Ndatasha Nangu ca Kuti Nalikwata Amafya—Ifyo Baibolo Yangafwile Ukushipikisha

Abashimika ili lyashi ni ba Enrique CAravaca Acosta

Pa 15 April mu 1971, naleya mu kutandalila ulupwa lwandi ku farmu yesu. Apo kale nafumineko, nalefwaisha ukumonana na bonse. Nshaishibe nga nali no kubasanga bonse pa ng’anda e lyo nshaishibe na bo nali no kubalilapo ukumona. Ilyo nafikile pa ng’anda, nalipeshiwe amano, nasangile abantu bane ukubikako na bamayo, nababepaya!

ICI calimponeshe pa musao. Cinshi cacitike? Nshaishibe ne ca kucita. Tapali abantu nangu bamo, kabili nalipelenganishiwe e lyo na maka yalipwile. Ilyo nshilatwalilila ne li lyashi, lekeni mushimikileko panono pa fyo nakulile. E lyo mwalaishiba bwino ifyo naumfwile pali ubu ubwafya e lyo na mafya yambi.

Twasambilila Icine

Nafyalilwe mu Quirimán, mupepi ne tauni lya Nicoya, mu calo ca Costa Rica. Mu 1953, ilyo nali ne myaka 37, naleikala na bafyashi bandi pa farmu yesu. Nangu ca kuti twakuliile mu Katolika, tatwatemenwe fimo ifyo balesambilisha kabili twalikwete ifipusho ifingi ifyo tushaishibe ifyasuko.

Bushiku bumo ulucelo, umwaume umo, Anatolio Alfaro, aishile ku mwesu kabili atukoseleshe ukulasambilila Baibolo. Alitubelengele amalembo ayengi no kutwebako fimo ifyo Baibolo isambilisha. Ine, batata, bamayo, ndume nandi, nkashi yandi, no munankwe uo twaleikala nankwe, bonse twalikele no kulakutika ku fyo alelanda. Twalanshenye akasuba konse ukufika ubushiku sana. Twali ne fipusho ifingi.

Anatolio aleele ku mwesu kabili no bushiku bwakonkelepo twali nankwe. Twalitemenwe sana ifyo twaumfwile kabili twalitemenwe icine cine ilyo ayaswike ifipusho twakwete ukubomfya Baibolo. Ifyo twalanshenye fyalitwafwile nga nshi. Twalitontonkenye pa fyo twasambilile, kabili twalishibe ukuti natusanga icine. Anatolio alitushilile magazini ne fitabo ifyalelanda pa fya mu Baibolo. Icungulo, twaleikala pamo ku kubelenga no kusambilila ifi fitabo na magazini. Ukusambilila kwaleafya pantu tatwakwete amalaiti. Ilyo tushilatampa ukusambilila, bonse twalebuula amasaka twalebikamo ifyumbu no kuifimba ku molu pa kuti bamung’wing’wi belatusuma.

Ilyo papitile imyeshi 6, ine, abafyashi bandi e lyo na bambi babili mu lupwa lwesu twalibatishiwe. Twalitemenwe sana kabili twatendeke ukushimikila ku ng’anda ne ng’anda pa kuti tule-ebako bambi ifyo twasambilile. Twale-enda ama-awala yabili pa makasa kabili limo twalenina pali bakabalwe pa kuya kwi tauni baleita ati  Carrillo pa kuti tuyelongana ne Nte sha kwa Yehova abali kulya. Anatolio alitwalilile ukwisa ku mwesu pa kuti aletusambilisha Baibolo. Lyena twatendeke ukulalonganina pa mwesu, kabili kwalesangwa abantu nalimo 8. Umuya inshiku bonse balibatishiwe. Ili bumba lyalikulile no kupanga icilonganino umwali abantu nalimo 20.

Natendeka Ukubomba Umulimo wa kwa Lesa Lyonse

Mu kuya kwa nshita, aba pa maofeshi ya Nte sha kwa Yehova aya mu Costa Rica bakoseleshe abalefwaya ukulabomba umulimo wa kushimikila inshita yonse ukuti batendekeko. Mu 1957 nalitendeke uyu mulimo wa kulashimikila inshita yonse. Uyu mulimo waliweme nga nshi. Ilingi nale-enda fye neka pa ma-awala ayengi pa kuti nshimikileko abantu abaleikala mu mishi. Limo abantu tabalefwaya ukubashimikila. Ndebukisha imiku itatu ilyo abaume bamo bantiinishe ne fyanso, balefwaya ukwishiba ifyo nakonkele kuli ilya ncende.

Mu ma 1950, utushila twa tondo e twafulile kabili twalepita mu matololo, e lyo caleafya ukusanga abantu. Pa kuti tuye ku ncende shimo, twalenina pali bakabalwe. Twaleabuka imimana kabili limo twalelala fye pa nse. Ala kwali bamung’wing’wi icipesha amano! Kabili twaleba abacenjela sana pantu kuli iyi ncende kwali sana insoka ne ng’wena. Lelo, naletemwa sana ukwafwa abantu ukusambilila pali Yehova Lesa. Nga nabwelelamo ku mwesu, naletemwa kabili naleumfwa bwino pa mulandu wa kwebako bambi icine ca mu Baibolo. Ilyo naleshimikila no kusambilila Baibolo cila bushiku, naletemenwako Yehova Lesa, kabili nalepalama sana kuli ena.

Umuya inshiku, nalipeelwe umulimo na umbi. Pa myaka ukucila 10, nali kangalila uwaletandalila ifilonganino fyapusanapusana no kukoselesha aba bwananyina, cila mulungu naletandalilapo icilonganino cimo. Nangu ca kuti nalilekele ukubomba uyu mulimo pa mulandu wa kulwalilila, nalitwalilile ukubomba umulimo wa kushimikila, ukulabombela Lesa lyonse.

Kwacitika Amasanso

Ilyo nali ku Nicoya mu 1971, nalibwelelemo pa kuti njetandalila ulupwa lwandi. Ilyo nafikile, nasangile bamayo abali ne myaka 80 nabalala pa nshi. Balibapikile imfuti no kubalasa umwele. Ilyo nabemishe, namwene ukuti bacili balepeema, lelo ilyo papitile inshita, balifwile ninshi nimbekata. Ilyo naloleshe, namwene umwanakashi uo baingishe incito ya kubepikila na o nalaala pa nshi, ali ne fumo lya myeshi 8. Na o alifwile. Nasangile na umo uwalelongana na bamayo na o nafwa, e lyo no mwana wa mwanakashi uwaleipikila bamayo ifya kulya na o namusangile nabamwipaya mu muputule wa kusambilamo. Bonse balibalashile umwele bubi bubi no kubapika imfuti. Bushe ni bani bacitile icintu cabipa ifi, kabili cinshi bacitile ifi?

Ilyo nafumine pa nse, nasangile batata. Balibapikile imfuti mu mutwe lelo tabafwile!  Nabutukile ku ng’anda ya mwaice wandi umwaume, iyali apa kwenda nalimo amamineti 15 ukufuma pa mwesu, kabili kulya na ko nasangile ukuti umwanakashi umbi no mwana wakwe na bo nababepaya. Calimpeseshe amano ilyo naishibe ukuti uwaipeye aba bantu bonse mwipwa wandi uwali ne myaka 17 uushali Inte ya kwa Yehova kabili ali uwafulungana! Alibutwike no kubutuka. Bakapokola ba ku Costa Rica batendeke ukumufwaya kabili uyu e muku wa kubalilapo babombeshe muli uyu musango.

Ili e lyashi fye balelandapo pa milabasa na mu manyunshipepala mu Costa Rica monse. Ilyo papitile inshiku 7, bakapokola balisangile uyu mulumendo, kabili alikwete umwele uukalamba ne mfuti iyo umuntu umo amushitishe nangu ca kuti alishibe ukuti ali uwafulungana. Uyu mwipwa wandi balimupikile imfuti no kumwipaya ilyo balefwaya ukumwikata.

Ilyo balemufwaya, abengi banjebele ukuti mfume kuli iyi ncende pantu baletiina ukuti umwipwa wandi kuti abwela no kunsansa icabipisha. Nalipepelepo pa fyo banjebele pantu nalefwaya ukuba na balupwa lwandi abashele e lyo na ba mu cilonganino. E fyo naikele kuli ilya ncende.

Ukuponenwa na Macushi Yalekanalekana

Ica bulanda ca kuti batata baikele fye umwaka umo no kufwa bafwa. Umwaka wakonkelepo, nkashi yandi, uwali umubomfi wa cishinka uwa kwa Yehova Lesa, balimwipeye ku muntu fye umbi. Na kabili balupwa lwandi bonse balipeshiwe amano pa kufwilwa umuntu na umbi. Te kuti nondolole ubulanda twakwete pamo ne fibusa fyesu. Ilyo fyonse ifi fyalecitika, naleshintilila pali Yehova kabili lyonse nalemulomba ukuti alenkosha.

Mu 1985, nasangilwe kwi sukulu lya nshiku shitatu ilya baeluda mu musumba ukalamba, uwa San José. Ilyo twapwishishe ili isukulu, nalitemenwe nga nshi ica kuti na bucibusa bwandi na Lesa bwalikoseleko. Pali Cimo ulucelo, naimine ubulendo na basi ukubwelelamo ku ng’anda. Ilyo naleya ku citesheni, nalisanshilwe ku fipondo, ifyankamine pa mukoshi no kunjibila. Fyonse ifi fyalicitike bwangu sana ica kuti nshamwene ne fyo abansanshile balemoneka pa menso. Ifi bankamine pa mukoshi calenga ndefilwa ukubilikisha pa kulanda nge fyo abena Costa Rica bacita. Muno mu Guanacaste, abaume balabilikisha pa kulanda nga bakumana na lintu baleposhanya nangu pa kwishibisha bambi ukuti bafika. Ilyo bashilansansa, nalebilikisha sana, lelo pa numa ya kunsansa, nalefilwa.

Mu 1979, naupile Celia, Nte wali mu cilonganino cali mupepi. Celia alitemenwe Baibolo. Twalebelenga no kusambilila Baibolo pamo cila bushiku. Ica bulanda ca kuti alifwile ku bulwele bwa kansa mu July 2001. Limo, ndatalalilwa, lelo isubilo lya kubuuka lilankosha.—Yohane 5:28, 29.

Naliba uwa Nsansa Nangu ca Kuti Ndapita mu Mesho

Nangu ca kuti naliponenwa na macushi ayengi ukucila abantu bamo, mona aya mesho ukuti ni nshila ya kulangilamo icitetekelo nakwata ne fyo naba ne cishinka kuli Yehova. (Yakobo 1:13) Pa kuti nilaumfwa ububi sana pa fincitikila, lyonse ndebukisha ukuti “inshita ya macushi ne nshita ya fintu fyabula ukwenekela” ilatufikila bonse. (Lukala Milandu 9:11) E lyo kabili ndebukisha no kuti shino ni “nshiku sha kulekelesha . . . ishayafya nga nshi,” pantu abantu muno calo bankalwe, ba lubuli, kabili tabailama. (2 Timote 3:1-5) Kabili  ndebukisha ifyacitikiile Yobo. Nangu ca kuti Yobo aliculile sana, alifwililwe abana, alilwele, kabili alilufishe ifipe fyonse, atile: “Libe ilyapaalwa ishina lya kwa Yehova.” Kabili Yehova alipaalile Yobo nga nshi pa mulandu wa cishinka cakwe. (Yobo 1:13-22; 42:12-15) Ifi fyonse ifyalembwa muli Baibolo filangafwa ukutwalilila ukuba uwa nsansa nangu ca kuti ndapita mu mesho ayengi.

Yehova lyonse alatwalilila ukungafwa kabili lyonse e o mbika pa ntanshi mu bumi bwandi. Ukubelenga Baibolo lyonse kulansansamusha nga nshi kabili kulankosha pa kuti nshipikishe. Nga napepa kuli Yehova, ndaba no “mutende wa kwa Lesa uwacila amatontonkanyo yonse.” (Abena Filipi 4:6, 7) Ici cilanenga ukukanacula na matontonkanyo. Ukusangwa mu kulongana kwa Bena Kristu no kwasukapo na ko kulakosha icitetekelo candi.—AbaHebere 10:24, 25.

Nangu ca kuti nomba ninkota, ndatasha Yehova pantu ncili na maka ya kubomba na Bena Kristu banandi, ukusambilisha bambi Baibolo, no kubombako umulimo wa kushimikila. Ukwafwa bambi muli uyu musango kulampeela amaka ya kushipikisha. Ndatasha sana Yehova ukufuma pa nshita ya mutima nangu ca kuti amacushi ayengi yalamponena. *

[Futunoti]

[Amashiwi pe bula 20]

Ukubelenga Baibolo lyonse kulansansamusha nga nshi kabili kulankosha pa kuti nshipikishe

[Icikope pe bula 19]

Kale sana ilyo natampile fye ukupeela amalyashi ya Baibolo

[Icikope pe bula 20]

Ilyo nali umulumendo, ninshi ndeshimikila