Palameni Kuli Lesa

‘Ubufumu Bobe Bukatwalilila Umuyayaya’

2 SAMWELE 7:1-16

UKUFUMA fye na kale, bakateka abengi balabafumya pa bufumu. Bamo babafumyapo ilyo basalilapo bambi, e lyo bambi babafumyapo fye ku maka. Inga Yesu Kristu ena, Imfumu ya Bufumu bwa mu muulu ubwa kwa Lesa? Apo ni Mfumu yasontwa na Lesa, bushe kuti kwaba uwingamufumya pa bufumu? Icasuko cisangwa mu mashiwi Yehova alandile kuli Davidi Imfumu ya bena Israele ayalembwa mwi buuku lya 2 Samwele icipandwa 7.

Mu mashiwi fye aya kubalilapo muli ici cipandwa, tubelenga ukuti Davidi tatemenwe, pantu nangu ali fye muntunse, aleikala mwi sano ilisuma, nomba icipao ca kwa Lesa icacindeme bacibikile fye mwi tenti. * Awe, e fyo Davidi atontonkenye pa kukuulila Yehova ing’anda nelyo itempele. (Icikomo 2) Lelo Davidi te wali no kukuula ing’anda. Ukupitila muli kasesema Natani, Yehova aebele Davidi ukuti umwana wakwe e wali no kukuula itempele.—Ifikomo 4, 5, 12, 13.

Yehova alitemenwe sana pa fyo Davidi alefwaisha ukumukuulila ing’anda. Ukuipeelesha kwakwe kwalengele Lesa ukupanga icipangano ca kuti mu lupwa lwakwe e mukafuma uukalateka umuyayaya kabili ici caumfwene no kusesema ukwaliko kale. Natani aebele Davidi ukufwaya kwa kwa Lesa, atile: “Ing’anda yobe no bufumu bobe fikatwalilila umuyayaya; icipuna cobe ica bufumu cikapampamikwa umuyayaya.” (Icikomo 16) Bushe nani uyu uwali no kuba Imfumu umuyayaya?—Amalumbo 89:20, 29, 34-36.

Yesu umwina Nasarete afyalilwe mu lupwa lwa kwa Davidi. Ilyo malaika alelanda pa kufyalwa kwa kwa Yesu atile: “Yehova Lesa akamupeela icipuna ca bufumu ica kwa Davidi wishi, kabili akaba imfumu umuyayaya pa ng’anda ya kwa Yakobo, no bufumu bwakwe tabwakabe ne mpela.” (Luka 1:32, 33) Kanshi cilya cipangano Lesa apangene na Davidi cafikilishiwe muli Yesu Kristu. E mulandu wine Yesu abela Imfumu, te bantunse bamusala lelo ni Lesa nge fyo umwine alaile, e calenga ukuti akwate amaka ya kuteka umuyayaya. Natuleibukisha ukuti ifyo Lesa alaya filafikilishiwa lyonse.—Esaya 55:10, 11.

Muli 2 Samwele icipandwa 7, tusambililamo amasambililo yabili ayacindama. Ilya kubalilapo lya kuti, tufwile ukucetekela ukuti tapali umuntu uuli onse nelyo icili conse icingalesha Yesu Kristu ukuteka. Kanshi kuti twacetekela ukuti Yesu akacita fyonse ifyo Lesa amubikila pa bufumu, e kutila ukucita ukufwaya kwa kwa Lesa pano isonde nga mu muulu.—Mateo 6:9, 10.

Ilya bubili lya kuti ili lyashi lilatufunda isambililo ilisuma pali Yehova. Mwilaba ukuti Yehova alimwene ifyo Davidi alefwaisha ukucita mu mutima wakwe kabili alifitemenwe. Cilatusansamusha ukwishiba ukuti Yehova alatasha pa fyo tuipeelesha mu kumupepa. Inshita shimo tulafilwa ukucita ifyo umutima wesu ulefwaisha mu kubombela Lesa pa mulandu wa kulwalilila nelyo ubukote. Nga e fyo caba, kuti twasansamushiwa ukwishiba ukuti Yehova alamona ne fili mu mitima yesu iifwaisha ukumubombela.

[Futunoti]