Ababelenga Ino Magazini Balepusha Ukuti . . .

Mulandu nshi Lesa Apeelela Abantu Ubupe bwa Mweo wa Muyayaya?

▪ Baibolo itila Lesa alitupeela ishuko lya kuti tukakwate “umweo wa muyayaya.” (Yohane 6:40) Nomba cinshi calenga ukuti apeele abantu ubupe bwa musango yu? Bushe ni pa mulandu fye wa kuti alitemwa umulinganya?

Umuntu uwa mulinganya ni ulya uucita ifintu ifyalungama kabili ukulingana ne fyo fifwile ukuba. Bushe batini fwe bantunse twalilinga ukuba no mweo? Awe. Pantu Baibolo itila: “Pano isonde tapaba umuntu umulungami uucita icisuma lyonse kabili uushibembuka.” (Lukala Milandu 7:20) Umuntu nga abembuka, icifumamo kukandwa. Lesa asokele umuntu wa kubalilapo Adamu ukuti, ubushiku akabembuka e bushiku akafwa no kufwa. (Ukutendeka 2:17) Pa numa, umutumwa Paulo uwatungulwilwe no mupashi wa mushilo alembele ukuti: “Icilambu ca lubembu ni mfwa.” (Abena Roma 6:23) Nomba nga ca kutila abana ba kwa Adamu bonse balilinga ukufwa, mulandu nshi Lesa apeelela abantunse ubupe bwa mweo wa muyayaya?

“Ni ku luse fye” lwakwe e co Lesa atulaila umweo wa muyayaya. Ubu bupe e bulanga ukuti Lesa alitutemwa sana kabili wa cikuuku nga nshi. Baibolo itila: “Bonse babembu kabili balifilwa ukufika pa bukata bwa kwa Lesa, kabili ni ku luse fye balelungamikilwa ku cikuuku cakwe mu cilubula ca kwa Kristu Yesu.”—Abena Roma 3:23, 24.

Nangula bonse tulingile ukufwa, Lesa alafwaya ukupeela umweo wa muyayaya ku bantu abamutemwa. Bushe ifi acita mwaliba umucishacinani? Baibolo itila: “E ico tuletila shani? Bushe kuli ulufyengo kuli Lesa? Nakalya! Pantu aebele Mose ati: ‘Nkabelela uluse uo nafwaya ukubelela uluse, kabili nkabela inkumbu uo nafwaya ukubela inkumbu.’ . . . Bushe ni we nani we uletwishika Lesa?”—Abena Roma 9:14-20.

Mu fyalo fimo, umukalamba wa buteko nelyo kapingula alikwata amaka ya kufumya ntalamisoka mu cifungo uo bapingula ukulabomba incito ya cibe. Nga ca kuti ntalamisoka alekonka amafunde kabili alelanga no kuti nalapila, kapingula nelyo kateka nga alefwaya kuti amucefeshako imyaka bamupingula e lyo limbi kuti amufumya fye no kumufumya. Nga acita ifi, ninshi ni ku luse fye pantu na kuba ntalamisoka alingile ukuba mu cifungo pa myaka bamupingula.

Na Yehova wine nga alefwaya, kuti alekelela ababembu bamo nangu ca kuti balilinga ukukandwa. Pa mulandu wa kutemwa akwata, kuti apeela umweo wa muyayaya ku bantu abamutemwa kabili abakonka amafunde yakwe. Baibolo itila: “Lesa taba na kapaatulula, lelo umuntu uwa mu luko lonse uutiina Lesa no kucita icalungama alapokelelwa kuli ena.”—Imilimo 10:34, 35.

Yehova alilanga ukuti alitutemwa nga nshi pa kututumina Umwana wakwe uwaishilecula no kutufwila. Yesu alandile pali Wishi ukuti: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.”—Yohane 3:16.

Bonse abatemwa Yehova no kulacita ifyo afwaya balapokelelwa kuli Lesa, te mulandu ne fyo bapitamo. Kanshi ico Lesa atupeelela ubupe bwa mweo wa muyayaya ni pa mulandu wa cikuuku cakwe, kabili e nshila iikalamba alangilamo ukutila ni Lesa wakwata ukutemwa.

[Amashiwi pe bula 29]

Umweo wa muyayaya, e nshila ikalamba Lesa alangilamo icikuuku no kuti alitutemwa sana