Ababelenga Ino Magazini Balepusha Ukuti

Bushe Inte sha kwa Yehova Nabo ni ba Protestanti?

Inte sha kwa Yehova te ba Protestanti. Mulandu nshi?

Ba Protestanti batendeke mu myaka ya ba 1500 C.E. ku Bulaya. Ico balefwaya, kwalulako ifintu fimo ifya mwi calici lya Katolika. Abo babalilepo ukwita ati ba “Protestanti” bantu abalekonka umuntu baleita ati Martin Luther abalongene mu musumba wa Speyer mu mwaka wa 1529. Ukutula lilya, bonse abakonka ifyo ba Protestanti basuminamo kabili abakaana ifisambilisho fimo ifya ba Katolika, na bo bene babeta ukuti ni ba Protestanti. E mulandu wine icitabo ca Merriam-Webster’s Collegiate Dictionary, cilondolwela ishiwi lya kuti Protestanti ukuti “bantu bonse abapepa mu macalici ayakaana ukuti mu calo conse Papa e wakwatisha amaka mu fya mapepo kabili abapampamina pa kukonka amafunde ya fisumino fyabo, abasumina ukuti umuntu onse kuti aba shimapepo no kuti Baibolo fye yeka e ifwile ukutweba ifyo tufwile ukulakonka.”

Nomba nangu ca kutila Inte sha kwa Yehova tabasumina ukuti Papa e wakwatisha amaka mu fya mapepo kabili balakonka sana ne fyo Baibolo isambilisha, balipusanako na macalici ya ba Protestanti mu nshila ishingi ishikalamba. Na kuba, icitabo ca The Encyclopedia of Religion cilanda ukuti Inte sha kwa Yehova bena “balipusanako.” Natulande pa nshila shitatu ishalenga bapusaneko.

Iya kubalilapo ya kutila, nangu ca kutila ba Protestanti balikaana ifisambilisho fimo ifya ba Katolika, abakalamba ba macalici ya ba Protestanti balitwalilila ukukonka ifisambilisho fimo ifya ba Katolika, pamo nge fya kutila, muli Lesa umo mwaba balesa batatu, kwaba umulilo wa pe, no kuti umweo taufwa. Nomba Inte sha kwa Yehova balishiba ukuti ifisambilisho fya musango yu fyalipusana ne fyo Baibolo isambilisha e lyo na kabili filenga abantu ukulatontonkanya ukutila Lesa mubi.—Belengeni na pa mabula 4 ukufika ku 7 muli ino ine magazini.

Ica bubili ca kutila, Inte sha kwa Yehova tabaiminina pa kukaanya ba Katolika, lelo baiminina pa kusambilisha ifintu fya cine. Balomfwila sana filya Baibolo ilanda ukuti: “Umusha wa Mfumu wena tafwile kulaumana na bantu. Afwile ukuba uwamutembo kuli bonse, kafundisha umusuma kabili uwamutekatima. Ali nokuba no mutembo mukwalulula abantu abalekaanya ifyo alebeba.” (2 Timote 2:24, 25, Baibolo ya Ishiwi lya kwa Lesa, Icipangano Cipya) Inte sha kwa Yehova balalanda pa bupusano bwa fyo Baibolo isambilisha ne fyo amacalici ayengi yasambilisha. Ico basambilishisha abantu te kufwaya ukwalula ifisambilisho fya mipepele. Lelo ico bafwaisha, kwafwa abantu abafwaya ukwishiba bwino Lesa ne Cebo cakwe Baibolo. (Abena Kolose 1:9, 10) Nga ca kutila abantu bamo abasumina mu fisambilisho fimbi bakaaninina fye ukumfwa ku fyo Baibolo isambilisha, Inte sha kwa Yehova tabafwaya ukulapaashanya na bantu ba musango uyo.—2 Timote 2:23.

Ica butatu ca kutila, Inte sha kwa Yehova tabayakanikana, balikatana mu calo conse, nomba ba Protestanti bena baba mu macalici ayalekanalekana. Kabili ba Nte bonse mu fyalo ukucila 230, basumina mu fisambilisho fimo fine pantu bakonka ifyo umutumwa Paulo alembele ukuti, “mulesosa fimo fine.” Baba “abaikatana mu mano yamo yene na mu kutontonkanya kumo kwine,” kabili pali bena tabapa malekano nakalya. (1 Abena Korinti 1:10) Bonse fye bafwaisha ukusungilila umutende no kwikatana uko umupashi upeela.—Abena Efese 4:3.