Balileka Ukutiina Impela ya Calo

KU KUPWA kwa ba 1970, ba Gary na ba Karen balishininkishe ukuti impela ya calo yalipaleme nga nshi. E ico, bafumine mu musumba no kuya mu kwikala mu mpanga kabili basalilepo ukulaikalila abene pantu balefwaya ukupusuka impela ya calo.

Pa kuti bengeshiba imilimo yalekanalekana iyo bali no kulabomba, balishitile ifitabo fyalekanalekana, balisambilile imilimo yalekanalekana, kabili balilandile na bantu abengi ababapandileko amano. Balilimine ibala no kulimba imiti ya fisabo 50. Balilonganike imbuto ne fibombelo. Balisambilile ifya kulima no kusunga ifya kulya. Umunabo alibasambilishe ifya kwipaya no kukanga inama. Ba Karen balibalangile ifimenwa fya mu mpanga ne mishila ifyo bengalalya ifya kulya nga fyapwa. Ba Gary balisambilile ifya kupanga amafuta ya kwambushisha umulilo, ukupanga ifitofu fya mbao, no kukuula ing’anda ukubomfya imiti ne fimenwa fya mu mpanga.

Ba Karen batile: “Ifintu fyalibipile pali ilya nshita ica kuti nalemona kwati impela yalaisa nomba line fye.” Ba Gary nabo batile: “Na ine nalebombesha nga filya fine na balumendo bambi balecita, nalefwaya ukupwisha akapaatulula, inkondo yali ku Vietnam, na mafisakanwa. Lelo tapakokwele nalifuupwike. Natampile ukutontonkanya ukuti ifintu nga fyatwalilila muli uyu musango abantu bali no kuiletelela.”

Ba Gary batile: “Bushiku bumo nalikwete inshita, e co nabulile Baibolo no kutendeka ukubelenga ukufuma pali Mateo ukufika ku Ukusokolola. Mu nshiku shine ishakonkelepo  nalibelengelemo na kabili. Ubushiku bwalenga busano ulucelo, naebele Karen ukuti: ‘Tuleikala mu nshiku sha kulekelesha. Nomba line Lesa ali no kupwisha ububifi pano calo. Tufwile ukufwaya abantu abakapusuka.’” Ba Gary na ba Karen batendeke ukuya ku macalici ayalekanalekana pa kuti basange abantu abalecita ifingalenga baisapusuka impela ya calo.

Tapakokwele, Inte ya kwa Yehova imo yalibatandalile, kabili balitendeke ukusambilila Baibolo. Ba Karen bebukisha ukuti: “Nalitemenwe nga nshi pantu baletulondolwela ifyo Amalembo yalanda. Nalefwaya sana ukwishiba icine pa mpela ya calo, kabili nalisangile icine. Nalikwete isubilo lyakosa ilya ku ntanshi. Ne cawamishe ca kuti natampile ukuba cibusa wa kwa Shifwe wa mu muulu, Kabumba, kabili Lesa wa bubumbo bonse.”

Ba Gary batile: “Nalishibe ico nabela pano calo. Nga natampa ukuisambilisha Baibolo, nshalefwaya ukuleka. Nalibelengele ukusesema kwaba mu Baibolo, nalipitulwike mu bushininkisho ubulanga ukuti kukafikilishiwa, kabili nalishininkishe ukuti Lesa ali no kucitapo cimo nomba line. Naletontonkanya ukuti: ‘Ico abantu bafwile ukulacita te fintu ifingabacingilila ku kayofi iyo, lelo bafwile ukulacita ifingalenga baisakwata umweo uo Lesa afwaya ukuti tukakwate.’” Ba Gary na ba Karen balilekele ukutiina ifyali no kucitika ku ntanshi. Mu nshita ya kuti baletiina impela ya calo, bacetekele ukuti Lesa ali no kupwisha amafya yonse ayacusha abantu kabili ali no kulenga isonde ukuba paradaise na kabili.

Apo napapita imyaka 25 ukutula apo ba Gary na ba Karen baishibila icine pa mpela ya calo, bushe finshi bacita pali ino nshita? Ba Karen batila: “Nalitwalilila ukukosha bucibusa bwandi na Yehova Lesa ne citetekelo nakwata muli ena, kabili ndesha ukwafwako na bambi ukucita cimo cine. Ine na ba Gary tulabombela pamo pa kuti tukoshe ulupwa lwesu na pa kuti bonse tube abakosa mu kupepa Lesa. Tulatantika bwino ifya kucita, kabili tulesha ukukanafusha imitabotabo mu mikalile yesu pa kuti tulebika amano kuli bambi na ku fyo bakabila.”

Ba Gary nabo batile: “Lyonse ndapepa ukuti Ubufumu bwa kwa Lesa bwise ku kulubula abantu abengi nga nshi ku macushi. Lyonse ilyo ndeshimikilako bambi imbila nsuma ya Bufumu bwa kwa Lesa, ndapepa ukuti umo pa bantu abo nalashimikilako asubile mu malayo yaba mu Baibolo. Pa myaka ukucila 25 iyo nabomba uyu mulimo, Yehova alyasuka ipepo yandi. Ine na Karen twacetekela ukuti nomba line Yehova ali no kwalula ifintu pano calo, kabili tatutiina ne fikacitika ku ntanshi.”—Mateo 6:9, 10; 2 Petro 3:11, 12.

[Icikope pe bula 9]

Pali nomba ba Gary na ba Karen balaipakisha ukwafwako bambi ukusubila mu fyo Baibolo yalaya