Fundeni Abana Benu

Shemu Aikele mu Nkulo Shibili Ishabipa

SHEMU umwana wa kwa Noa alipuswike ilyo Lesa aonawile abantu babipa bonse mu calo, kabili aishileikala mu nkulo yakonkelepo umwali abantu babipa. Bushe walishiba icalengele ukutila Lesa onaule abantu babipa abali pano calo inshita imo ine na Shemu, e lyo ne calengele ukuti Shemu no lupwa lwakwe bena bapusuke no kwisaikala mu nkulo imbi iya bantu babipa?— * Natulande pali ili lyashi.

Baibolo itila ilyo Shemu ali umwaice, ‘abantu balicililemo ukucita ifyabipa.’ Fyonse ifyo abantu baletontonkanya fyaleba fye “ifibi inshita yonse.” Bushe nawishiba ifyo Lesa acitile?—Aletele ilyeshi ilyaonawile abantu babipa bonse. Umutumwa Petro alembele ati: “Lesa aonawile aba cilya calo ku menshi ilyo acibunshishe mu lyeshi.”—Ukutendeka 6:5; 2 Petro 3:6.

Bushe waishiba nomba icalengele ukuti Lesa onaule balya bantu?—Balya bantu bali ababipa, kabili fyonse ifyo baletontonkanyapo fyaleba fye “ifibi inshita yonse.” Yesu alilandilepo pa fyo abantu baali. Atile: “Ilyo ilyeshi lishilaisa,” abantu baleipakisha, “balelya no kunwa” e lyo “baleupa no kuupwa.” Yesu alundilepo no kuti: “Tabapooseleko amano nakalya mpaka ilyeshi lyaisa no kubasenda bonse.”—Mateo 24:37-39.

Bushe finshi ifyo balya bantu bashapooseleko amano?—Noa wishi wa kwa Shemu ‘aleshimikila abantu pa fyalungama,’ lelo abantu bonse tabapooseleko amano ku fyo aleshimikila. Noa alyumfwile ifyamwebele Lesa no kupanga icibwato, umo ena no lupwa lwakwe baali no kupusukila Ilyeshi. Abapooseleko fye amano ni Noa no mukashi wakwe, abana babo, e kutila Shemu, Hamu, na Yafete, e lyo na bakashi babo nabo bene balipoosele amano ku fyo Lesa alefwaya ukuti balecita. Lelo abashala bonse balecita fye ifyo balefwaya, e ico ilyo Ilyeshi lyaishile bonse balyonaike.—2 Petro 2:5; 1 Petro 3:20.

Ilyo papitile napamo umwaka umo ukutula apo Ilyeshi lyaishiile, Shemu no lupwa lwakwe balifumine mu cibwato ninshi no mushili walyuma no kuuma. Abantu bonse ababipa ninshi balifwa, lelo tapakokwele ifintu fyalitendeke ukubipa na kabili. Kanaani, umwana wa kwa Hamu munyina kwa Shemu acitile icabipa nga nshi ica kuti Noa atile: “Abe uwatiipwa Kanaani.” Na Nimrode uwali umwishikulu wa kwa Hamu na o ali muntu uwabipa. Alelwisha Lesa wa cine Yehova, kabili aebele abantu ukukuula ulupungu  ulutali ulo baleita ati Babele pa kuti baipangile amashina. Bushe ulemona ukuti Shemu na wishi baumfwile shani?—Ukutendeka 9:25; 10:6-10; 11:4, 5.

Balyumfwile sana ububi, e lyo na Yehova na o alyumfwile ububi. Bushe nawishiba ifyo Yehova acitile?—Afulungenye indimi sha bantu pa kuti balefilwa ukumfwana. Ici calengele abantu ukuleka ukukuula ulupungu, kabili basalanganine mu ncende shalekanalekana ukulingana ne ndimi balelanda. (Ukutendeka 11:6-9) Lelo Lesa tayalwile ululimi lwa kwa Shemu no lupwa lwakwe pantu alefwaya ukuti batwalilile ukwikala pamo no kulacincishanya ukubombela Lesa. Bushe walishiba imyaka Shemu abombeele Yehova?—

Shemu aikele pa calo imyaka 600. Aikele imyaka 98 ilyo Ilyeshi lishilaisa, kabili pa numa ya lyeshi aikele imyaka na imbi 502. Afwile alyafwilisheko Noa ukukuula icibwato no kusoka abantu ukuti kwali no kwisa Ilyeshi. Bushe uletontonkanya ukuti finshi Shemu alecita pa myaka ukucila 500 iyo aikele pa calo pa numa ya Lyeshi?—Noa alandile ukuti Yehova ni “Lesa wa kwa Shemu.” Shemu afwile alitwalilile ukubombela Yehova no kula-afwa ulupwa lwakwe ukulacita cimo cine. Mu kupita kwa nshita, mu lupwa lwa kwa Shemu e mwaishilefuma Abrahamu, Sara, na Isaki.—Ukutendeka 9:26; 11:10-31; 21:1-3.

Nomba tontonkanya pa fyo icalo cili ino nshita ukutula apo Shemu abelele pa calo, ifintu fiya filebipilako fye. Bushe nawishiba icikacitika kuli cino calo cabipa?—Baibolo itila cino calo “cileya.” Nomba umfwa ifyo Baibolo yalaya, itila: “Uucita ukufwaya kwa kwa Lesa akekalilila umuyayaya.” Kanshi nga tulecita ifyo Lesa afwaya, kuti twaisaba pa bakapusuka no kwingila mu calo cipya ica kwa Lesa. Lyena Lesa akalenga ukuti tukekale aba nsansa umuyayaya pano pene pa calo!—1 Yohane 2:17; Amalumbo 37:29; Esaya 65:17.

[Futunoti]

Amepusho:

○ Bushe ni nkulo nshi Shemu abalile ukwikalamo, kabili fintu nshi fibili ifyalengele ukuti Lesa onaule ilya nkulo?

○ Myaka inga Shemu aikele pano calo, kabili ali muntu wa musango nshi?

○ Cinshi cili no kucitikila cino calo nomba line?

○ Cinshi tulingile ukucita pa kuti tukapusuke ilyo cino calo cikonaika?