“Mukaba Aba Cishinka”
Palameni Kuli Lesa
“Mukaba Aba Cishinka”
TULOMFWA sana ububi nga ca kutila umuntu twacetekela atwalukila nangu atulenga insoni. Ilingi line ifya musango uyu e ficitika muli cino calo umo abantu bashaba na cishinka. (2 Timote 3:1-5) Bushe kwaliba umuntu uo twingacetekela uwingatwalilila uwa cishinka kuli ifwe? Natulande pa fyacitikile Imfumu Davidi iya mu Israele.
Davidi aliculile nga nshi pa mulandu ne fyamucitikile. Atampile ukwikala kwati ni mbutushi kabili Shauli, imfumu ya kubalilapo iya mu Israele, yalemucusha pa mulandu wa bufuba. Na ba mu lupwa lwakwe bene tabali na cishinka kuli ena, Mikali, umukashi wakwe ‘alimusuulile mu mutima wakwe.’ (2 Samwele 6:16) Ahitofele, mpanda mano wa kwa Davidi uo acetekele, alimwalukile kabili aumene akapi na bapondokele Davidi. Bushe nani alengele ukuti bapondokele Davidi? Ica kupapusha ca kuti ali mwana wakwe, Abishalomu! Ilyo ifi fyonse fyamucitikile, bushe Davidi alilekele ukucetekela uuli onse no kutendeka ukutontonkanya ukutila takuli nangu umo uwingatwalilila ukuba uwa cishinka kuli ena?
Icasuko tucisanga mu mashiwi Davidi asosele ayalembwa pali 2 Samwele 22:26. Davidi, umuntu uwa citetekelo cakosa, aimbile pali Yehova Lesa ati: “Ku wa cishinka mukaba aba cishinka.” Davidi alicetekele ukuti nangu ca kutila abantu kuti bamwalukila no kumukalifya, Yehova ena akatwalilila ukuba uwa cishinka kuli ena.
Natulande pali aya mashiwi Davidi alandile. Ishiwi lya ciHebere ilyo bapilibula ukuti “mukaba aba cishinka” kuti lyapilibula no kuti “ukuba ne cikuuku.” Umuntu wa cishinka aliba no kutemwa. Yehova apalama ku bantu ababa ne cishinka kuli ena. *
Moneni no kuti ukuba uwa cishinka kusanshamo no kucitapo fimo, te kulamona fye ukuti uli wa cishinka. Davidi ali-imwenene ukuti Yehova wa cishinka muli fyonse ifyo acita. Ilyo ifintu fya-afishe sana kuli Davidi uwali uwa cishinka, Yehova alimwafwile, alimucingilile kabili alemutungulula. Davidi alishibe ukuti Yehova e wamupokolwele “mu minwe ya balwani bakwe bonse,” kabili alimutashishe.—2 Samwele 22:1.
Bushe aya mashiwi Davidi asosele yatukuma shani? Yehova aba fye cimo cine, taluka. (Yakobo 1:17) Lyonse fye acita ifintu ukulingana ne mibele yakwe kabili alafikilisha ifyo alaya. Mwi lumbo limbi, Davidi alembele ukuti: “Yehova . . . takashe aba cishinka bakwe.”—Amalumbo 37:28.
Yehova alicindamika bucishinka bwesu kuli ena. Alafwaya tulemumfwila mu cishinka, kabili atukoselesha ukumupashanya pa kuti na ifwe tuleba aba cishinka kuli bambi. (Abena Efese 4:24; 5:1) Nga twaba aba cishinka kuli Lesa na ku banensu, tukacetekela ukuti takatulekeleshe nakalya. Te mulandu no kutila abantu kuti batwalukila, twalicetekela ukuti Yehova ena akaba fye uwa cishinka kuli ifwe, akatwafwa ukucimfya amesho ayali yonse. Bushe ifi tafilemulenga ukufwaya ukupalama kuli Yehova, uwaba ‘uwa cishinka’?—Ukusokolola 16:5.
[Futunoti]
^ para. 7 Amashiwi yaba pali 2 Samwele 22:26 yalipalana na yaba pa Amalumbo 18:25. Baibolo imo yapilibula aya mashiwi ukuti: “Ku wa cishinka mulalanga ukutemwa kwa cine cine.”—Baibolo ya The Psalms for Today.