Amepusho Yane Ayalanda pa Mpela ya Calo Ya-asukwa

YESU KRISTU asobele ukuti bushiku bumo, “impela ikesa.” Ilyo alelanda pali iyi nshita, atile: “Kukaba ubucushi ubukalamba ubushatala abubako ukutula pa ntendekelo ya ba pano calo ukufika nomba, kabili tabwakatale abubako na kabili.”—Mateo 24:14, 21.

Amashiwi Yesu alandile pa mpela ya calo, na mashiwi yambi aya mu Baibolo ayalanda pa lyashi limo line, yalenga abantu ukwipusha amepusho ayacindama. Mukwai kupukuleni Baibolo yenu pa kuti mumone ifyo yasuka aya mepusho.

1 Finshi Fikapwa?

Baibolo taisambilisha ukuti icalo cikonaulwa. Kemba wa malumbo aimbile ukuti: “[Lesa ashimpile] isonde pa cifulo ca liko icapampamikwa; talyakatelentenshiwe umuyayaya, umuyayaya.” (Amalumbo 104:5) Na kabili Baibolo taisambilisha ukuti ifya mweo fyonse fikonaulwa ku mulilo. (Esaya 45:18) Yesu umwine alangile ukuti abantu bamo bakapusuka ilyo impela ikesa. (Mateo 24:21, 22) Nomba bushe Baibolo ilanda ukuti finshi fikapwa?

Amabuteko ya bantunse ayafilwa ukuteka yakonaulwa. Lesa apeele kasesema Daniele umupashi pa kuti alembe ukuti: “Lesa wa mu muulu akemya ubufumu ubushakonaulwe nakalya. Kabili ubo bufumu tabwakashiilwe ku bantu bambi. Bukashonaula no kupwisha aya mabufumu yonse, kabili bwena bukeminina umuyayaya.”—Daniele 2:44.

Inkondo no kukowesha icalo fikapwa. Pa kulondolola ifyo Lesa akacita, Amalumbo 46:9 yatila: “Alelenga inkondo ukupwa ukufika ku mpela sha pano isonde; ubuta abukontola kabili aputaula ne fumo; aoca na maceleta mu mulilo.” Baibolo isambilisha no kuti Lesa “akonaula abaleonaula isonde.”—Ukusokolola 11:18.

Ulukaakala no lufyengo fikapwa. Baibolo yalaya ukuti: “Abalungama e bakekala pa calo, na ba kaele e bakashalapo. Lelo ababifi,  bakalofiwa mu calo; na ba bufi, bakabafumpulamo.” *—Amapinda 2:21, 22.

2 Ni Lilali Impela Ikesa?

Yehova Lesa alibika “inshita” iyo akapwishishapo ububifi no kuleta Ubufumu bwakwe. (Marko 13:33) Lelo Baibolo yalindolola bwino bwino ukuti fwe bantu te kuti twishibe ubushiku impela ikesa. Yesu atile: “Ulwa bushiku bulya ne nshita takuli uwaishiba, nangu ni bamalaika ba mu muulu nangu Mwana, kano fye Tata.” (Mateo 24:36) Na lyo line, Yesu na basambi bakwe balisobele ifintu ifikalacitika pano calo ilyo Lesa ashilaleta impela. Nga ca kuti ifi fyonse fyatendeka ukulacitika mu calo conse kabili pa nshita imo ine, ninshi impela naipalama nga nshi.

Ifimfulunganya mu mitekele, utuyofi, ne fimfulunganya fiba mu bwikashi nafiseeka sana muno nshiku. Ilyo abasambi ba kwa Yesu bamwipwishe pa mpela ya calo, pa kubasuka, Yesu alandile ukuti: “Uluko lukemina uluko lubiye no bufumu bukemina ubufumu bubiye, kukaba ifinkukuma mumo mumo, kukaba ne fipowe. Ifi fintu e kutendeka kwa bucushi ubukaba ngo kucula kwa pa kupaapa.” (Marko 13:8) Umutumwa Paulo alembele ukuti: “Mu nshiku sha kulekelesha mukesaba inshita ishayafya nga nshi. Pantu abantu bakaba abaitemwa, abatemwa indalama, aba mataki, aba matutumuko, aba miponto, abashumfwila abafyashi babo, abashitasha, abashaba na cishinka, abashatemwa abantu, abashifwaya ifipangano, aba lwambo, abashailama, abankalwe, abashatemwa ubusuma, abafutuka abanabo, bamunshebwa, aba cilumba, abatemwa ukwangala ukucila ukutemwa Lesa.”—2 Timote 3:1-5.

Imbila nsuma ileshimikilwa mu ndimi ishingi mu calo conse. Yesu atile: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.”—Mateo 24:14.

3 Cinshi Cikakonkapo Icalo nga Capwa?

Baibolo taisambilisha ukuti abantu bonse abasuma bakaya ku muulu uko bakalasangalala ku ciyayaya. Lelo, Yesu alesambilisha ukuti ukufwaya kwa kwa Lesa ukwa pa kubala kukafikilishiwa. Atile: “Balipaalwa abafuuka, pantu bakapyana isonde.” (Mateo 5:5; 6:9, 10) Kuli balya abakafwa ilyo impela tailaisa, Baibolo yalaya ukuti bakabuuka. (Yobo 14:14, 15; Yohane 5:28, 29) Cinshi cikakonkapo icalo nga capwa?

Yesu akaba Imfumu mu Bufumu bwa kwa Lesa kabili akalatekela mu muulu. Kasesema Daniele atile: “Nakonkenyepo ukulolesha mu fimonwa fya bushiku, kabili, moneni! umo uwaba ngo mwana wa muntu [Yesu uwabuushiwa] aleisa na makumbi ya mu muulu; awe aisa afika na ku Wa Nshiku ne Nshiku [Yehova Lesa], e lyo bamupalamika kuli ena. Kabili [Yesu] bamupeele ukuteka no bukata no bufumu, pa kuti abantu na bantu bonse, aba nko ne ndimi bamubombele. Ukuteka kwakwe kuteka kwa muyayaya ukushakapite, no bufumu bwakwe tabwakonaulwe.”—Daniele 7:13, 14; Luka 1:31, 32; Yohane 3:13-16.

Abakalatekwa no Bufumu bwa kwa Lesa bakaba no bumi ubusuma, bakekala umutende, kabili umuyayaya. Kasesema Esaya alembele ukuti: “Bakakuula amayanda no kwikalamo; bakalima na mabala ya myangashi no kulya ifisabo fya yako. Tabakakuule amayanda e lyo bambi bakekalemo; tabakalime amabala e lyo bambi bakalye ifisabo.” (Esaya 65:21-23) Umutumwa Yohane alembele pali  iyi nshita, ukuti: “Moneni! Itenti lya kwa Lesa lili pamo na bantunse, kabili akekala pamo na bo, kabili bakaba abantu bakwe. Na Lesa umwine akaba pamo na bo. Kabili akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—Ukusokolola 21:3, 4.

4 Finshi Mufwile Ukucita pa Kuti Mukapusuke Impela ya Calo?

Umutumwa Petro alandile ukuti bamo abakalaikala mu nshita ya ku mpela bakalapumya abakalashimikila ukuti Lesa akafumyapo imitekele ya bantu no kupwisha ububifi pano calo. (2 Petro 3:3, 4) Na lyo line, akoseleshe abaleikala muli shino nshiku ukucita ifyakonkapo.

Sambilileni ku fyacitike kale. Petro alembele ukuti: “Lesa talekele fye ukwabula ukukanda aba pano calo aba ku kale, lelo apuswisheko fye Noa, uwaleshimikila abantu pa fyalungama, kabili apuswishe na bambi 7 ilyo aletele ilyeshi pa ba pano calo abashipepa.” (2 Petro 2:5) Ilyo Petro alelanda pali bakapumya atile: “Aba bantu tabafwaya fye ukwibukisha ukuti kale Lesa apangile imyulu kwi shiwi lyakwe. Lesa kabili kwi shiwi alengele isonde limoneke ukufuma mu menshi  kabili alengele amenshi yambi yabe pa muulu we sonde. Kabili Lesa aonawile aba cilya calo ku menshi ilyo acibunshishe mu lyeshi. Lelo kwi shiwi limo line imyulu ne sonde * ifya nomba fyasungilwa umulilo kabili fyasungilwa ubushiku bwa bupingushi kabili ubwa konaula abantu abashipepa.”—2 Petro 3:5-7.

Mulekonka amafunde ya kwa Lesa. Petro alembele ukuti abafwaya ukupusuka impela ya calo bafwile ukuba ne “mibele ya mushilo ne milimo ya bukapepa.” (2 Petro 3:11) Moneni ukuti Petro akomaile pa kuba ne “mibele ya mushilo” ne “milimo ya bukapepa.” Kanshi fingi tulingile ukucita, te kulanda fye ukuti twalikwata icitetekelo nelyo ukwisasensela lilya kawa e lyo twalafwaya ukusekesha Lesa.

Nomba mibele nshi ne milimo ifisekesha Lesa? Bushe te kuti mutemwe ukulinganya ifyo mwaishiba pali ili lyashi ku fyo Baibolo isambilisha? Inte sha kwa Yehova kuti batemwa nga nshi ukumwafwa. Mukabebe bakamulange apo mwingasanga amasuko muli Baibolo yenu. Ukucite fyo kukalenga ukuti mwikalatiina ifikacitika ku ntanshi, te mulandu ne fintu fya kutiinya ifilecitika mu calo.

[Amafutunoti]

[Amashiwi pe bula 7]

Isonde talyakonaulwe, abantu abonaula isonde e bakonaulwa