Isukulu Lya Gileadi Ilyalenga 127

Bamishonari Babatuma “ku Mpela ya Pano Isonde”

YESU aebele abasambi bakwe ukuba inte shakwe ukufika “ku mpela ya pano isonde.” (Imilimo 1:8) Inte sha kwa Yehova balomfwila sana ili funde.

Na kuba, ukucila pa myaka 65 iyapita, bamishonari abasambilishiwa pe Sukulu lya Gileadi balabombesha muli uyu mulimo wa kushimikila mu fyalo ukucila 200. Pa Cibelushi, pa 12 September 2009, abaume na banakashi 56 ababomba sana umulimo wa kushimikila balipwishishe amasambililo yabo ayasendele imyeshi 5 pe sukulu lya bamishonari ilyabela ku Patterson, ku New York, mu calo ca United States of America.

Ifyo Mutontonkanyapo Kuti Fyamwafwa Nelyo Ukumonaula

Ba Stephen Lett, ababa mwi Bumba Litungulula ilya Nte sha kwa Yehova kabili abaali ba ceyamani pali uku kulongana, balandile ku balepwisha isukulu ilyashi lyaleti “Muletontonkanya pa Fingamwafwa.” Ica kubalilapo, babasokele pa fintu fine ifyo bashifwile ukulatontonkanyapo. Ifya kubalilapo fitatu ni fi: (1) Mwilatontonkanya ukuti ifyuma e fingamucingilila; (2) mwilatontonkanya pa fintu fyabipa; na (3) mwilasakamikwa sana pa fyo ifintu fikaba mu bushiku bukonkelepo. (Amapinda 18:11; Mateo 5:28; 6:34) Ilyo alelanda pa cishinka ca butatu, munyina Lett atile, umuntu uusakamikwa sana alatwalilila ukuba na masakamika ya bushiku bwafumineko no kuyalunda ku masakamika akwete pali ubo bushiku, e lyo abikapo na masakamika na yambi aya bushiku bukakonkapo. Munyina Lett atile ukusakamikwa kwa musango yu: “Kuitwika icisendo icafina.” Cinshi cimbi icalenga bune ico atile tabalingile ukulatontonkanyapo? Asokele abalepwisha amasambililo ukuti tabafwile ukulatontonkanya ukuti imikalile yabo yali bwino sana ilyo tabalatendeka umulimo wa bumishonari. Ukulatontonkanya ifi kukalenga ukuti bekaba ne nsansa ilyo bakalabomba uko bakabatuma.

Lyena munyina Lett akoseleshe abali mu kalasi ukulatontonkanya pa fintu ifisuma fine. Atile: (1) Mulemwena libela ifingamuletela amafya ne fingonaula bucibusa bwenu na Lesa pa kuti mulefisengauka; (2) ilyo mulebelenga Baibolo, mule-elenganya ifyo mulebelenga, mule-elenganya no kuti ilyo ifyo mulebelenga filecitika e ko muli; (3) mule-elenganya ukuti umuntu onse uo mwashimikila akaba kapepa wa kwa Yehova; na (4) muleumfwila abantu uluse, muleumfwa kwati ni mwe mulepita mu fyo balepitamo.—Amapinda 22:3.

Ukukansha Bambi Kwalicindama

Ba David Splane, ababa mwi Bumba Litungulula, balandile ilyashi ilyaleti “Ifi Fintu Ufipeele ku ba Cishinka.” Ili lyashi lyafumine pe lembo lya 2 Timote 2:2. Ilyo umutumwa Paulo aebele Timote ukusambilisha abaume aba cishinka, taloseshe mu kuti Timote ali no kulabasambilisha fye icine, lelo alefwaya no kuti alebakoselesha ukuti na bo balesambilishako bambi. Ba Splane baebele abali mu kalasi ukuti abaume aba kutungulula ifilonganino no mulimo wa kushimikila balekabilwa sana. Ni lilali aba bantu bengakanshiwa kabili kuti bakanshiwa shani? Munyina Splane akoseleshe abalepwisha amasambililo ukutendeka ukukansha aba baume ilyo fye batendeka ukusambilila na bo Baibolo.

Bushe bamishonari kuti bakansha shani abasambi babo aba Baibolo ukuba aba cishinka pa kuti bambi balebapashanya? Ba Splane balandile pa nshila shimo shimo isho bengabomfya. Batile, bafwile ukubasambilisha ifya kupekanya isambililo lya Baibolo. E lyo nga batendeka ukulongana, bafwile ukubasambilisha ifya kupekanya ukulongana konse abene. Balandile no kuti, “nga ca kutila umuntu alefilwa ukuisambilisha  Baibolo, ninshi akalafilwa ukusambilisha bambi.” Munyina Splane alandile no kuti bamishonari bafwile ukusambilisha abapya ukulasunga inshita, ukulatungilila umulimo wa kushimikila ukupitila mu kusangula imisangulo, e lyo no kulaumfwila abaletungulula mu cilonganino. Batile inshila isuma iya kusambilishishamo abasambi ifi fintu, kulaficita imwe bene mwe bakasambilisha.

Lishuko Nga Nshi Ukuba Inte ya kwa Yehova

Ba Guy Pierce, ababa mwi Bumba Litungulula, balandile ilyashi lyafumine pa mashiwi Yesu asosele aya kuti “Mukaba Inte Shandi,” ayalembwa pa Imilimo 1:8. Bacinkwileko abalepwisha amasambililo ukuti mu nshita ya batumwa, uluko lwa bena Israele lwalipanishe ishuko lya kuba Inte sha kwa Yehova. Ili shuko lyapeelwe ku luko ulwaletwala ifisabo. (Mateo 21:43) Icilonganino ca Bena Kristu basubwa e caishileba ulu luko. Ba Pierce balandile amashiwi umutumwa Petro alandile aya kuti “uluko lwa mushilo” ulwa Bena Kristu basubwa lwali no ‘kubila konse konse’ ubucindami bwa kwa Yehova. (1 Petro 2:6-9) Kanshi Yesu talelanda ukuti Abena Kristu bali no kuba fye inte shakwe epela, lelo bali no kuba ne nte sha kwa Yehova. Na kuba Baibolo ita Yesu ukuti “Inte ya Cishinka.” (Ukusokolola 1:5; 3:14) Yesu e Nte yacindamisha iya kwa Yehova kabili e o tupashanya.—1 Petro 2:21.

Kalanda aebele abalepwisha isukulu ukuti, muno nshiku, amashiwi Yesu alandile ayalembwa pa Imilimo 1:8 yalicindama nga nshi. Mulandu nshi yacindamina? Pantu icintu icikalamba ico baseseme icalembwa pa Ukusokolola 11:15, calicitika! Ubufumu bwa kwa Lesa ubo Mesia ateka bwalitendeka ukuteka. Kanshi kuti twalanda ukuti, umulimo wa kushimikila ulebombwa ukufika “ku mpela ya pano isonde.” (Imilimo 1:8) Munyina Pierce akomaile pa cishinka ca kuti bamishonari bafwile ukulaeba abantu amashiwi ya kwa Yehova no Bufumu bwakwe, te kulalanda fye pa fyo imikalile yabo yali kale, pa ntambi shabo nelyo icalo bafumako. Akoseleshe abasambi ukusambilisha abantu “abengi ukulingana na po bengapesha muli iyi nshita isheleko.”

Amalyashi Yambi Ayaliko

Ba Alex Reinmueller, abafwilisha muli Komiti ya Kusabankanya balandile ilyashi lyaleti, “Yehova Akamukosha.” Batile nga ca kutila bamishonari baleshintilila pa maka ya kwa Yehova, akabafwa ukwishiba amaka bakwata, bakeshiba umo bapelebela, bakaba abashipa no kubombela Lesa apapela amaka yabo.

Bakafundisha babili, ba Sam Roberson na ba William Samuelson, ababa muli Dipartimenti Ilolekesha pa Masukulu ya Bulesa na bo balilandile ku balepwisha isukulu. Munyina Roberson alandile pa lyashi lyaleti “Ndi na Iwe,” ilyafumine pali Esaya 41:10. Alandile ukuti bamishonari bakakwata insansa ishingi, lelo bakakwata na mafya. Kuti bashipikisha nga ca kutila balepashanya Imfumu Davidi iyakuutile kuli Shifwe wakwata ukutemwa. (Amalumbo 34:4, 6, 17, 19) Ilyashi lyalandile munyina Samuelson lyakomaile pa bucindami bwa kulingulula ifintu. Bamishonari abalingulula tabasakatuka nga babeba amashiwi ayabi kabili tabafulwa na bwangu.—Amapinda 2:10, 11.

Ba Jim Mantz, abafwilisha muli Komiti ya Kulemba, balanshenye na munyina uwaba muli Komiti ya Musambo ku calo ca Georgia, no wa ku calo ca Honduras, e lyo no waba muli Komiti ya Calo uwafumine ku calo ca Tajikistan. Aba bamunyina abaabomba pa myaka iingi bapandile amano bamishonari ukuti, nga balefwaya ukupanga ifibusa na bantu ababapata, bafwile ‘ukulacimfisha ububi pa kucita ifisuma.’ (Abena Roma 12:21) Ba Mark Noumair, bakafundisha na bambi aba ili sukulu baipwishe abalepwisha isukulu ukulanda pa fyo baipakishe ilyo balebomba umulimo wa kushimikila pa nshita bali mwi sukulu. Ili lyashi lyakwete umutwe wa kulenga umuntu ukufwaisha ukukutika, pantu waleti “Imwafwilisheko Mukwai?”

Pa nsondwelelo ya iyi programu, ba ceyamani babelengele amashiwi yaba mu lwimbo lupya ulufumine ulutila, “Elenganya.” Bonse abasangilweko bali 6,509 kabili balicincishiwe ne yi programu ica kuti bapampamine pa kulabila pali Yehova no Mwana wakwe ukufika “na ku mpela ya pano isonde.”

 [Charti na Mapu pe bula 31]

IFIPENDO FYA BALI MU KALASI

Bafumine mu fyalo 8

Abasambi bonse pamo bali 56

Bonse balyupa no kuupwa

Imyaka ya kufyalwa 33.6

Imyaka baba mu cine 18.3

Imyaka babomba mu mulimo wa nshita yonse 13.6

[Mapu]

(Nga mulefwaya ukumona mapu, moneni muli magazini)

Babatumine mu fyalo 22 ifili pe samba

IFYALO BABATUMINEKO

ALBANIA

BOLIVIA

BURUNDI

CAMBODIA

CHILE

CONGO, DEM. REP.

COSTA RICA

CÔTE D’IVOIRE

CURAÇAO

GUYANA

HAITI

JAMAICA

MOLDOVA

MOZAMBIQUE

NEPAL

NICARAGUA

PANAMA

PARAGUAY

PERU

SERBIA

TANZANIA

UGANDA

[Icikope pe bula 31]

Abapwishishe Isukulu lya Gileadi Ilyalenga 127

Ukupenda kutampile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.

(1) Marshall, T.; Prudent, L.; Mashburn, A.; Rosenström, S.; Testa, A.; Takeyama, M.; Sisk, M.

(2) Grooms, K.; Miura, S.; Camacho, M.; Rozas, S.; Burch, M.; Meza, I.; Young, G.; Geraghty, S.

(3) Bonilla, C.; Knaller, D.; Parrales, R.; Hotti, S.; Takada, A.; Tournade, M.; Sopel, C.

(4) Miura, Y.; Parrales, K.; Prudent, K.; Colburn, S.; Willis, L.; Vääränen, A.; Sisk, B.; Takada, R.

(5) Grooms, J.; Vääränen, M.; Geraghty, B.; Stackhouse, R.; Wilson, A.; Bonell, E.; Camacho, D.; Meza, R.; Bonell, M.

(6) Takeyama, S.; Testa, G.; Colburn, T.; Mashburn, C.; Willis, W.; Tournade, L.; Burch, J.; Stackhouse, J.

(7) Wilson, J.; Young, J.; Marshall, E.; Rozas, M.; Knaller, J.; Hotti, N.; Rosenström, A.; Sopel, J.; Bonilla, O.