Bushe Kuti Mwa-asuka Ifi Fipusho?

Bushe bakalemba abalelwisha Yesu bali ni bani?

Ilyo Yesu aleshimikila, ilingi line alesanga bakalemba mu Yerusalemu na mu matauni ayanono na mu mishi. Bakalemba abaleikala mu Yerusalemu na mu mishi ya baYuda ku nse ya Palestine, bali balashi ba buteko, balisambilile Amafunde kabili bafwile bali na bapingushi.—Marko 2:6; 9:14; Luka 5:17-21.

Bakalemba abali mu Yerusalemu balebombela sana pamo no buteko bwa baYuda. (Mateo 16:21) Icitabo cilondolola amashiwi ya mu Baibolo ica kuti The Anchor Bible Dictionary citila, “cimoneka ukuti bakalemba balebombela pamo na bashimapepo mu kupingula abantu e lyo na mu kushininkisha ukuti abantu balekonka intambi na mafunde ya ciYuda, kabili cila bushiku balebombako ne milimo ya mu Sanhedrini.” Apo e balesambilisha sana Amafunde, bakalemba bamo bali ni bashicilye ba mu Sanhedrini, nelyo icilye icikalamba ica baYuda. Balebombela pamo na bashimapepo bakalamba na baFarise.

Ilingi line, Baibolo nga ilelanda pali bakalemba, ibalandapo ukuti bali ba mapepo abalelwisha Yesu. Lelo bamo tabalemulwisha. Ica kumwenako fye, kalemba umo aebele Yesu ukuti: “Ndemukonka konse uko muleya.” Yesu na o aebele kalemba umbi ukuti: “Tauli ukutali no bufumu bwa kwa Lesa.”—Mateo 8:19; Marko 12:28-34.

Bushe amashiwi ya kuti umuntu nasubwa yalolele mwi?

Pa nshita balelemba Baibolo, mu calo ca Israele ne fyalo fyapalamineko, abantu balesuba umuntu amafuta ukulangilila ukuti ulya muntu balimucindika sana nelyo nga mweni ninshi nabamupokelela bwino. Ilingi line balebomfya amafuta ya muolife ayanunkila. Na kabili umuntu nga asalwa ukubomba umulimo waibela, abaHebere baleitulwila amafuta pa mutwe wakwe nelyo ukumusuba. Ica kumwenako, ilyo Aarone bamusalile ukuba shimapepo mukalamba, balimwitiile amafuta pa mutwe. (Ubwina Lebi 8:12) Pa kusonta Davidi ukuba Imfumu, “Samwele abuulile ulusengo lwa mafuta no kumusuba . . . , no mupashi wa kwa Yehova watampile ukubomba pali Davidi ukutula pali bulya bushiku.”—1 Samwele 16:13.

Mu ciHebere, ishiwi ilyo babomfya ilipilibula ukusuba ni ma·shachʹ, ukwafuma ishiwi lya kuti ma·shiʹach, nelyo Mesia. Ili shiwi mu ciGriki ni khriʹo, kabili e kwafuma ishiwi lya kuti khri·stosʹ, nelyo Kristu. Kanshi Aarone na Davidi kuti baitwa no kuti mesia, nelyo uwasubwa. Mose na o aletwa ukuti kristu, nelyo uwasubwa, pantu Lesa alimusontele ukuba uwa kumwimininako.—AbaHebere 11:24-26.

Lesa umwine e wasontele Yesu wa ku Nasarete ukumupeela icifulo icikalamba. Yesu tasubilwe na mafuta lelo asubilwe no mupashi wa mushilo uwa kwa Lesa. (Mateo 3:16) Apo Yehova e wamusontele no kumusuba, kanshi kuti calinga ukumwita ati Mesia nelyo Kristu.—Luka 4:18.