Ababelenga Ino Magazini Balepusha Ukuti

Bushe Bonse Abondapa mu Cipesha Amano ni Lesa Uubapeela Amaka?

Kwena te kuti tutwishike ukuti Yehova Lesa alikwata amaka ya kundapa. Kabili kuti apeela na bamupepa amaka ya kundapa. Mu nshita ya batumwa, ukundapa e ca bupe cimo icafumine ku mupashi wakwe uwa mushilo. Umutumwa Paulo alembele ati: “Umupashi umonekela mu muntu umo umo pa kuti ciwamine bonse. Awe umuntu umo umupashi wamupeela amashiwi ya mano, . . . umbi wamupeela ica bupe ca kuposha, . . . umbi na o wamupeela ica bupe ca kusesema, . . . umbi na o wamupeela ica bupe ca kulanda indimi shapusanapusana.”—1 Abena Korinti 12:4-11.

Lelo, muli kalata imo ine iyo Paulo alembeele abena Korinti, alembele no kuti ifya bupe fya kucita ifipesha amano ifya mupashi wa mushilo uwa kwa Lesa fyali no kupwa. Atile: “Nangu kube ica bupe ca kusesema, nangu ica kulandila mu ndimi, nangu ica bupe ca kwishiba ifintu mu cipesha amano, fyonse ifi fikapwa.”—1 Abena Korinti 13:18.

Yesu Kristu na batumwa bakwe baleundapa mu cipesha amano ilyo bali pano calo. Pali ilya nshita ilyo icilonganino ca Bena Kristu capangilwe fye, ifya bupe fya mupashi, apali no kundapa, fyabeleleko ukuti Lesa acindikwe kabili fyalelanga ukuti Yehova alitemenwe icilonganino ca Bena Kristu icapangilwe kabili alecipaala. Lelo ilyo icilonganino cakosele, tacali no kwishibikilwa ku fya bupe fyaibela lelo ifyali no kulanga ukuti Lesa alitemenwe ici cilonganino mibele ya bantu pamo nga icitetekelo, isubilo, no kutemwa. (Yohane 13:35; 1 Abena Korinti 13:13) E ico mupepi na 100 C.E., Lesa alilekele ukupeela abantu amaka ya kundapa mu cipesha amano nge ca kubalangilako ukuti alibatemwa. *

Nomba nalimo kuti mwaipusha ati, ‘Nge fi tumfwa ukuti bamo bacili balondapa mu cipesha amano?’ Ilyashi lyali mu nyunshipepala imo lyalandile pa muntu uo batile alilwele ubulwele bwa kansa. Alikwete fimumena mu mutwe, mu mfyo, e lyo na mu mafupa. Calemoneka fye ­kwati ali no kufwa. Lelo bushiku bumo, umwine atile alilandile na Lesa. Iyi nyunshipepala yatile, ilyo papitile fye inshiku ishinono iyi kansa yalipwile.

Nga mwaumfwa ilyashi lya musango yu kuti cawama ukuipusha ati: ‘Bushe ili lyashi lya cine? Bushe kwaliba ifili fyonse ifilanga ukuti ili ilyashi lya cine? E lyo nga ca cine umuntu aundapwa muli iyi nshila, bushe Baibolo isambilisha ukuti Lesa e undapa bonse abapola mu cipesha amano?’

Icasuko ku cipusho calekeleshako nacicindama sana. Yesu asokele abasambi bakwe ati: “Cenjeleni kuli bakasesema ba bufi . . . Abengi muli bulya bushiku bakatila kuli ine, ‘Mwe Shikulu, mwe Shikulu, bushe tatwasesemene mwi shina lyenu, no kufumisha ifibanda mwi shina lyenu, no kucitila ifipesha amano ifingi mwi shina lyenu?’ Lelo nkabebelapo nkatila: Nshatalile imwishiba! Fumeni apa, mwe bampulamafunde mwe.”—Mateo 7:15, 21-23.

Kanshi abondapa abantu mu cipesha amano kuti bafumya amaka na kumbi, te kuli Lesa fye iyo. Pa kuti balya abatila bondapila mwi shina lya kwa Lesa tabatubepele, tufwile ukusambilila icine pali Lesa, ukubomfya amano Lesa atupeela, no kusambilila ifya kwishiba abacita ukufwaya kwakwe.—Mateo 7:16-19; Yohane 17:3; Abena Roma 12:1, 2.

[Futunoti]