Palameni Kuli Lesa

Alishiba Apapela Amaka Yesu

Ubwina Lebi 5:2-11

UMWANAKASHI umo alandile pa fyo ale-esha ukucita icawama mu menso ya kwa Lesa atile: “Nalebombesha sana, nomba nalemona kwati tapali ifyo nalecita.” Bushe Yehova Lesa alatemwa nga ca kuti abamupepa balebomba apapela amaka yabo? Bushe aleshiba ukuti ifyo baba ne fyo balepitamo kuti fyalenga bafilwa ukulacita fimo? Pa kuti twasuke ifi ifipusho, kuti cawama ukumona ifyo balanda mu Mafunde ya kwa Mose pa mituulo imo imo, iyaba pa Ubwina Lebi 5:2-11.

Muli aya Mafunde, Lesa aebele abena Israele ukulatuula amalambo, nangu imituulo iyalekanalekana, iya kufuuta imembu shabo. Pa Ubwina Lebi 5:1-11, palanda pa membu isho umuntu acitile ukwabula ukwishiba. (Ifikomo 2-4) Ilyo aishiba ulubembu lwakwe, ali no kuyebelela no kutuula umutuulo wa pa mulandu, no yu mutuulo wali “mwana wa mpaanga umukota nangu umwana wa mbushi umukota.” (Ifikomo 5, 6) Nomba nga ca kuti ali mupiina kabili takwete umwana wa mpaanga nangu imbushi ya kutuula, bushe ali no kucita shani? Bushe mu Mafunde batile ali no kwashima iyo nama ica kuti ena ashala mu nkongole? Bushe alingile ukubomba mpaka asanga indalama sha kushitamo inama ica kuti no lubembu lwakwe lwakana ukwelelwa bwangu?

Amafunde yalangile ukuti Yehova alalangulukilako nga nshi ilyo yatile: “Nomba nga takwete impaanga, akalete kuli Yehova ifipele fibili atemwa utwana twa nkunda tubili ku kuba umutuulo wakwe uwa pa mulandu pa lubembu ulo abembwike.” (Icikomo 7) Nga ca kuti umwina Israele ali umupiina sana ica kuti afilwa no kushita impaanga, Lesa alepokelela ico uyu muntu engakumanisha, e kuti utwana twa nkunda tubili nangu ifipele fibili.

Nomba nga ca kuti uyu muntu te kuti akumanishe no kushita ifyuni fibili, bushe ali no kucita shani? Amafunde yatile: “Akalete ulupe lwa buunga ubwapeleka [amakapu 8 nangu 9] ku kuba umutuulo wakwe uwa pa lubembu.” (Icikomo 11) Yehova alilangulukileko sana abapiina abashakwete inama ne fyuni fya kutuula ica kuti alibasuminishe no kulatuula ubunga. * Mu Israele, nangu umuntu mupiina, na o wine alekwata ishuko lya kwelelwa imembu kabili aleba cibusa wa kwa Lesa.

Cinshi tulesambilila pali Yehova kuli ili ifunde lya kutuula imituulo ya pa mulandu? Twasambilila ukutila Yehova ni Lesa uulangulukila kabili uwaishiba apapela amaka ya bamupepa. (Amalumbo 103:14) Afwaya tumupalame no kuba abanankwe nangu ca kuti natukwata amafya pamo nga ubukote, ukulwalilila, umulimo wa kusunga ulupwa, e lyo na mafya yambi. Ukwishiba ukuti Yehova Lesa alatemwa nga twabomba apapelele amaka yesu kulatusansamusha sana.

[Futunoti]