lyali lifunde lya kwa Lesa. Calyangwike sana ukucusha umwana uwafwililwe bawishi, abalemucingilila no kumusakamana. Takwali nangu umo uwalingile ‘ukulacusha’ umwana wa musango yo. Ukucusha umwana wa nshiwa wali mulandu uukalamba kuli Lesa. Bushe Lesa alemona shani abalecusha abana ba nshiwa?
Mwi Funde apeele abena Israele, atile: “Nga mwamucusha, na o alilila kuli ine, ukuumfwa nkomfwa ukulila kwakwe.” (Icikomo 23) Kanshi cila muntu e lyo no luko lonse balingile ukukonka ili ifunde lya kwa Lesa. Yehova alemona; alekutika ku bana ba nshiwa, kabili ali-ipekenye ukucitapo cimo ilyo balilila kuli ena ukuti abafwe.—Amalumbo 10:14; Amapinda 23:10, 11.
Cinshi cali no kucitikila umuntu uwacusha umwana wa nshiwa e lyo uyo mwana alilila kuli Lesa? Yehova atile: “Ubukali bwandi bukema, kabili nkamwipaila ku lupanga.” (Icikomo 24) Icitabo cimo icilanda pa fya mu Baibolo catila aya mashiwi “mu ciHebere yaba ati ‘umona wandi ukakaba,’ kabili iyi ni nsoselo iipilibula ukuti umuntu nakalipa icine cine.” Nga mwamona, Yehova tatile abalepingula imilandu mu Israele e bali no kupingula uwacusha umwana wa nshiwa. Lesa umwine e wali no kupingula abalecusha umwana wa nshiwa umulanda.—Amalango 10:17, 18.
Yehova ta-aluka. (Malaki 3:6) Alomfwila uluse abana abafwilwa umufyashi umo nangu bonse babili. (Yakobo 1:27) Kanshi muleibukisha ukuti Wishi wa bana ba nshiwa alakalipa nga ca kuti abantu balecusha abana bakaele. Abacusha abana banshiwa tabakapusuke “ubukali bwa kwa Yehova ubulepya ngo mulilo.” (Sefania 2:2) Abantu babipa aba musango yu bakamona ukuti “ca kutiinya ukuwila mu minwe ya kwa Lesa wa mweo.”—AbaHebere 10:31.