‘Alamona mu Mutima’
Palameni Kuli Lesa
‘Alamona mu Mutima’
IFYO umuntu amoneka, te kutila ninshi e fyo no mutima wakwe waba. Imimonekele tailanga fyonse pa fyo umuntu aba. Fwe bantu, tupingula abanensu ukulingana ne fyo balemoneka. Lelo Yehova Lesa ena te fyo aba. Amashiwi yaba pali 1 Samwele 16:1-12 e yalanga ukuti Yehova talolesha fye pa fyo umuntu amoneka.
Taleni tontonkanyeni pali ici cacitike. Yehova alefwaya ukusala imfumu imbi iya kulateka abena Israele. Aebele kasesema Samwele ukuti: “Ndekutuma kuli Yese umwina Betelehemu, pantu mu bana bakwe ninsangamo uo ningacita imfumu.” (Icikomo 1) Yehova talandile ishina lya muntu asalile ukuba imfumu lelo alandile fye ukuti uusalilwe ni mwana Yese. Ilyo Samwele aleya ku Betelehemu, afwile aletontonkanya ukuti, ‘Nalaishiba shani uo Yehova asalile pa bana baume ba kwa Yese?’
Ilyo Samwele afikile ku Betelehemu, apekenye ukuti Yese na bana bakwe abaume baliile pamo na ena ica kulya ce lambo. Ilyo Eliabu, umukalamba pa bana baume aba kwa Yese aingile, Samwele amwene fye ifyo alemoneka bwino, asondwelela no kuti e walingile ukuba imfumu kabili atile: “Cine cine uyu eminine pa cinso ca kwa Yehova e wasubwa wakwe.”—Icikomo 6.
Lelo ifyo Samwele alemona, te fyo Yehova alemona. E co Yehova aebele Samwele ukuti: “Wimona ifyo alemoneka no butali bwa ciimo cakwe, pantu nimukaana.” (Icikomo 7) Yehova talelolesha fye pa butali no kuyemba kwa kwa Eliabu. Amenso ya kwa Yehova tayalolesha fye ubusuma bwa muntu epela, lelo yalolesha na pa busuma bwa fyo umuntu aba mu kati.
Yehova alondolwelele Samwele ukuti: “Pantu ifyo umuntu amona te fyo Lesa amona, pantu umuntunse amona fye ifimoneka ku menso; lelo Yehova ena, amona mu mutima.” (Icikomo 7) Kanshi umutima, e kutila ifyo umuntu aba mu kati ne fyo atontonkanya, e fyacindama kuli Yehova. “Uubebeta imitima” alikeene Eliabu na bana baume bambi 6 aba kwa Yese abaishile kuli Samwele.—Amapinda 17:3.
Yese alikwete umwana umwaume na umbi, umwaice pali bonse, kabili talipo “aleliisha impaanga.” Ishina lyakwe ni Davidi. (Icikomo 11) E ico Davidi balimwitile kabili aishile kuli Samwele. Lyena Yehova aebele Samwele ukuti: “Ima, umusube, pantu e uyu wine!” (Icikomo 12) Ca cine, Davidi “ali mulumendo . . . uwayemba amenso kabili alemoneka bwino.” Lelo icalengele ukuti Lesa amutemwe, mutima wakwe.—1 Samwele 13:14.
Ukwishiba ukuti Yehova Lesa talolesha fye pa fyo umuntu amoneka ku nse kuti kwatusansamusha nga nshi pantu muno calo abantu bapingula umuntu ukulingana ne fyo amoneka. Nampo nga muli batali nelyo mwaliyemba icine cine, ifi te fyacindama kuli Lesa. Ifyo mwaba mu kati, e kutila mu mutima, e fyacindama kuli Yehova. Bushe ukwishiba ifi takwingamulenga ukulafwaisha ukuba ne mibele iingalenga mulemoneka abayemba kuli Lesa?