Fundeni Abana Benu

Umwipwa wa kwa Paulo—Alimupuswishe

BUSHE walishiba ukutila umutumwa Paulo alikwete balupwa abali Abena Kristu? *—Nkashi yakwe no mwana wakwe umwaume bafwile bali Bena Kristu. Kabili uyu mwipwa wa kwa Paulo alimupuswishe! Kwena, tatwaishiba ishina lya uyu mulumendo ne lya banyina, lelo ifyo acitile fyena twalifishiba. Bushe kuti watemwa ukwishiba ifyo acitile?—

Paulo e lyo fye abwelele pa lwendo lwakwe ulwa kushimikila ulwalenga butatu, kabili iyi nshita ali mu Yerusalemu. Ifi fyacitike nalimo mu mwaka wa 56 C.E. Paulo balimwikete kabili bali no kumulubulwisha. Nomba abalwani ba kwa Paulo tabalefwaya ukutila bamulubulwishe. Bena balefwaya fye ukumwipaya! E ico bapekenye ukutila abaume 40 bakamubelamine pa nshila pa kuti bakamusanse no kumwipaya.

Katwishi ne fyo cali, umwipwa wa kwa Paulo alishileishiba aya mapange. Bushe walishiba ifyo acitile?— Aile kuli Paulo no kumweba ifyo abantu bamupangiile. Apo pene fye Paulo na o aebele umushilika umo ukutila: “Twala uyu mulumendo ku mukalamba wa bashilika, pantu pali ifyo alefwaya ukumweba.” Awe umushilika atwele ulya mulumendo ku mukalamba wa bashilika, Klaudi Lusia, no kumulondolwela ukutila umulumendo ali ne lyashi lyacindama ilyo alefwaya ukumweba. E fyo Klaudi asendele ulya mulumendo pa mbali, kabili na o alimulondolwelele fyonse.

Klaudi asokele umwipwa wa kwa Paulo ukuti: “Te ca kwesha ukwebako umuntu nangu umo ukuti naunjebako ifi fintu.” Lyena aitile abashilika babili no kubeba ukutila basende abashilika 200, na ba pali bakabalwe 70, e lyo na basenda imifwi 200 ukuti baye ku Kaisarea. Ilyo inshita yafikile 9 koloko ya bushiku, abashilika 470 baimine ubulendo no kuyafisha Paulo bwino bwino kuli Felikisi, Umulashi wa buteko bwa bena Roma uwali mu Kaisarea. Muli kalata alembele kuli Felikisi, Klaudi alilondolwele ifyo abalwani ba kwa Paulo balefwaya ukumwipaya.

Kanshi abaYuda nomba bali fye no kuya ku cilye ca milandu icali mu Kaisarea pa kuti bashinine Paulo. Lelo kwena tabakwete ifishinka fya kumushinina. Nomba nangu ca kuti Paulo tacitile umulandu uuli onse, balimukakile mu cifungo  pa myaka ibili. E ico atwele umulandu ku cilye cikalamba icali ku Roma, kabili kulya kwine eko bamutwele.—Imilimo 23:16–24:27; 25:8-12.

Cinshi twingasambilila ku fyacitile umwipwa wa kwa Paulo?— Twasambililako ukutila tufwile ukushipa no kusokolola ificitike, nga twacite fyo kuti twapususha abantu. Nangu fye ni Yesu wine, ilyo aishibe ukutila abalwani bakwe “balefwaya ukumwipaya,” alitwalilile ukulashimikila abantu pa Bufumu bwa kwa Lesa. Yesu atweba ukuti e fyo tufwile ukulacita. Bushe e fyo twakulacita? E fyo twakulacita nga ca kutila twashipa nga filya fyashipile umwipwa wa kwa Paulo.—Yohane 7:1; 15:13; Mateo 24:14; 28:18-20.

Paulo akoseleshe Timote cibusa wakwe umulumendo ukuti: “Lyonse uleisakamana we mwine, ulesakamana ne fyo ulesambilisha. Ikalilila muli ifi fintu, pantu nga wacita ifyo ukaipususha we mwine na balekumfwa.” (1 Timote 4:16) Ukwabula no kutwishika, umwipwa wa kwa Paulo alinonkelemo mu fyo banalume balemukoselesha. Bushe na imwe mukacita cimo cine?

[Futunoti]

Amepusho:

○ Bushe ni bani bali balupwa wa kwa Paulo, kabili finshi twasambilila pali aba bantu?

○ Cinshi umwipwa wa kwa Paulo acitile pa kuti apusushe Paulo?

○ Cinshi twingacita nga tulefwaya ukumfwila ifyo Yesu atweba, ifingalenga abantu ukupusuka muno nshiku?