Ipepo

5 Ni Nshita Nshi Tulingile Ukupepa Kabili ni kwi Tulingile Ukupepela?

UKWABULA no kutwishika mwalimona ukuti aba mu mipepele iingi batila abantu bafwile ukuba mu fiyanda fya mapepo kabili balibika ne nshita abantu balingile ukuya mu kupepa. Bushe Baibolo yatila tufwile ukuya fye kuli ifi fiyanda pa kupepa kabili pa nshita iyo babika?

Baibolo ilanga ukuti kwaliba inshita ilyo tufwile ukupepa. Ku ca kumwenako, ilyo Yesu na basambi bakwe bashilalya ica kulya, Yesu alipepele ipepo ilya kutasha Lesa. (Luka 22:17) Na lintu abasambi bakwe balongene mu kulumbanya Lesa, balipepele pamo. Batwalilile ukucita ifyo balecita mu masunagoge ya baYuda na mwi tempele lya mu Yerusalemu. Lesa alefwaya ukuti itempele libe “ing’anda ya kupepelamo aba mu nko shonse.”—Marko 11:17.

Ababomfi ba kwa Lesa nga balongana pamo no kupepela pamo, alakutika ku mapepo yabo. Abali muli ilyo bumba nga basumina muli fimo fine e lyo ne pepo ilyo babapepelako nalilingana ne fyo Baibolo yalanda ati e fyo tulingile ukucita pa kupepa, Lesa alatemwa. Ipepo lya musango yo kuti lyalenga Lesa acita ne fyo ashaciba no kucita. (AbaHebere 13:18, 19) Inte sha kwa Yehova balapepela pamo lyonse nga balongana. Tulemukoselesha ukuyasangwa ku Ng’anda ya Bufumu iyaba mupepi no ko mwikala pa kuti mukayumfwile ifyo bapepa.

Lelo, Baibolo tayatila tufwile ukupepela fye pa ncende imo nelyo pa nshita imo. Mu Baibolo mwaba amalyashi yalanda pa babomfi ba kwa Lesa abalepepa pa nshita iili yonse nelyo ukuli konse uko bali. Yesu atile: “Ilyo ulepepa, ingila mu muputule obe, kabili ilyo waisalako iciibi, pepa kuli Wiso uushimoneka, e lyo wiso uumona umwafisama akakulambula.”—Mateo 6:6.

Mwandini aya mashiwi yasuma! Kuti mwapepa kuli Mulopwe wa bubumbo bonse pa nshita iili yonse, na lintu muli fye mweka, kabili Lesa kuti akutika kwi pepo lyenu. E mulandu wine Yesu ilingi line alefwaila ukuba eka nga alefwaya ukupepa. Bushiku bumo, aikele ubushiku bonse alepepa kuli Lesa. Afwile alefwaya ukuti Lesa amutungulule ilyo alepingula pa cintu icacindeme nga nshi.—Luka 6:12, 13.

Abaume bambi na banakashi abo Baibolo yalandapo balepepa pa kupingula pa fintu ifyacindama nga nshi nelyo nga bali na mafya ayakalamba. Limo balepongomoka pa kupepa e lyo limbi balepepela fye mu mutima; balepepela pamo na bambi e lyo na lintu baleba beka. Lelo icacindama ca kuti balepepa. Lesa aleba na babomfi bakwe ukuti: “Mulepepa ukwabula ukuleka.” (1 Abena Tesalonika 5:17) Lyonse alatemwa ukukutika ku mapepo ya bantu abacita ukufwaya kwakwe. Bushe aya mashiwi tayalelanga ukuti Yehova alitutemwa?

Kwena, muli cino calo, abantu abengi balatwishika nga ukupepa kuti kwa-afwa umuntu. Nalimo kuti mwaipusha ukuti, ‘Bushe ukupepa kuti kwangafwa?’

[Amashiwi pe bula 9]

Kuti twapepa inshita iili yonse kabili ukuli konse uko tuli