Palameni Kuli Lesa

Uufikilisha Ifyo Alaya

Yoshua 23:14

BUSHE cilamukosela ukucetekela abantu? Kwena, calyafya ukucetekela abantu muno nshiku. Nga ca kuti umuntu mwacetekele alimukalifye, alimubepele nelyo tacitile ifyo mwapangene, nalimo kuti mwaleka ukumucetekela. Lelo kwaliba umuntu mwingacetekela, uushingamubepa. Amapinda 3:5 yatukoselesha ukuti “Tetekela Yehova no mutima obe onse.” Mulandu nshi Yehova alingila ukumucetekela? Pa kwasuka ici cipusho, natulande pa mashiwi Yoshua alandile, umwaume uwacetekele sana Yehova. Aya mashiwi yalembwa pali Yoshua 23:14.

Umfweni ifyo cali. Yoshua, uwapyene Mose ukutungulula abena Israele aali ne myaka mupepi na 110 pali iyi nshita. Ilyo alekula, alimweneko ifipesha amano ifingi ifyo Yehova acitiile abena Israele, ukubikako na filya abapuswishe mu cisungusho pali Bemba Wakashika. Apo cilya cipesha mano cacitikiile ninshi palipita ne myaka 60. Ilyo Yoshua atontonkenye pali ifi fyonse, aitile “abakalamba [ba mu Israele], ne ntungulushi shabo na bapingushi babo na bacilolo babo.” (Yoshua 23:2) Amashiwi abebele yali ya mano. Icalengele ukuti Yoshua abe na mano te pa mulandu fye wa kuti ali mukalamba, lelo ni co aletontonkanya na pa fyo Lesa abacitiile ifyamulengele ukuba ne citetekelo cakosa.

Yoshua abebele ukuti: “Lelo ndeya ku nshiishi ukuya aba pano isonde bonse.” Amashiwi ya kuti “ukuya aba pano isonde bonse,” ni nsoselo iipilibula ukuti ukufwa. Kanshi Yoshua alelanda fye ukuti “ndi mupepi no kufwa.” Apo Yoshua alishibe ukuti ali mupepi no kufwa, ukwabula no kutwishika, inshita iikalamba aletontonkanya pa bumi bwakwe. Mashiwi nshi aya kulekelesha alefwaya ukweba abo alepepa nabo?

Yoshua atwalilile ukubeba ati: “Tapali amashiwi nangu yamo pa mashiwi yonse ayasuma ayo Yehova amwebele ayashacitika. Fyonse fyalicitika. Tapali nangu cimo icishacitika.” Aya e mashiwi yalanda umuntu uwacetekela sana Lesa. Cinshi calengele alande muli uyu musango? Pa numa ya kutontonkanya pa fintu fyonse ifyo aimwenene na menso, Yoshua alishibe ukuti Yehova lyonse fye alafikilisha fyonse ifyo alaya. * Ico Yoshua abebele aya mashiwi ca kuti alefwaya abena Israele banankwe ukutetekela ukuti fyonse ifyo Yehova alaile fyali no kucitika nangu cikabe shani.

Icitabo cimo icilanda pa fyalembwa muli Baibolo calandile pe lembo lya kwa Yoshua 23:14, ukuti: “Landeni pa bulayo ubuli bonse ubwaba mu Baibolo; lyena fwayeni mu fyalembwa fyonse ifyaba muno calo; kabili ipusheni icibumbwa icili conse ica mu calo, mumone nga ca kuti mwalasangapo inshita imo iyo Lesa afililwe ukufikilisha ifyo alaile nelyo ukulabako ku bulayo bwakwe.” Na ifwe nga twingakwata amaka ya kufwailisha fyonse, kuti twalanda nga filya fine Yoshua alandile ukutila, fyonse ifyo Yehova alaya filafikilishiwa.—1 Ishamfumu 8:56; Esaya 55:10, 11.

Muli Baibolo mwaliba ifintu ifingi ifyo Lesa alaile ifyafikilishiwa, ne filefikilishiwa muno nshiku ifyo tuleimwena na menso. Mwaba ne fintu ifisuma ifyo Yehova atulaya ukuti fikacitika ku ntanshi. * Kuti cawama nga ca kuti mwafwailisha mwe bene no kufisanga! Nga mulesambilila Baibolo mukasumina ukuti Lesa uufikilisha ifyo alaya alilinga ukumucetekela.

[Amafutunoti]