Bushe Ifyalembwa mu Baibolo Kuti Twafyumfwikisha?

“Pa Sande lyonse, twalebelenga Baibolo ulupwa lonse. Nshaleipakisha sana ukubelenga Baibolo. Nalicetekele ukuti Baibolo Cebo ca kwa Lesa, lelo ifingi ifyo nalebelenga nalefilwa ukufyumfwikisha.”—E fyasosele ba, Steven aba ku Britain.

“Ilyo nali ne myaka 17, nalyesesheko ukulabelenga Baibolo. Nshaleumfwa ifyo nalebelenga, e calengele ukuti ndeke ukuibelenga.”—E fyasosele ba, Valvanera aba ku Spain.

“Nalibelengelepo Baibolo umuku umo pantu nalemona ukuti apo nine Katolika, mfwile ukuibelenga. Papitile imyaka itatu pa kuti fye mpwishe ukuibelenga! Lelo tapali nangu fimo ifyo naumfwilemo.”—E fyasosele ba, Jo-Anne aba ku Australia.

ABANTU abengi muno calo balitemwa Baibolo. Baibolo e buuku ilyo bashita sana pa mabuuku yonse, abengi balikwata Baibolo kabili yaba mu ndimi ishingi. Kabili ino nshita bali-ibika na pa matepu, pa ma CD na pa ma DVD. Nomba nangu cabe fi, abengi abakwata Baibolo tabomfwikisha ifyalembwamo. Bushe na imwe e fyo caba?

Bushe Lesa Alafwaya Ukuti Twishibe Icebo Cakwe?

Baibolo itila: “Amalembo yonse aya mushilo yafuma kuli Lesa.” (2 Timote 3:16) Ca cine, Yehova Lesa e watupeela Baibolo. Bushe Lesa alafwaya ukuti twishibe ifyaba mu Cebo cakwe? Nelyo bushe afwaya ukuti abantu abanono pamo nga bashimapepo na basambilila sana ebo fye baleumfwikisha ifyaba mu Baibolo?

Moneni ifyo amalembo yakonkapo ayafumine muli Baibolo ine yalandapo:

“Ili ifunde ndemweba lelo talikosele sana kuli imwe ukulikonka, kabili talili ukutali.”—Amalango 30:11.

“Ilyo ifyebo fyenu fyasokololwa fipeela ulubuuto, filenga abashaishibisha bailuka.”—Amalumbo 119:130.

“Muli ilya ine nshita [Yesu] alisekelele nga nshi mu mupashi wa mushilo no kusosa ati: ‘Ndemulumbanya pa cintubwingi, mwe Tata, Shikulu wa muulu ne sonde, pantu mwalifishilisha ifi fintu ku ba mano na bacenjela, no kufisokolwela ku tunya.’”—Luka 10:21.

Kanshi, Lesa uwatupeela Baibolo alafwaya ukuti twishibe ifyaba mu Cebo cakwe! Nomba nangu cibe fyo, abantu abengi batila ici citabo calyafya ukumfwa. Finshi fingabafwa ukumfwikisha Baibolo? Ifipande fyakonkapo filelanda pa fintu fitatu ifingamwafwa ukumfwikisha Baibolo.