Isukulu Lya Gileadi Ilyalenga 128

Bamishonari Babatuma ku ‘Kulenga Abantu Ukuba Abasambi’

ILYO ba David Splane aba mwi Bumba Litungulula ilya Nte sha kwa Yehova balesengela abantu ku kulongana ukwaweme nga nshi, batile: “Pa kuti abantu aba mu fyalo fyonse bakomfwe imbila nsuma, Abena Kristu bamo balingile ukuitemenwa ukusha balupwa na mayanda yabo no kuya mu kushimikila imbila nsuma mu fyalo fimbi.”

Pa 13 March, 2010, mupepi na bantu 8,000 balilongene ilyo aba mwi Sukulu lya Gileadi ilyalenga 128 balepwisha isukulu. Ifibusa fyabo, balupwa, na bafumine mu fyalo 27 e basangilwe kuli uku kulongana.

“Abasambi Tabaleikala fye pa Ng’anda”

Ilyo Munyinefwe Splane, uwali ceyamani, asengele abalongene, alandile pe funde Yesu apeele abasambi bakwe ilya kuti: “E ico kabiyeni, kalengeni aba nko shonse ukuba abasambi.” (Mateo 28:19, 20) Akomailepo ukuti Yesu aebele abasambi bakwe ukulakonkela abantu. Kwena, ca cine ukuti abantu ukufuma ku Mesopotamia, ku North Africa, na ku fyalo fimbi ifyaletungululwa no buteko bwa bena Roma balishile ku Yerusalemu pa Pentekoste mu 33 C.E., kabili balyumfwile imbila nsuma. Na lyo line, ba Splane batile: “Abasambi tabaleikala fye pa ng’anda ukulalolela ukuti abantu aba nko shonse bese uko bali. Baliile ku mpela ya pano isonde ku kufwaya abantu abo bengashimikila.”—Imilimo 1:8.

Munyinefwe Splane atile: “Yesu taebele fye abasambi ifya kucita iyo, lelo alibasambilishe ne fyo bali no kucita. Tabebele fye ukuti balingile ukulapepa, lelo alibalangile ne fya kupepa. Tabebele fye ukuti balingile ukulashimikila, lelo alibalangile ne fya kushimikila. Tabebele fye ukuti balingile ukulasambilisha bwino awe, alibalangile ne fyo balingile ukulacita pa kusambilisha bwino na pa kufika abantu pa mitima.”

Ilyo Munyinefwe Splane alelanda ku bafyashi ba balepwisha isukulu, ayambwile amashiwi ayo Yesu alaile abasambi bakwe aya kuti: “Moneni! nakulaba na imwe inshiku shonse mpaka na ku mpela ya calo.” (Mateo 28:20) Munyinefwe Splane akoseleshe abalongene ukuti Yesu akatwalilila ukusakamana abapwishishe isukulu ilyo bakabatuma mu fyalo fimbi.

“Mukaleitakisha”

Ba Anthony Morris aba mwi Bumba Litungulula bakoseleshe abapwile isukulu ukuti “mukaleitakisha.” Batile kwaliba ukuitakisha ukusuma e lyo no kuitakisha ukwabipa. Ukuitakisha ukwabipa ni kulya ukwa kuti umuntu alefwaya balemupeela umucinshi. Ukuitakisha ukusuma kwalilondololwa pali 1 Abena Korinti 1:31 apatila: “Uuleitakisha, aitakishishe muli Yehova.” Munyinefwe Morris atile: “Ukwishiba Yehova Lesa cintu ico twingaitakishishapo. Na kuba, ishuko ilikalamba nga nshi ilyo imwe na ine twakwata, lya kubilisha ili shina ilya mushilo, ukuba Inte sha kwa Yehova.”—Yeremia 9:24.

Lyena, Munyinefwe Morris akomaile pa kulenga ishina lya kwa Yehova ukwishibikwa lintu ashimike ifyacitikile mishonari umo mu Africa. Uyu mishonari no mwina mwakwe baleya mu kulanda ilyashi. Ilyo bafikile apo bacilike umusebo, umushilika umwaice asontele munyinefwe imfuti no kumwipusha ishina. Umwina mwakwe, uwaibukishe ifyo basambilile ku Gileadi, alimutepeleshe ukuti, “Mwebeni ukuti muli Nte ya kwa Yehova kabili muleya mu kulanda ilyashi.” Alyumfwilile ifyo umukashi amwebele kabili balibasuminishe ukupita. Ubushiku bwakonkelepo, baishileumfwa pa cilimba ukuti ba presidenti nabeba abashilika ukwikata abaleipaya abantu abaleita ukuti bamishonari! Ukuilondolola ukuti bali ni Nte sha kwa Yehova mu nshita ya kutila ni bamishonari, kwalengele ukuti  bebekata. Munyinefwe Morris alekeleshe ilyashi lyakwe na mashiwi ya kuti: “Ilyo mukafika uko bakamutuma, mukaleitakisha. Mukaleitakisha muli fyonse ifyo mukalacita ilyo Yehova akalamubomfya pa kuti akalumbanishiwe ku ciyayaya.”

“Bushe Mukatwalilila Ukubomba Umulimo Wenu?”

Ba Geoffrey Jackson, aba mwi Bumba Litungulula kabili abali kale bamishonari, balengele abapwishishe isukulu ukutontonkanya sana pa cipusho cili pa muulu. Baipwishe ukuti, “Ni mwi tulosha nga twatila umuntu ni mishonari?” Balondolwele ukuti ishiwi lya kuti “mishonari” lyafuma kwi shiwi lya ciLatini ilipilibula umuntu nelyo abantu abo bapeela umulimo waibela. Fwe Nte sha kwa Yehova, umulimo wesu wa kushimikila imbila nsuma no kwafwa abantu ukuba ifibusa fya kwa Lesa. Ilyo tubomba uyu mulimo tupashanya Yesu Kristu, uwabikile sana amano ku kubomba umulimo wakwe ilyo ali pano calo. Yesu aebele Kateka umwina Roma Ponti Pilato ukuti: “Ici e co nafyalilwa, kabili ici e co naishila pano calo, pa kuti mbe inte ku cine.”—Yohane 18:37.

Munyinefwe Jackson alengele abapwile isukulu ukutontonkanya pa lyashi lya mu Baibolo ililanda pa fyo abena Israele bacimfishe umusumba wa Yeriko. Pa nshiku 6 balebuuka pa maca, bafwala ifya kufwala fya bulwi, no kushinguluka Yeriko umuku umo no kubwelelamo ku ng’anda. Lyena atile: “Umuntu kuti amona kwati umulimo bakwete wa cabecabe fye.” Ba Jackson batile abashilika bamo nalimo baletontonkanya ukuti, ‘Tuleonaula fye nshita.’ Lelo pa bushiku bwalenga 7, abena Israele babebele ukushinguluka umusumba imiku 7 e lyo pa numa bali no kupunda ukupunda kwa bulwi ukukalamba. Cinshi cafuminemo? Ifibumba fyashingulwike Yeriko fyalibongolweke!—Yoshua 6:13-15, 20.

Kuli ili lyashi, Munyinefwe Jackson afumisheko amasambililo yane. (1) Ukuba ne cumfwila kwalicindama. Tufwile ukucita ifintu ukulingana ne fyo Yehova afwaya, te kulingana ne fyo tuletontonkanya. (2) Ukucetekela Yehova kwalicindama. “Citetekelo calengele amalinga ya Yeriko ukuwa” te maka ya bantunse iyo. (AbaHebere 11:30) (3) Tufwile ukuba abatekanya. Mu kupita kwa nshita, amapaalo ya kwa Yehova ‘yakamusanga.’ (Amalango 28:2) (4) Te kwesha ukuleka. Tamufwile ukulaba umulimo wenu. Munyinefwe Jackson alekeleshe na mashiwi ya kuti, “Nga muleibukisha ifi fishinka, mukatwalilila ukubomba umulimo wenu kabili mukalenga abantu ukulalumbanya Yehova no kumupeela ubukata.”

Amalyashi Yambi Ayaliko

“Muletemwa Baibolo E lyo no Wailembele.” Uyu e mutwe wa lyashi lyalandile ba Maxwell Lloyd, ababa muli komiti ya pa maofeshi yakalamba aya Nte sha kwa Yehova aya mu United States. Ba Lloyd baebele abalepwisha isukulu ukuti, “Mulemona amalyashi yaba mu Baibolo ukuti ya cine cine.” Lyena babakoseleshe ukuti: Mwikaleka ukutemwa Yehova Lesa. Mwikalaenekela ukuti bonse bakalaumfwa ifyo mukalasambilisha. Mukalelondolola icine ca mu Baibolo mu nshila iya-anguka pa kuti mukalefika pa mitima ya bantu mukalasambilisha. Mukabe abaicefya. Mwikalamoneka ku bantu kwati mwalishiba ifingi ukubacila. Mukalecita ifyo mukalasambilisha. Mukaleke abo mukalasambilisha bakalemona ukuti mwalicindika Baibolo icine cine.

“Lolekesheni Bamwankole.” Ba Michael Burnett, bakafundisha be sukulu lya Gileadi kabili abali bamishonari kale, balandile ilyashi lyakwete uyu mutwe. Batile twakulasakamikwa limo limo. Lelo, muleibukisha ukufunda kwa kwa Yesu ukutila: “Lolekesheni bamwankole, tabatanda imbuto nangu kuseepa, . . . lelo Lesa alabaliisha.” (Luka 12:24) Mu mafunde Lesa apeele abena Israele, bamwankole bali pa fyuni ifishasanguluka, ifyo abena Israele bashalelya. Balefimona ukuti fya bunani. (Ubwina Lebi 11:13, 15) Nangu ca kuti tafyasanguluka, Lesa alafiliisha. Munyinefwe Burnett atile: “E ico, ilyo mukasakamikwa, mukebukishe bamwankole. Nga ca kuti Lesa kuti asakamana ifyuni ifishasanguluka, ifya bunani, bushe te kuti acilepo ukusakamana imwe mwe basanguluka mu menso yakwe?”

“Nshikulufyenye Iyo.” Ba Mark Noumair, bakafundisha be sukulu lya Gileadi, balengele bonse abasangilweko ukutontonkanya pa  cilangililo Yesu alandile ica babomfi aba mwi bala lya myangashi. Bamo babombele ubushiku bonse. E lyo bambi babombele fye iawala limo. Na lyo line, bonse bapokele fye indalama shimo shine! Ababombele ubushiku bonse batampile ukuilishanya. Umwine we bala lya myangashi aebele umo pa baleilishanya ukuti: “Nshikulufyenye iyo. Bushe tatwacumfwana ati ndekulipila denari umo? Senda denari obe, kabiye.” (Mateo 20:13, 14) Cinshi tulesambililako? Lisambililo lya kukanailinganya kuli bambi. Munyinefwe Noumair atile: “Ukuilinganya kuli bambi kuti kwamupwishisha insansa. Ne cabipisha ca kutila kuti kwalenga mwaleka ukubomba umulimo wenu uwacindama nga nshi.” Ba Noumair bacinkwileko abalepwisha isukulu ukuti Yesu e utungulula umulimo wa kulobolola uwa mampalanya kabili kuti acita ico alefwaya ku basambi bakwe. Nga ca kuti Yehova na Yesu bapingulapo ukupeela bambi imilimo iingi ukumucila, ninshi tabamulufyenye iyo. Imwe mufwile ukubika amano ku mulimo wenu, kabili mwikaleka “amalipilo” ya bambi yakalenge mukalekeleshe umulimo Yehova amupeela ukubomba.

Ukushimika Ifyabacitikile mu Mulimo no Kwipusha Abapita Kale mu Sukulu

Nga tabalesambilila nelyo ukubelenga, abana be sukulu baleya mu kushimikila pamo ne filonganino fya Nte sha kwa Yehova ifyaba mupepi. Ba Sam Roberson, bakafundisha be sukulu lya Gileadi, baipwishe abana be sukulu bamo ukuti bashimike ifyabacitikile ilyo baleshimikila. Ku ca kumwenako, nkashi Alessandra Kirchler akumenye umufyashi umwanakashi uwasakamikwe sana pa mulandu wa kuti umwana wakwe alepeepa. Ba Alessandra balibweleleko na Awake! iyalelanda pa kupeepa. Nangu cingati pa ng’anda tapali abantu, balishile magazini. Ilyo babweleleko na kabili, balisangile ulya mufyashi kabili alibengishe mu ng’anda. Alitashishe sana pa kumutwalila ilya magazini kabili atile, “Ilingi line ndaipusha ukuti finshi Lesa alefwaya ukunsambilisha pa kundeka ukupita mu mafya yafule fi?” Ba Alessandra balibelengele na o Baibolo ukumulanga ukuti Lesa te ulenga ifyabipa ukucitika. (Yakobo 1:13) Pali ino nshita, banyina no mwana balasambilila Baibolo.

Ba Melvin Jones ababombela mu Dipartimenti ya Mulimo baipwishe abapita kale mwi sukulu lya Gileadi batatu: ba Jon Sommerud, ababombela ku Albania; ba Mark Anderson, ababombela mu Kenya; na ba James Hinderer, ababombela mu Dipartimenti Ilolekesha pa Masukulu ya Bulesa. Bonse batatu balandile ukuti abapita mwi sukulu lya Gileadi tababasambilisha fye icine ca mu Baibolo, lelo balabasambilisha ne fya kulaikala ukulingana ne cine ca mu Baibolo, te mulandu no ko bafuma nelyo uko babombela.

Umo pa balepwisha isukulu abelengele kalata ya kutasha iyalembele abali mu sukulu. Ba John Barr, abali ne myaka 96 kabili abakalamba pali bonse ababa mwi Bumba Litungulula ilya Nte sha kwa Yehova, e bapepele ipepo lya kulekelesha pali uku kulongana, kabili balombele Yehova ukupaala imilimo ya bali mwi sukulu lya Gileadi ilyalenga 128.

 [Charti na Mapu pe bula 31]

IFIPENDO FYA BALI MU KALASI

Bafumine mu fyalo: 8

Abasambi bonse pamo bali: 54

Bonse balyupa no kuupwa: 27

Imyaka ya kufyalwa: 35.2

Imyaka baba mu cine: 19.1

Imyaka babomba mu mulimo wa nshita yonse: 13.8

[Mapu]

(Nga mulefwaya ukumona charti na mapu, moneni muli magazini)

Babatumine mu fyalo 25 ifili pe samba:

IFYALO BABATUMINEKO

ALBANIA

ARUBA

BOLIVIA

CAMBODIA

CÔTE D’IVOIRE

DOMINICAN REPUBLIC

ECUADOR

GHANA

GUATEMALA

GUINEA

GUYANA

HONDURAS

INDONESIA

KOSOVO

LATVIA

LIBERIA

MADAGASCAR

MONGOLIA

NAMIBIA

NICARAGUA

PARAGUAY

ROMANIA

RWANDA

SERBIA

TAIWAN

(ICALO ICANGALILWA NO MUSAMBO WA KU AUSTRALIA)

[Icikope pe bula 30]

Abalepwisha isukulu balelangilila ifyo cali ilyo baleshimikila

[Icikope pe bula 31]

Abapwishishe Isukulu lya Gileadi Ilyalenga 128

Ukupenda kutampile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.

(1) Keller, E.; Ostopowich, I.; Jacobsen, S.; Arias, M.; Dieckmann, Y.; Tanaka, J.; Harada, K.

(2) Camacho, L.; Kirchler, A.; Rodríguez, S.; Ward, B.; Trenalone, K.; Victoria, V.; Oxley, F.; Nguyen, K.

(3) Oxley, O.; De Dios, A.; Lindström, C.; Allen, J.; Meads, T.; Waddington, J.; Victoria, E.

(4) Harada, H.; Lindström, A.; Orsini, E.; Logue, D.; Missud, T.; Bergeron, S.; Camacho, G.; Ward, T.

(5) Kirchler, W.; Nguyen, H.; Kremer, E.; Burgaud, C.; Titmas, N.; De Dios, C.; Rodríguez, A.; Waddington, M.

(6) Dieckmann, J.; Allen, C.; Titmas, R.; Arias, J.; Bergeron, E.; Keller, J.; Ostopowich, F.; Burgaud, F.

(7) Tanaka, K.; Kremer, J.; Jacobsen, R.; Trenalone, J.; Logue, J.; Meads, D.; Missud, D.; Orsini, A.