Baibolo Ilaalula Abantu

Cinshi calengele ukuti umwanakashi uwapatile sana ifya mapepo nomba alepoosa inshita yakwe iikalamba ukwafwa bambi ukusambilila pali Lesa? Cinshi calengele umwaume uwatemenwe sana ifyangalo fya lubuli ukutemwa umutende? Bushe umwaume uwalebomfya sana imiti ikola, uwalenwa sana ubwalwa no kulapumaula fye abantu aishilealuka shani? Belengeni no kumfwa ifyo abene balaisosela.

ILYASHI LYA KUBALILAPO

ISHINA: PENELOPE TOPLICESCU

IMYAKA: 40

ICALO: AUSTRALIA

IFYO BALI: BALIPATILE SANA IFYA MAPEPO

INKULILO YANDI: Nafyalilwe ku Sydney, mu calo ca Australia, lelo ilyo nali fye ne myaka ibili, ulupwa lwandi lwakuukile ku New Guinea. Imyaka mupepi na ibili twaleikala mu musumba wa Rabaul e lyo pa myaka 8 twaikele mu musumba wa Bougainville. Muli shilya nshiku, mu New Guinea tamwali TV, kanshi ilingi line ine na ndume yandi twalepoosa inshita ikalamba ukowa no kwangala fye mu mpanga.

Ilyo nali ne myaka nalimo 10, natampile ukutemwa ifya mapepo. Bamayo balepepa ku Katolika, kanshi bankoseleshe ukulasangwa ku mafundisho ayo mama umo uwa mu Katolika alefundisha. E fyo naishileba Katolika no kubatishiwa ninshi ndi fye ne myaka 10.

Lelo ilyo twabwelele ku Australia, ninshi nomba ndi mukashana, natampile ukutwishika ifyo nasuminemo ku calici. Ilyo nali kwi sukulu lya ku sekondari, nasambilile ilyashi lya kale, kanshi ine na batata ilingi twaleikala pa nshi no kulanshanya pa nshita iikalamba pa fyo imipepele yatendeke na pali fimo fimo ifyo twaletwishika muli Baibolo. Nasukile nakaana buKatolika.

Abafyashi bandi balipaatukene ilyo nali ne myaka 16. Bamayo baliculile sana pa kutusunga ica kuti nasukile nakuukila kuli batata abaleikala na nkobekela wabo. Ndume yandi ena ashele na Bamayo, kabili bakuukile ku ncende imbi. Nalitalalilwe nga nshi pali iyi nshita. Palipitile imyaka ibili pa kuti fye tutampe ukumfwana bwino bwino na kabili na bamayo. Natampile ukunwa sana, ukubomfya imiti ikola, no kusangwa mu fiila. Nalilekele isukulu, naingile incito no konaula ubwaice bwandi muli bucisenene.

 Ilyo nali ne myaka 25, natampile ukutontonkanya pali Baibolo na kabili. Naingile incito imbi apo nasangile Liene, umukashana umusuma uwali no mucinshi sana ku bakulu ba ncito, nangu ca kuti abakulu ba ncito tabaali bwino. Ilyo namwipwishe umulandu ashalefulilwa abakulu ba ncito nga balemucusha, atile alesambilila Baibolo ne Nte sha kwa Yehova kabili ale-esha ukukonka ifyo Baibolo isambilisha. Liene anjebele ukuti tulesambilila nankwe Baibolo. Ine naleti kusambilila fye iawala limo ninshi naishiba na fyonse ifyo aishibe. Bulya bushiku, Liene apoosele ama-awala yatatu aleasuka fye amepusho yandi ukubomfya Baibolo. Nalitemenwe ukumona ukuti pa kwasuka ifipusho fyonse alebelenga amalembo muli Baibolo.

Ilyo nalebwelelamo ku ng’anda bulya bushiku pa numa ya kulanshanya na Liene umutima walikalipe sana pantu Lesa tanengele ukwishiba bwangu icine pali ena. Nalishibe ukuti baNte bantu abashicita ifyabipa, kanshi nalemona kwati ine nalyonaika sana ica kuti te kuti mbe nga bena. Cimbi na co ico naletiina ni filya baya ku ng’anda ne ng’anda baleshimikila. Nalitwalilile ukusambilila Baibolo na baNte, lelo ico nalefwaya kusangamo ifilubo mu fyo balesambilisha pa kuti ningasanga umulandu wa kulekela ukusambilila na bo. Nasukile naishiba ukuti nshakabalensangamo icilubo nangu cimo.

IFYO BAIBOLO YA-ALWILE UBUMI BWANDI: Ifingi sana ifyo nalesambilila muli Baibolo ifyo umuntu musuma afwile ukuba fyalecusha sana kampingu yandi. Pa kuti kampingu ilancusha sana, nalekele ukubomfya imiti ikola. Lelo naishilefumapo panono no kuya ku calo cimbi no kutampa ukusangwa mu fiila na kabili no kunwa sana. Calemoneka kwati lyonse nga naesha ukulunduluka pa kuti ndekonka ifilanda Baibolo, nalefilwa no kubwelela ku mibele yandi iyabipa. Nalepepa kuli Yehova ninshi ndi ne nsoni sana, lelo natwalilile fye ukumfwa ububi.

Ilyo nasambilile ilyashi lya Mfumu Davidi na Bati-sheba ne fyo Yehova ababelele uluse, nalyumfwile bwino. Davidi aali uwashipa no kusumina ifilubo fyakwe ukwabula ukuilungamika. Kabili mu kuicefya alisumine ilyo bamusalapwile. (2 Samwele 12:1-13) Lyonse nga nafilwa ukucita icalungama, naletontonkanya pali lilya lyashi kabili caleng’angukila ukweba Yehova ukuti ndi no bulanda. Nasukile natampa ukulapepa ilyo nshilalufyanya ukucila ukupepa lilya nalufyanya, kabili ici calingafwile nga nshi.

IFYO NANONKELAMO: Ilingi nalefulwa bwangu. Lelo ilembo lya Abena Efese 4:29-31 lyalingafwile ukuleka “icipyu no bukali no kootoka.” Ilyo naleibikilishako pa kuti nilafulwa bwangu, imilandile yandi na yo yalewaminako. Ukufunda kwa kwa Yesu ukwa ‘kuleka Ee wenu abe Ee’ na ko kwalingafwile ukupampamina fye pa fyo napingwilepo ukucita.—Mateo 5:37.

Bamayo, abo pa kubalilapo balenkaanya ukusambilila na baNte, mu kuya kwa nshita banjebele ukuti baleumfwa bwino sana ifyo nali. Banjebele no kuti, “Ninjishiba ukuti icilengele ukuti ube bwino ifi te kutila nalikukusha bwino lelo mulandu wa fyo wasambilila pali Yehova.” Nalyumfwile bwino sana ilyo basosele ifi.

Pali ino nshita ubumi bwandi bwaliba bwino sana. Imyaka 9 iyapitapo, ine na balume bandi twalibomba umulimo wa nshita yonse uwa kusambilisha abantu Baibolo. Ndaya mu kushimikila ku ng’anda ne ng’anda, kabili imona ukuti takwaba umulimo umbi uo nabombapo uwawama ngo yu.

ILYASHI LYA BUBILI

ISHINA: DENIS BUSIGIN

IMYAKA: 30

ICALO: RUSSIA

IFYO BALI: BATEMENWE UBWANGALO BWA KARATE

 INKULILO YANDI: Nafyalilwe mu musumba wa Perm’ nomba nakuulile mu Furmanov, mu musumba umwaba abantu nalimo 40,000 mu citungu ca Ivanovo, ku Russia. Furmanov musumba uusuma nga nshi umwaba ifimuti ifisuma ifibalula amaluba ya mutuntula na yakashika. Muli ba 1980 na ba 1990, mu musumba mwalifulile sana intalamisoka. Indalama ulupwa lwesu lwaleliilamo shali fye ishinono. Naleikala na bafyashi bandi no mwaice wandi mu ng’anda iyakwete fye umuputule wa kusendamamo umo, kanshi yali inono icine cine.

Ilyo nali ne myaka 7, natampile ukusambilila karate. Nalitemenwe sana ubu bwangalo; e bo naletontonkanyapo fye lyonse. Akashita konse ako nashukila naleya uko basambilisha karate, kanshi abanandi bonse ni balya bene twaleba na bo ku fyangalo. Ilyo nali ne myaka 15, nacimfishe ulubuli umo bampeele umushipi uukulu uwakashika, e lyo umwaka wakonkelepo napeelwe umushipi uwafiitulukila. Nali mwi bumba lya karate ilyaile mu kucimfyanya ku kulwila ifikombe mu Russia, ku Europe na ku Asia. Camoneke kwati nali no kufika apatali, lelo ilyo fye nali ne myaka 17, ubumi bwandi bwalyalwike.

Bushiku bumo ilyo nali na banandi twalicitile umulandu uukulu kabili balitwikete. Bankakile imyaka ibili. Ifintu fyalyafishe mu cifungo. Lelo ilyo nali mu cifungo e lyo namwene Baibolo pa muku wa kubalilapo. Nalibelengele Ukutendeka, Amalumbo, ne Cipangano Cipya. Naswatiile fye ne pepo lya We Shifwe kabili lyonse nalepepa ili ipepo pa kulaala, naleti limbi kuti namona umo cabela.

Nafumine mu cifungo mu mwaka wa 2000, lelo nshaishibe ifya kucita mu bumi. Natampile ukubomfya imiti ikola. Iyi yali e nshita bamayo bafwile. Nalibatemenwe nga nshi, kanshi ubulanda bwalinkuliile. Lelo nalisukile naleka ukubomfya imiti ikola no kutampa ukusambilila karate na kabili. Nakuukiile ku musumba wa Ivanovo. E ko natampile ukubomba mwi tuuka baleshitisha ifya kulya. Umukalamba we tuuka aali ni Nte ya kwa Yehova. Alinondolweleleko fimo fimo ifyo Baibolo isambilisha no kupekanya ukuti Nte umbi alesambilila na ine Baibolo lyonse.

IFYO BAIBOLO YA-ALWILE UBUMI BWANDI: Ilyo nalesambilila Baibolo, nalyumfwile bwino sana ilyo nasambilile ukuti Lesa afwaya ukulenga lino isonde ukuba paradaise, kanshi nalefwaya ukulacita ifinganenga ukwisaikala muli iyi paradaise. Bwangu bwangu nasangile ukuti kwaliba ififwaikwa ifyo Yehova Lesa afwaya abantu ukukonka. Lyonse naletontonkanya fye pa fyandi. Lelo nasambilile ukuti Yehova alefwaya ine ukulatontonkanya pali bambi no kuba ne mibele iyo nshakwete pali iyo nshita—imibele pamo nga icikuuku no kutemwa umutende.

Ilyo natendeke ukutontonkanya sana pali fyonse ifyo Yehova ancitiile, pamo nga ukumpeela Umwana wakwe ukuti andubule ku membu shandi, nalefwaya ukutasha pali uku kutemwa kwa kwa Lesa, e calengele ukwaluka mu bumi. Ku ca kumwenako, nasambilile pa  Amalumbo 11:5 ukuti Yehova alipata ubunkalwe. E ico nalekele ukutamba amaprogramu ya pa TV umo balanga ubunkalwe no lupato. Nasukile naleka ifyangalo fya lubuli nangu ca kuti ukucite ifi kwalyafishe sana. Ilembo lya 1 Abena Korinti 15:33 lyalingafwile ukumona ukuti abo ndeangala na bo kuti banenga ukucita ifisuma nangu ifyabipa. Filya bankakilepo mu cifungo caleshininkisha fye ukuti ili lembo talyabepa. Kanshi nalekele ukwangala na balya abatemenwe ifyangalo fya lubuli.

IFYO NANONKELAMO: Ukuba pamo ne Nte sha kwa Yehova no kusambilila Baibolo kwalingafwa ukuba umufumacumi. Ku ca kumwenako, nasambilile pa AbaHebere 13:5 ukuti mfwile ukuteka umutima ku fyo nkwete no kutaluka ku kutemwa indalama. Ukukonka ifilanda ili lembo kwalingafwa ukukanabepa no kukanaiba.

Lyonse nalitemwa ukuba ne fibusa. Inshita imo nalimonapo ifibusa fyapusana pa mulandu no bufunushi nangu umwenso. Inte sha kwa Yehova tabapwililika, lelo nasanga ukuti balicindika sana ifyo Lesa afwaya kabili balesha sana ukukonka ukufunda kwakwe mu fyo bacita kuli bambi. Pali nomba nalikwata ifibusa fya cine abali ni Nte sha kwa Yehova.

Nkanasambilila ukulaumfwila ifyaba mu Baibolo katwishi ifyo nali no kuba. Nalimo nga nalibwelela mu cifungo nangu nga ndacusha abantu bambi no kubakalifya. Lelo pali ino nshita nalyupa umukashi umusuma uo twafyala nankwe abana babili, kabili ifwe bonse ngo lupwa tulasanga sana insansa ilyo tuleafwa bambi ukusambilila icine pali Lesa.

ILYASHI LYA BUTATU

ISHINA: JOSÉ CARLOS PEREIRA DA SILVA

IMYAKA: 31

ICALO: BRAZIL

IFYO BALI: BALI SANA ABA LUBULI

INKULILO YANDI: Nakulile mwi komboni lya ku Americana, São Paulo. Tatwakwete amenshi ayasuma nangu ifimbusu. Uko twaleikala kwaleba sana ulubuli kabili abantu bali abankalwe.

Nalekula fye uwasashila kabili uwa lubuli. Lyonse nalesangwa mu mbuli, kanshi abena mupalamano balentiina sana. Ifya kufwala fyandi ne fyo fye nalemoneka fyalelanga ukuti nali icipondo. Nalenwa sana, mpaka naleka no kwishiba icilecitika. Nalebomfya imiti ikola nga filya fine abakalamba bandi balecita, umukalamba wandi umo afwile pa numa ya kunwa imiti ikola iingi.

IFYO BAIBOLO YA-ALWILE UBUMI BWANDI: Ilyo nakumene ne Nte sha kwa Yehova, banangile muli Baibolo ukuti Lesa akalenga isonde lyonse ukuba paradaise. (Luka 23:42, 43; Ukusokolola 21:3, 4) Nasambilile no kuti abafwa bantu abashaishiba akantu nangu kamo, kanshi Lesa toca abantu babipa mu mulilo. (Lukala Milandu 9:5, 6) Ici canengele ukumfwa bwino sana. Ifyo nasambilile pali Lesa fyanengele ukufwaisha ukwalula ubumi bwandi. Lelo tacayangwike ukwaluka, ukuleka ukubomfya imiti ikola, ukunwa, ulubuli, ne nsele isho naletukana fye umo ndefwaila.

 Lelo icankoseleshe sana mashiwi ya mutumwa Paulo ayalembwa pali 1 Abena Korinti 6:9-11. Ili lembo lilanga ukuti Abena Kristu ba kubalilapo bamo pa nshita imo balecitako ifyabipa fimo fimo ifyo nalecita. Lelo ili lembo lilundako no kuti: “Imwe bamo e fyo mwali. Lelo mwalisambwa, kabili mwalisangululwa, no kulungamikilwa mwi shina lya kwa Shikulwifwe Yesu Kristu na mu mupashi wa kwa Lesa wesu.” Ayo mashiwi yanengele ukusubila ukuti na ine kuti na-aluka no kutendeka ukusekesha Lesa.

Ilyo natampile ukusambilila ne Nte sha kwa Yehova, nalisumine ukuti ukupepa kwabo kwa cine. Balishibe ukuti nali umunkalwe, uwa lubuli, lelo na lyo line balimpokelele bwino bwino mu kutemwa.

IFYO NANONKELAMO: Nkanasambilila Baibolo no kwalula ubumi bwandi, ino nshita nga nalifwa. Lelo naliba ne nsansa pa kwafwa umukalamba wandi umo ukusambilila Baibolo no kuleka ukubomfya imiti ikola iyamutekele imfine. Kabili nalikoselesha na balupwa bambi ukutampa ukusambilila Baibolo. Cimbi na co icandetela insansa ca kuti nali-ipeela ukulabombela Lesa, uutusunga bwino nga nshi!

[Amashiwi pe bula 24]

‘Natampile ukulapepa ilyo nshilalufyanya ukucila ukupepa lilya nalufyanya, kabili ici calingafwile nga nshi’