Fundeni Abana Benu

Abantu Abalembele Ilyashi Pali Yesu

BUSHE ulomfwa bwino ukubelenga ilyashi ililanda pali Yesu?— * Abantu bamo balapapa nga baishiba ukuti Yesu talembeleko Baibolo. Lelo abaume 8 abalembeleko Baibolo balilembele ifingi pali ena. Aba baliko ilyo Yesu ali pano calo, kabili balatweba ifyo alesambilisha. Bushe walibeshiba amashina?—Ni Mateo, Marko, Luka, na Yohane. Bambi na bo ni Petro, Yakobo, Yuda, na Paulo. Finshi waishibapo pali aba baume?—

Natutale tulande pali bakalemba batatu abali na pa batumwa 12 aba kwa Yesu. Bushe walishiba amashina yabo?—Ni Petro, Yohane, na Mateo. Petro alembele amakalata yabili ku Bena Kristu banankwe. Abebele pa fyo Yesu acitile ne fyo alandile. Kupukula pali 2 Petro 1:16-18, kabili belenga ifyo Petro alondolola ifyo Yehova Lesa alandile kuli Yesu ukufuma mu muulu.—Mateo 17:5.

Umutumwa Yohane alembele amabuuku yasano aya mu Baibolo. Aikele mupepi na Yesu ilyo abasambi balelya ica kulya ca kulekeleshako na Shikulwibo. Na kabili Yohane ali pamo na Yesu ilyo afwile. (Yohane 13:23-26; 19:26) Yohane alembeleko ibuuku limo pa mabuuku yane aya mu Baibolo ayalanda pa bumi bwa kwa Yesu ayo beta ukuti Imbila Nsuma. Alembele na Ukusokolola uko Yesu amupeele e lyo na makalata yatatu ayaba mu Baibolo ayainikwa ishina lyakwe. (Ukusokolola 1:1) Kalemba wa Baibolo uwalenga butatu uwaishileba umutumwa wa kwa Yesu ni Mateo. Kale alesonkesha imisonko.

Bakalemba bambi babili aba Baibolo baishibe Yesu mu nshila yaibela. Bali baice bakwe, nabo bali bana ba kwa Yosefe na Maria. (Mateo 13:55) Ilyo Yesu atendeke ukushimikila, tabali abasambi bakwe. Na kuba, baleti napena pantu ali sana uwacincila mu kushimikila. (Marko 3:21) Bushe aba bamunyina ba kwa Yesu bali ni bani?—Umo ni Yakobo. Alembele ibuuku lya mu Baibolo ilya kuti Yakobo. Umbi ni Yuda. Alembele ibuuku lya mu Baibolo ilyo beta ukuti Yuda.—Yuda 1.

Bambi babili abalembele pa bumi bwa kwa Yesu ni Marko na Luka. Maria, nyina wa kwa Marko alikwete ing’anda iikalamba mu Yerusalemu umo Abena Kristu ba kubalilapo balelonganina ukubikako no mutumwa Petro. (Imilimo 12:11, 12) Imyaka yabangilileko, pa bushiku Yesu aliile Ica Kucilila ca kulekeleshako na batumwa bakwe, Marko afwile alibakonkele ilyo baile mwi bala lya Getsemane. Ilyo Yesu bamwikete, abashilika bafwaile ukwikata Marko, lelo alifulumwike asha ne ca kufwala cakwe.—Marko 14:51, 52.

Luka ali ni dokota uwasambilila sana kabili nalimo aishileba umusambi ilyo Yesu afwile. Alisambilile sana pa bumi bwa kwa Yesu kabili alembele ilyashi lya cine kabili ilyaumfwika. Pa numa, Luka aishiletendeka ukwenda no mutumwa Paulo kabili alembele ne buuku lya Imilimo.—Luka 1:1-3; Imilimo 1:1.

Paulo e walenga 8 pali bakalemba ba Baibolo abalembele pa bumi bwa kwa  Yesu. Asambilile kuli Gamaliele, loya uwaishibikwe sana. Abamukushishe bali baFarise kabili e bamusambilishe no kumusambilisha, e ico Paulo, uo baleita pali ilya nshita ukuti Sauli, alipatile abasambi ba kwa Yesu kabili alisuminisheko no kuti bepaiwe. (Imilimo 7:58–8:3; 22:1-5; 26:4, 5) Bushe nawishiba ifyo Paulo asambilile icine pali Yesu?—

Paulo ali pa lwendo lwa kuya ku Damaseke ku kwikata abasambi ba kwa Yesu kabili mu kupumikisha ulubuuto ulukalamba ulwafumine ku muulu lwalengele apofule. Lyena aumfwile ishiwi ilyatile: “Sauli, Sauli, cinshi ulencushisha?” Ni Yesu e walelanda nankwe! Aebele Paulo ukuya ku Damaseke. Lyena aebele umusambi wakwe Anania ukuti ayelanda na Paulo, awe e fyo Paulo aishileba umusambi wa kwa Yesu. (Imilimo 9:1-18) Paulo alembele amabuuku ya mu Baibolo 14, ukutendekela ne buuku lya Abena Roma ukufika ku AbaHebere.

Bushe walitendeka ukubelenga amabuuku ya mu Baibolo ayalanda pali Yesu nangu kwaliba bamo abakubelengelako?—Icisuma sana ico wingacita kutampa ukubelenga Baibolo nomba line ilyo ucili umwaice pa kuti wishibe ifyo ilanda pali Yesu.

[Futunoti]

AMEPUSHO:

▪ Ni bani abatumwa ba kwa Yesu abalembeleko Baibolo?

▪ Ni bani babili abalembeleko Baibolo abali bamunyina ba kwa Yesu?

▪ Cinshi napamo calengele Marko ukwishiba Yesu, kabili nalimo cinshi calengele ukuti Luka emwishiba?

▪ Bushe Paulo aishileba shani umusambi wa kwa Yesu?

[Ifikope pe bula 25]

Yuda

Marko

Petro

Mateo

Paulo

Yakobo

Luka

Yohane