Ababelenga Ino Magazini Balepusha Ukuti . . .

Bushe Inte sha kwa Yehova Bamona Shani Ukupepela Pamo na Macalici Yambi?

▪ Icitabo ca World Christian Encyclopedia, citila mu calo conse “mwaba amacalici yalekanalekana 10,000.” Pa mulandu wa kuti ukukanaumfwana kwaba pa macalici kwalileta amafya ayengi, abengi abaya ku mapepo bamona kwati ukupepela pamo kuti kwalenga ifintu ukuba bwino. Basumina ukuti ukupepela pamo kuti kwaleta umutende no kwikatana muli cino calo icishaikatana.

Baibolo ilakoselesha abantu ukwikatana. Umutumwa Paulo apashenye icilonganino ca Bena Kristu ku mubili wa muntu, uo icilundwa cimo na cimo ‘calundinkana bwino bwino no kulengwa ukubombela pamo.’ (Abena Efese 4:16) Umutumwa Petro na o akoseleshe Abena Kristu banankwe ukuti: “Bonse muleba no mutima umo.”—1 Petro 3:8.

Abena Kristu ba kubalilapo baleikala mu calo umwali abantu aba mitundu ne mipepele yalekanalekana. Nangu cali ifi, ilyo Paulo alelemba pa kucitila pamo ifintu ukwa macalici yalekanalekana, aipwishe ukuti: “Uwatetekela kuti aumfwana shani no ushatetekela?” Lyena, asokele Abena Kristu ukuti, “fumenimo muli bena.” (2 Abena Korinti 6:15, 17) Ukwabula no kutwishika, Paulo alesoka pa kupepela pamo na macalici yambi. Mulandu nshi asokele ifi?

Umutumwa Paulo alondolwele ukuti ukupepela pamo ukwa Bena Kristu ba cine na Bena Kristu ba bufi, cimo no kuba kwi koli limo line na bashatetekela, kabili takwalinga. (2 Abena Korinti 6:14) Kuti kwaonaula icitetekelo ca Bena Kristu. Paulo alisakamene kwati ni filya fine umufyashi engasakamana nga naishiba ukuti abana bamo mu ncende ekala tabomfwa. Apo uyu mufyashi alibika amano ku mwana wakwe, alamweba abo alingile ukwangala na bo e lyo na bo ashilingile ukwangala nabo. Lelo bamo te kuti batemwe ica musango uyu. Nomba ukucite fi kuti kwacingilila umwana wakwe ku banankwe pa kuti tonaike. Paulo na o alishibe ukuti ukuitalusha ku mipepele imbi kuti kwacingilila Abena Kristu ku fyabipa.

Paulo alepashanya Yesu ilyo alandile ukuti Abena Kristu bafwile ukuipaatula ku mipepele imbi. Nangu ca kutila Yesu alekoselesha sana abantu ukuba no mutende, na lyo line talepepela pamo na ba mipepele imbi. Kwali imipepele iingi ilyo Yesu ali pano calo, pamo nga iya baFarise ne ya baSaduke. Na kuba aba mu mipepele ya baFarise ne ya baSaduke balyumene akapi ukulwisha Yesu, ica kuti basukile bamwipaya no kumwipaya. Yesu aebele abasambi bakwe ukuti ‘cenjeleni . . . ku fyo abaFarise na baSaduke basambilisha.’—Mateo 16:12.

Inga muno nshiku mwena caba shani? Bushe na ino nshita tufwile ukumfwila ukusoka kwa mu Baibolo ukwa kukanapepela pamo? Ee, tufwile ukukumfwila. No mulandu wa kuti imipepele yapusanapusana te kuti ikatane nga filya fine amafuta na menshi fishingekatana nga mwafibika mu mpoto. Ku ca kumwenako, nga ca kutila abantu ba mipepele yalekanalekana balepepela pamo, bushe ni kuli lesa nshi bapepa? Bushe ni kuli Lesa umo uwabamo batatu? Bushe ni kuli lesa wa ba Hindu Brahma? Nelyo ni kuli lesa wa ba Buddha? Nelyo bushe ni kuli lesa uuli onse fye?

Kasesema Mika asobele ukuti “mu nshiku sha ku mpela,” abantu ukufuma mu nko shonse bakatila: “Iseni, natunine tuleya ku lupili lwa kwa Yehova, tuleya ku ng’anda ya kwa Yakobo; kabili akatusambilisha imibele yakwe, kabili tukenda mu nshila shakwe.” (Mika 4:1-4) Icikafumamo ca kuti abantu mu calo conse bakaba no mutende kabili bakekatana, te pa mulandu wa kupepela pamo iyo, lelo pa mulandu wa kuti bonse bakaba mu mipepele imo iya cine.

[Icikope pe bula 27]

Aba mu mipepele ikalamba iya mu calo nabalongana ku kupepela pamo, 2008

[Abatusuminishe]

REUTERS/Andreas Manolis