Bushe Baibolo Cebo ca kwa Lesa?

“Amalembo yonse aya mushilo yafuma kuli Lesa kabili ya mulimo ku kusambilisha, ku kukalipila, ku kulungika ifintu, ku kusalapwila mu bulungami, pa kuti umuntu wa kwa Lesa abe uwafikapo bwino bwino, uwaipangasha icine cine ukubomba umulimo onse uusuma.”—2 TIMOTE 3:16, 17.

AYA mashiwi ya maka ayo umutumwa Paulo alandile yalanga ukuti Baibolo yalicindama icine cine! Ilyo alandile aya mashiwi, alelanda pa Malembo ya mu Baibolo ayaliko pali ilya nshita, yalya bamo beta ati Icipangano ca Kale. Lelo filya alandile pa Malembo yaliko pali ilya nshita, e fyaba na mabuuku yonse 66 ayapanga Baibolo, umwaba na mabuuku abasambi ba kwa Yesu aba cishinka balembele ilyo UbuKristu bwatendeke fye.

Bushe na imwe mumona ukuti Baibolo yalicindama nga filya fine Paulo aleimona? Bushe mwalishininkisha ukuti ifyo abalembele Baibolo balembele fyafumine kuli Lesa? Abena Kristu ba kubalilapo e fyo basumine kabili na ba muno nshiku nabo bene e fyo basumina. Ku ca kumwenako, shimapepo umo uwa ku England uwe shina lya kuti John Wycliffe, uwali pa calo mu ma 1300 C.E., alemona Baibolo ukuti “cebo ca cine.” Icitabo ca The New Bible Dictionary [icilanda pa fyalembwa mu Baibolo], calanda pa mashiwi Paulo alembele ayali pa muulu ukuti, ifi Amalembo “yafuma kuli Lesa, bushininkisho bwa kuti fyonse ifyalembwa muli Baibolo fya cine sana.”

Bamo Balileka Ukumona Baibolo Ukuti Yalikwata Amaka

Abantu abengi muno nshiku, balileka ukumona Baibolo ukuti yalikwata amaka. Icitabo ca kuti The World’s Religions [imipepele yaba mu calo], calanda ukuti: “[Na lelo line] Abena Kristu bonse  batila Baibolo yalikwata amaka ya kubatungulula no kubalenga ukwishiba ifyo balingile ukusuminamo.” Nomba ifyo bacita e filanga ukuti tabakonka ifyo balanda. Abengi muno nshiku bamona ukuti Baibolo “citabo umwalembwa fye amano ya bantunse ayashingatwafwa.” Nangu ca kuti balishiba ukuti abalembele Baibolo bali ne citetekelo cakosa, babamona ukuti bali bantu fye ababembu abakwete ubwafya bwa kulondolola ifintu fyashika ifya kwa Lesa kabili abashaishibe ifintu ifingi nge fyo twaishiba pali lelo.

Ukulanda fye icishinka, banono muno nshiku abakonka ifyo Baibolo ilanda pa mibele umuntu afwile ukukwata na pa fyo afwile ukulatontonkanya. Ku ca kumwenako, bushe ilingi tatumfwa uko bamo batila, ifi Baibolo yalesha imibele yabipa fya kale kabili tafibomba? Abantu abengi batontonkanya ukuti bafwile ukusambilisha fye amafunde ya mu Baibolo ayo abantu bengatemwa, nomba limo tabayasambilisha no kuyasambilisha. Bamo “abatila Bena Kristu” balisuula ifyo Baibolo yalanda pa bulalelale, ubucende, ukukanaba ne cishinka, na bucakolwa.—1 Abena Korinti 6:9, 10.

Mulandu nshi cabela ifi? Umulandu umo walishibikwe mu kubangilila kwa ba 1900, ilyo umuntu umo uushula ifintu mu mushili uwe shina lya kuti Sir Charles Marston alembele amashiwi yamo mu citabo ca kuti The Bible Is True [Baibolo ya Cine]. Atile, abantu “baalesumina fye fyonse ifya kutunganya ifyo bakalemba” balelemba pali Baibolo ukuti te ya cine. Bushe ifi fine e fyo caba na lelo? Bushe mulingile ukumona shani ifya kutunganya fye ifyo abasoma abasuusha Baibolo balanda? Belengeni icipande cakonkapo mumfwe ifyo cilelanda pali ili lyashi.