Bushe Kuti Twaishiba Ifyo ku Muulu Kwaba?

ABENGI balatemwa sana ukumfwa ukuti abantu balaya ku muulu! Abasumina ukuti umuntu nga afwa alayapo kumo uko atwalilila ukuba umumi, balanda ifintu ifyalekanalekana. Pali aba paba abaShilamu, abaHindu, abaBudda, abatila Bena Kristu, na bantu fye bambi abengi abashipepa. Batontonkanya ukuti ku muulu kusuma, abantu balasangalala pantu balalubuka ku macushi kabili balaya mu kumonana na “balupwa lwabo abafwa.” Na lyo line, kwaliba insoselo imo iitila: Umuntu onse alafwaya ukuya ku muulu, lelo takwaba umuntu nangu umo uufwaya ukufwa pa kuti aye ku muulu. Mulandu nshi cabela ifi?

Lesa nga atupangile ukuti tuleya ku muulu nga twafwa, bushe abengi nga tabafwaisha ukufwa pa kuti baye ku muulu nga filya fine umwaice afwaisha ukukula nelyo nga filya abalumendo na bakashana bafwaisha ukuupa nelyo ukuupwa? Nomba abantu abengi tabafwaya ukufwa.

Nangu cabe fi, bashimapepo abengi batila pano calo twaisa fye mu kutandala, ku muulu e ko tufwile ukwikala. Ku ca kumwenako, uwali kale shikofu, Theodore Edgar Cardinal McCarrick, uwikala mu musumba wa Washington, D.C., atile: “Tabatupangile ukuti tuleikala pano calo. Batupangile ukuti tuleikala ku muulu.” No wali kale presidenti wa kabungwe ka U.S. National Association of Evangelicals, na o atile: “Lesa atupangile ukuti tulemulumbanya no kuti tukaye ku muulu . . . pantu ku muulu e ko tufwile ukulaikala.”

Abasumina ukuti umuntu nga afwa alaya ku muulu tabakwata ifishinka fine fine. George Barna, uwali kale presidenti wa kampani akafwailisha pa fyo amacalici yasambilisha, asangile ukuti “ifintu pamo nga amafilimu, inyimbo ne fitabo, e filenga abantu abengi ukulatontonkanya nelyo ukusumina ukuti umuntu nga afwa alayapo kumo uko atwalilila ukuba umumi.” Mu musumba wa Florida, pasta we calici lya ba Episcopal atile: “Tatwaishiba ifingi pa fyo ku muulu kwaba, ico twaishibapo fye ca kuti e kwikala Lesa.”

Lelo ilyashi lilanda pa fyo ku muulu kwaba, lyashi ilyacindama sana mu Baibolo. Bushe Baibolo yalanda ukuti ku muulu kwaba shani? Bushe umuntu bamupangile ukuti aleikala ku muulu? Abantu nga balaya ku muulu, ninshi finshi baya mu kucitako?

[Amashiwi pe bula 3]

Mulandu nshi abengi bafwaila ukuya ku muulu, ilyo takwaba nangu umo uufwaya ukufwa pa kuti aye ku muulu?