Bushe Imipepele Yonse Yaliba fye Bwino?

MUNO calo mwaliba amacalici ayengi icipesha mano. Abantu bamo abalefwailisha ifishinka pa mipepele mu myaka ya nomba line basangile ukuti muno calo mwaba imipepele iikalamba 19 e lyo na imbi iinono 10,000. Ifi imipepele yafula sana muno nshiku calenga abantu balesalapo fye ukwa kupepa. Nomba bushe mulandu ukupepa ukuli konse uko umuntu alefwaya?

Abantu bamo basosa ukuti imipepele yonse yaba kwati ni nshila shalekanalekana ishiya fye pa lupili lumo. Bena baishiba ukutila kuti wapita fye mu nshila iili yonse pantu yonse iya kumo kwine. Batontonkanya ukuti apo kwaba fye Lesa wa Maka Yonse umo, ninshi ne mipepele yonse ifwile fye ukulapepa uyo wine Lesa.

Bushe Imipepele Yonse Yaba Kwati ni Nshila Ishiya Kumo Kwine?

Finshi Yesu Kristu, kasambilisha waishibikwa sana mu mipepele iingi alandilepo pali ili lyashi? Aebele abasambi bakwe ukuti: “Ingileni pa mpongolo ya kamfyemfye.” Mulandu nshi alandile ifi? Pantu “impongolo yasalala, kabili inshila yapabuka itwala ku boni, kabili bengi abengilako. Lelo inshila iitwala ku mweo ya kamfyemfye kabili yalifyenenkana, kabili banono abaisanga.”—Mateo 7:13, 14.

Bushe ca cine ukuti Yesu alesosa ukuti imipepele imo itwala “ku boni”? Nelyo bushe alesambilisha ukutila ni balya fye abashasumina e benda mu nshila yapabuka, lelo balya abasumina bena baba mu nshila ya kamfyemfye iitwala ku mweo te mulandu no ko bapepa?

Ilyo fye Yesu alandile ukuti kwaba inshila shibili, alandile no kuti: ‘Cenjeleni kuli bakasesema ba bufi abesa kuli imwe abanakilila nge mpaanga, lelo mu cine cine mimbulu iyikali.’ (Mateo 7:15) Inshita imbi Yesu alandile ukuti: “Te onse uutila kuli ine, Shikulu, Shikulu, akengila mu bufumu bwa mu muulu iyo; kano uucite cifwaya Tata wa mu muulu.” (Mateo 7:21) Nga ca kutila umuntu ni kasesema  nangu atila Yesu e “Shikulu” wakwe, ninshi uyo muntu afwile ukuba mwina Lesa, te muntu uushasumina nakalya. Kanshi cailanga fye apabuuta ukuti Yesu alesoka ukuti te mipepele yonse iyawama kabili te bakasambilisha bonse twingacetekela.

Bushe Inshila ya Kamfyemfye Kuti Twaisanga?

Apo imipepele yonse taipepa Lesa umo, kuti twaishiba shani ukupepa kwa cine ukwaba kwati ni nshila ya kamfyemfye iitwala ku mweo? Natulangilile: Elenganyeni ukuti namuluba mu musumba uukalamba, e lyo mwaipusha aba kumulanga uko mulefwaya ukuya. Umuntu umo uulemona kwati alishiba bwino uko muleya amweba ukuti mulole ku kulyo. Umbi amweba ati mulungame ku kuso. E lyo umbi na o amweba ukuti mulole fye uko mwe bene mulefwaya. Pa kulekelesha, umuntu umbi uuli na o pa lwendo afumya mapu no kumulanga inshila yalungama uko mulingile ukulola. Lyena amupeela na mapu pa kuti muleloleshapo ilyo muleya. Bushe nomba te kuti mucetekele ukuti mwalafika uko muleya?

E fyo caba nga tulefwaya ukwishiba ukupepa kwa cine, tufwile ukukwata mapu ine ine iingatulanga uko tulingile ukulapepa. Bushe mapu ya musango yu e ko yaba? Ee, e ko yaba. Iyi mapu ni Baibolo, kabili itila: “Amalembo yonse yantu yapuutwamo kuli Lesa, kabili ya mulimo ku kusambilisha, ku kwebaula, ku kulungika, ku kufunda kwa mu bulungami.”—2 Timote 3:16.

Mufwile mwalikwata Baibolo mu lulimi lwenu iingamwafwa ukusanga ukupepa kwa cine. Inte sha kwa Yehova, abalemba ino magazini, balipilibula Baibolo iyo beta ati Baibolo—Amalembo ya Calo Cipya. Nomba, nga tamuli Nte ya kwa Yehova, nalimo mwalikwata Baibolo yenu, iyo ine e yo mubomfye pa kuti mwishibe ukupepa kwa cine no kwabipa. Muli cino cipande ne fipande ifikonkelepo Amalembo yafumine muli Baibolo ya Cibemba iya mu 1956, e lyo na Baibolo ya Ishiwi lya kwa Lesa—Icipangano Cipya, ayo abantu baishiba.

Ilyo mulebelenga ifipande fyakonkapo, mulelinganya ifyo mwaishiba ku fyo Baibolo isambilisha. Muleibukisha amashiwi yalandile Yesu pa fyo mwingeshiba ubupusano bwaba pa kupepa ukusuma no kubi. Atile: “Umuti onse usuma utwala ifitwalo ifisuma, umuti ubi wena utwala ifitwalo ifibi. Umuti usuma teti utwale ifitwalo ifibi, no muti ubi teti utwale ifitwalo fisuma.” (Mateo 7:17, 18) Natulande fye pa fisabo fisuma fitatu ifyo Baibolo yalanda ukuti e fya kwishibilako “umuti usuma.”

[Amashiwi pe bula 3]

Baibolo yaba kwati ni mapu iingafwa umuntu ukusanga ukupepa kwa cine