Ifyo Imikalile ya Bena Kristu ba Kubalilapo Yali

“Abasunga Bwino Amayanda Yabo”

“Nomba ilyo baleya mu nshila, aingile mu mushi umo. Kabili umwanakashi umo ishina lyakwe Marita amupokelele mu mwakwe. Uyu mwanakashi ali ne nkashi nankwe uo beta ati Maria, lelo ena aikele ku makasa ya kwa Shikulu kabili alekutika ku mashiwi yakwe. Lelo Marita, alepitana fye alebomba imilimo iingi. E ico alishile mupepi no kusosa ati: ‘Mwe Shikulu, bushe tamusakamene ukuti nkashi nandi andekela ndebomba neka? E ico, mwebeni anjafweko.’ Na o Shikulu ayaswike ati: ‘Marita, Marita, nausakamikwa no kupamfiwa ku fintu ifingi. Lelo finono fye e filekabilwa, nelyo cimo fye. Maria ena nasala icintu icisuma, kabili tapali uukamupokolola.’”—LUKA 10:38-42.

MARITA afwile alebombesha. Ukwabula no kutwishika, abantu bafwile balimucindike sana. Ukulingana no lutambi lwa baYuda ba ku kale, umwanakashi alecindikwa sana nga ca kutila alabombesha no kusakamana aba mu lupwa lwakwe.

Abanakashi Abena Kristu mu nshita ya batumwa balebakoselesha ‘ukulasunga bwino amayanda yabo.’ (Tito 2:5) Lelo balikwete ne shuko lya kubombako imilimo na imbi pamo ngo kusambilisha bambi ifyo basuminemo. (Mateo 28:19, 20; Imilimo 2:18) Nomba ‘milimo nshi iingi’ iyo abanakashi abaYuda abaliko  mu nshita ya batumwa balebomba? Kabili cinshi twingasambilila ku mashiwi Yesu aebele Maria?

“Alebomba Imilimo Iingi” Umwanakashi umuYuda uwaupwa, ilingi line alebuuka ku macaca no kutendeka ukubomba imilimo. (Amapinda 31:15) Pa numa ya kupekanishisha ulupwa lwakwe umusunga, nacifyashi nalimo aleshindika abana bakwe abaume ku sukulu kwi sunagoge. Nomba abana banakashi bena baleshala pa ng’anda apo balefundwa imilimo yalekanalekana pa fya kusunga bwino ing’anda nga baupwa.

Nyina capamo na bana abanakashi baletendeka ukubomba imilimo ya cila bushiku iya pa ng’anda pamo nga, ukubika amafuta mu nyali (1), ukupyanga (2), ukukama umukaka ku mbushi (3). Lyena baletendeka ukupanga umukate. Intanshi abakashana baleulusha ingano (4), e lyo pa numa baleshipela ukubomfya ilibwe (5). Nyina alebuula ubunga bwa ngano abikamo amenshi ne citutumushi. Pa numa alekasa umufuba (6) no kuuleka walatutumuka. Ilyo alelolela ukuti ututumuke, aletwalilila ukubombako imilimo imbi. Ilyo banyina balebomba iyi milimo, abakashana bena baletikamika umukaka bacikama ku mbushi (7).

Ulucelo lwine, nyina na bana bakwe abakashana baleya na ku maliketi. Kabili pa maliketi palenunkila bwino. Paleba icongo ca nama shalekanalekana, ica baleshita abaleilishanya ukuti bababwesesheko imitengo. Kabili nyina aleshita ifyalekabilwa pa ng’anda pali bulya bwine fye ubushiku (8). Umusalu ne sabi ilyauma fifwile fyaleba pa fyo baleshita. E lyo nga mwanakashi Umwina Kristu e waya ku maliketi, aleshukila iyi nshita ukulanda na bantu pa cebo ca kwa Lesa.—Imilimo 17:17.

Umufyashi uwabikile amano ku fya kwa Lesa alebomfya iyi nshita baleya ku maliketi no kubweluluka ukusambilisha abana bakwe ifya mu Malembo. (Amalango 6:6, 7) Nyina alefunda abana bakwe abakashana ne fya kubomfya bwino indalama pa kushita ifintu.—Amapinda 31:14, 18.

Umulimo umbi uo abanakashi balebomba cila bushiku, kutapa amenshi pa fishima (9). Baleisusha amenshi mu fipe fyabo, kabili bafwile balelanda ne lyashi ilyo baletapa amenshi. Nga babwelela ku ng’anda, abakashana na banyina baletampa ukupanga umukate. Balebalilapo ukubika umufuba mu twaba nga mapani utwapapatala, e lyo batubika mu citofu bakafishe kale (10) icalebela pa nse ya ng’anda. Ilyo balelolela umukate ukupya, baleshimika ne lyashi uku ninshi baleumfwa na kacena akasuma aka mukate uulepya mu citofu.

Pa numa baleya ku mumana mu kucapa ifya kufwala (11). Balebalilapo ukuficapa muli sopo balepangila ku fishikisa fya miti imo. Pa numa balesukulusha ifya kufwala mu menshi, ukufikama no kufyanika pa tumuti nelyo pa mabwe.

 Ifya kufwala nga fyauma bafibwesesha na pa ng’anda, banyina na bana babo abakashana baleya pa muulu wa ng’anda apo baletuushisha, kabili nga kuli ifya kufwala ifilepwike, balefibila (12), e lyo bafibwesesha umo balefibika. Pa numa, abakashana balebasambilisha ifya kubila no kupikula (13). Mu nshita ya cungulo, abanakashi baletendeka ukwipika ifya kulya fya cungulo (14). Abantu bali na bukapekape, kanshi cila lupwa lwaleipekanya ukuliila ifya kulya pamo na beni abali bonse, ifya kulya pamo nga umukate, umusaalu, umukaka watikama, isabi ilyauma, nelyo fye amenshi yatalala.

Nga bwaila, ilyo abana bashilaya mu kusendama, balebasuba amafuta pa makufi nga napafopoka. Lyena abafyashi babo bafwile balebashimikilako ilyashi lya mu Baibolo no kupepela capamo nabo, ninshi nabasanika ne nyali iileaka fye panono. Ilyo bwaila na mu ng’anda mwatalala tondolo, umulume aletasha umukashi pa milimo isuma iyo alebomba, alesosa amashiwi ya kuti: “Umukashi wa mano nani engamusanga? Umutengo wakwe walicila pa wa bakorali.”—Amapinda 31:10.

Ukusala “Icintu Icisuma” Te kuti tutwishike ukuti abanakashi abalebombesha mu nshita ya Bena Kristu ba kubalilapo balikwete “imilimo iingi” iyalebalenga ukuba abapamfiwa. (Luka 10:40) Na lelo line e fyo abanakashi bapamfiwa, maka maka abakwata abana. Ifya kupangapanga ifyabako lelo fyalicefyako imitabotabo imo iya pa ng’anda. Lelo pa mulandu ne mikalile ukwafya, banyinefwe abengi balabomba ne ncito imbi pa mbali ya ncito sha pa ng’anda.

Nangu ca kutila abanakashi Abena Kristu aba muno nshiku balakwata amafya, bapashanya Maria, uo twacilandapo pa kabala ntanshi. Bapoosesha amano ku fya kwa Lesa. (Mateo 5:3) Balasunga bwino amayanda, nge fyo Amalembo yabakoselesha ukulacita. (Amapinda 31:11-31) Lelo balakonka na mashiwi Yesu aebele Marita. Apo Marita alitemenwe Lesa, afwile alikonkele ifyo Yesu amucinkwileko. Abanakashi Abena Kristu tabapumbulwa ku milimo bakwata pa ng’anda ica kuti bakaana no kukwata inshita ya kusambilila pali Lesa (15) nelyo ukukanakwata inshita ya kwebako bambi ifyo basuminamo. (Mateo 24:14; AbaHebere 10:24, 25) Kanshi nabo bene, basala “icintu icisuma.” (Luka 10:42) E calenga ukuti Lesa na Kristu, ukubikako fye na balupwa lwabo balebamona ukuti balicindama sana.—Amapinda 18:22.