Ubufi Bwalenga Busano: Maria E Nyina Wa Kwa Lesa

Ni kwi ubu bufi bwafumine? Icitabo ca The New Encyclopædia Britannica (1988), Volyumu 16, amabula 326 na 327 citila: “Ukupepa nyina wa kwa Lesa kwakosele sana lintu . . . abasenshi abengi batendeke ukupepa. . . . Ifisumino ifyo aba basenshi baletele mwi calici lya Bena Kristu fyatendeke kale sana, fyafumine ku kabungwe ka mapepo akalepepa lesa mwanakashi uo baleita ati ‘nyinefwe mukalamba,’ kabili ‘nacisungu washila.’”

Cinshi Baibolo isambilisha? “Ukemita no kufyala umwana umwaume, kabili ukamwinike ati Yesu. Uyu akaba umukalamba kabili aketwa ati Umwana wa Wapulamo. . . . E mulandu wine uukafyalwa aketilwa uwa mushilo, Umwana wa kwa Lesa.”—Luka 1:31-35.

Ili lembo lilalanga bwino bwino ukuti Maria ali ni nyina wa “Mwana wa kwa Lesa,” te nyina wa kwa Lesa iyo. Bushe batini Maria kuti aimita Lesa uwa kuti ne ‘myulu te kuti imukumane’? (1 Ishamfumu 8:27) Maria tatalile alandapo ukuti ali ni nyina wa kwa Lesa. Icisambilisho ca kuti muli Lesa umo mwaba balesa batatu e calenga ukuti kube icimfulumfulu ca kukanaishiba bwino Maria. Ukulongana kwali mu Efese mu 431 C.E., uko balebilisha ukuti Maria ni Theotokos (ishiwi lya ciGriki ilipilibula “Uusenda Lesa”), nelyo “Nyina wa kwa Lesa,” kwalengele ukuti abantu batendeke ukulapepa Maria. Umusumba wa Efese umo aba macalici bakumanine, e mwali abengi abalepapa sana ifilubi kabili e mo balesefesha na lesa mwanakashi uwa bufyashi, Atermi pa myaka iingi.

Kanshi ifingi ifyo balecita pa kupepa icimpashanya ca kwa lesa Artemi “icaponene mu muulu,” e fyo batendeke ukucita ne lyo balepepa Maria. (Imilimo 19:35) Icintu na cimbi ico Abena Kristu batendeke ukucita mu mipepele, kubomfya ifipasho fya kwa Maria ne fya bantu bambi pa kupepa.

Belengeni na aya amalembo: Mateo 13:53-56; Marko 3:31-35; Luka 11:27, 28

ICISHINKA NI CI:

Icisambilisho ca kuti muli Lesa umo mwaba balesa batatu e calengele ukuti abantu balepepa Maria ukuti e Nyina wa kwa Lesa