Palameni Kuli Lesa

Bushe Lesa Kuti Alanguluka?

ABAAPINGUSHI 2:11-18

INSHITA shimo fwe bantunse abashapwililika tulalanguluka pa fyo tucita. Ku ca kumwenako, tulomfwa ububi nga twailuka ukuti natulufyanya. Ku ca kupapa, Baibolo itila Yehova alalanguluka. Nomba nalimo kuti mwatila: ‘Apo Lesa alipwililika kabili talufyanya, kuti alanguluka shani?’ Ninshi ni mwi mwalola amashiwi ya kuti Lesa alalanguluka? Icasuko kuti catwafwa ukwishiba icintu cimo ica kutiinya nga nshi, ica kuti Yehova alakalipa. Ifyo tucita kuti fyamulenga ukukalipa nelyo ukusekelela. Tontonkanyeni pa mashiwi yaba pa Abapingushi 2:11-18.

Ibuuku lya mu Baibolo ilya Abapingushi lyalanda pa mafya abena Israele bakwete ukulingana ne fyo yakonkene. Pali iyi nshita ninshi abena Israele balingila mu calo ca Kanaani, ico Lesa alaile ukupeela Abrahamu. Pa myaka iingi iyakonkelepo, ifyalecitika ku bena Israele kuti twafilondolola mu nshila shine: balepondoka, balebatitikisha, balepapaata Lesa, kabili balebalubula. *

Ukupondoka. Ilyo balekonkelesha ifyalecita abena Kanaani, abena Israele ‘balepondokela Yehova’ no kutendeka ukulapepa balesa bambi; “[batendeke] ukubombela Baali na baAstarte.” * Ukupondokela Yehova muli uyu musango kwali busangu. E calengele abena Israele “bakalifye Yehova,” Lesa uwabalubwile mu Egupti!—Ifikomo 11-13; Abapingushi 2:1.

Ukubatitikisha. Nga akalipa, Yehova aleleka ukucingilila abantu abamupondokele. Nga aleka ukubacingilila, abena Israele balewila “mu minwe ya balwani babo,” abalebasansa no kubapoka ifipe.—Icikomo 14.

Balepapaata Lesa. Abena Israele nga babacusha sana, balelapila pa fyabipa ifyo balecita kabili balelilila kuli Lesa ukuti abafwe. Amashiwi yatila “ukuteta kwabo pa mulandu wa balebatitikisha” e yalanga ukuti balepapaata Lesa. (Icikomo 18) Ifi fine e fyo balecita lyonse nga batendeka ukubacusha. (Abapingushi 3:9, 15; 4:3; 6:6, 7; 10:10) Bushe Lesa alecita shani nga bamupapaata?

Ukubalubula. Yehova aleumfwa ukuteta kwa bena Israele kabili “alelanguluka.” Ishiwi lya ciHebere ilyo bapilibula ukuti “ukulanguluka” kuti lyapilibula “ukukanacita ifyo umuntu acilafwaya ukucita.” Icitabo cimo catila: “Ilyo Yehova aumfwile ukuteta kwabo tabakandile nge fyo alefwaya, lelo alibalubwile.” Yehova aleumfwa uluse kabili ‘aleimya abapingushi,’ abalelubula abantu bakwe ku balwani.—Icikomo 18.

Bushe mwamona icalelenga ukuti Lesa alanguluke, nelyo ukukanacita ifyo alefwaya ukucita? Icalelenga ca kuti abantu bakwe balealuka no kuleka ukucita ifyabipa. Lekeni tulangilile: Umufyashi uwatemwa abana bakwe kuti asalapula umwana, nalimo kuti amukaanya ukulacitako ifintu fimo ifyo atemwa. Nomba nga amona ukuti umwana nalapila, kuti amusuminisha ukulacita ifyo amuleseshe.

Bushe ili lyashi liletusambilisha finshi pali Yehova? Liletusambilisha ukuti ukubembukila ku mufulo kulakalifya Yehova, e lyo ukulapila no mutima onse kulalenga abelela umuntu uluse. Bushe taciletuletela umwenso ukwishiba ukuti ifyo tucita kuti fyalenga Lesa ukukalipa? Kanshi kuti cawama ukwishiba ifyo tufwile ukulacita pa kuti tulelenga ‘umutima wa kwa Yehova ukusekelela.’ (Amapinda 27:11) Nga mwaishiba ukucita ifilenga umutima wa kwa Yehova ukusekelela, tamwakalelanguluka nangu panono.

[Amafutunoti]