Bushe Ukulandila mu Ndimi Kwafuma Kuli Lesa?

BA DEVON bailishenye ukuti: “Ine cilampapusha. Lyonse nga naya ku calici abengi bamoneka kwati balapokelela umupashi wa mushilo no kutampa ukulandila mu ndimi shalekanalekana. Bamo abapokelela umupashi balacita ifyabipa. Ine ndesha sana ukukonka amafunde ya mu Baibolo, lelo nangu impepe shani, nshipokelela umupashi. Ninshi cinshi cabela ifi?”

Ba Gabriel nabo baya ku calici uko abantu bamoneka kwati balapokelela umupashi wa mushilo no kutendeka ukulandila mu ndimi. Batile: “Icinkalipa sana ca kuti nga ndepepa, bambi balampumfyanya pantu balapata kabili ifyo balanda nshumfwa e lyo na bene nabo tabafyumfwa. Tapaba uunonkela mu fyo balanda. Lesa nga apeela abantu umupashi wakwe, tali ninshi pali umulandu abapeelele?”

Ba Devon na ba Gabriel balikwata icipusho ico na ifwe bene nalimo twingatemwa ukwishiba icasuko. Ici cipusho ca kuti, Bushe ukulandila mu ndimi ukucitika mu macalici pali ino nshita kufuma kuli Lesa? Pa kwasuka ici cipusho, intanshi natumone umulandu Lesa apeelele Abena Kristu ba kubalilapo ica bupe ca kulandila mu ndimi.

‘Batendeke Ukulandila mu Ndimi Shalekanalekana’

Baibolo yalanda ukuti kale kwali abaume na banakashi abo bapeele amaka ya kulandila mu ndimi isho bashasambilile. Umuku wa kubalilapo ici cacitike, ni pa Pentekoste mu 33 C.E., ilyo papitile fye imilungu iinono ukutula apo Yesu Kristu afwilile. Pali ubu bushiku, abasambi ba kwa Yesu 120 abali mu Yerusalemu “baiswilemo umupashi wa mushilo no kutendeka ukulanda indimi shalekanalekana.” Abantu abafumine ku fyalo fimbi ‘balipapile, pantu umo na umo aumfwile abasambi balelandila mu lulimi lwakwe.’—Imilimo 1:15; 2:1-6.

Baibolo yalilanda pa basambi ba kwa Yesu na bambi abo bapeele ici ca bupe. Ku ca kumwenako, ilyo umutumwa Paulo apokelele umupashi wa mushilo, atampile ukulanda indimi ishingi. (Imilimo 19:6; 1 Abena Korinti 12:10, 28; 14:18) Lelo kwali umulandu Lesa apeelele umupashi wa mushilo kuli aba bantu. Bushe mulandu nshi kale Lesa alepeelela abantu ubupe bwa kulandila mu ndimi?

Icishibilo ca Kuti Lesa Aali Nabo

Ilyo umutumwa Paulo alembele kalata ku Bena Kristu baleikala mu Korinti, alondolwele ukuti “indimi cishibilo ku bashatetekela.” Bamo pali aba Bena Kristu nalimo balikwete ica bupe ca kulandila mu ndimi. (1 Abena Korinti 14:22) Kanshi nge fyo cali na ku fya bupe fimbi ifya kucita  ifipesha amano, ukulandila mu ndimi kwali cishibilo ku bantu bambi ica kuti icilonganino capangilwe ica Bena Kristu caletungululwa na Lesa. Kanshi ifya bupe fya kucita ifipesha amano fyali kwati cishibilo cali mu mbali ya musebo icalelanga abalefwaya ukwishiba icine uko bali no kusanga abantu abo Lesa asalile.

Lelo, Baibolo tayalandapo ukuti Yesu nangu bakasesema abaliko ilyo ashilaisa pano calo balelandila mu ndimi isho bashasambilile. Ici cilelanga ukuti kwali umulandu na umbi uo abasambi ba kwa Yesu babapeelele ica bupe ica kulandila mu ndimi.

Cali no Kubafwa Ukushimikila Imbila Nsuma Kuli Bambi

Ilyo Yesu atendeke fye ukushimikila, aebele abasambi bakwe ukuti bali no kulashimikila fye ku baYuda. (Mateo 10:6; 15:24) Ici calengele ukuti abasambi belaya sana ku ncende ukushafulile abaYuda. Lelo ifintu fyali no kwaluka.

Ilyo papitile inshita iinono ukutula apo afwilile mu 33 C.E., Yesu uo babuushishe ku bafwa aebele abasambi bakwe ‘ukulenga aba nko shonse ukuba abasambi.’ Abebele no kuti bali no kuba inte shakwe ukufika na “ku mpela ya pano isonde.” (Mateo 28:19; Imilimo 1:8) Pa kushimikila imbila nsuma ukufika na ku mpela ya pano isonde, abasambi tabalekabila ukulashimikila fye mu ciHebere, lelo balekabila no kulabomfya indimi shalekanalekana.

Lelo, abengi pa basambi ba kubalilapo bali “abashasambilila.” (Imilimo 4:13) Nomba bali no kushimikila shani mu fyalo fimbi umo balelanda indimi isho bashatalile abomfwapo nelyo isho bashasambilile? Umupashi wa mushilo walengele abasambi bamo abali abacincila mu kushimikila imbila nsuma ukulalanda bwino sana indimi isho bashasambilile.

Kanshi kwali imilandu ibili iyo Lesa apeelele abasambi ica bupe ica kulandila mu ndimi. Uwa kubalilapo wa kuti, cali cishibilo ica kuti baletungululwa na Lesa. Uwa bubili wa kuti, ukulandila mu ndimi kwali no kwafwa Abena Kristu ba kubalilapo ukupwisha umulimo babapeele uwa kushimikila ku bantu abalelanda indimi ishalekanalekana. Bushe ifi e fyo caba na ku kulandila mu ndimi ukucitwa mu macalici muno nshiku?

Bushe Ukulandila mu Ndimi Ukwa Muno Nshiku Cishibilo ca Kutungululwa na Lesa?

Nga mulefwaya ukubika icishibilo icingafwa abantu abengi, bushe ni kwi mwingacibika? Bushe ni mu cikuulwa icinono? Awe nakalya! Ilyashi lilanda pa fyacitike pa Pentekoste litila “abantu abengi nga nshi” abalepita balimwene icishibilo cakwete abatumwa ica kulandila mu ndimi. Icafuminemo ca kuti pali bulya bushiku, ku cilonganino ca Bena Kristu “kwalundilweko abantu nalimo 3,000.” (Imilimo 2:5, 6, 41) Apo abantu abatila balalandila mu ndimi muno nshiku baba fye mu fikuulwa ifyo bapepelamo, bushe ukulandila mu ndimi kuti kwaba shani cishibilo ku bantu abengi nga nshi abashatetekela?

Icebo ca kwa Lesa citila ubulalelale ne “micitile [imbi iya] muntu umubembu” filacilikila umupashi wa mushilo, no kuti abacita “ifyaba ifi tabakengile mu bufumu bwa kwa Lesa.” (Abena Galatia 5:17-21) Nga mwamona abantu abacita ifyabipa balelandila mu ndimi, ukwabula no kutwishika kuti mwaipusha amuti, ‘Bushe ukupeela umupashi wa mushilo ku bantu abatwalilila fye ukucita ifyo Baibolo yalanda ukuti fyalibipa, takwingapusana ne fyo caleba kale, kabili bushe te kuti kulufye abantu?’ Ukucita ifi cimo cine fye no kubika icishibilo mu mbali ya musebo iciletungulula abantu uko bashifwile ukuya.

Bushe Ukulandila mu Ndimi Ukwa Muno Nshiku Kulabafwa Ukushimikila Kuli Bambi?

Inga pa mulandu walenga bubili uo Lesa apeelele abasambi ica bupe ca kulandila mu ndimi kuti twalandapo shani? Bushe ukulandila mu ndimi ukucitwa mu macilici muno nshiku kulabafwa ukushimikila imbila nsuma ku bantu abalanda indimi shalekanalekana? Mwilaba ukuti abantu abalongene mu Yerusalemu pa Pentekoste mu 33 C.E. bafumine ku fyalo ifingi, lelo baleumfwa ifyo abasambi ba kwa Yesu balelanda ilyo balelandila mu ndimi ishalekanalekana. Nomba abalandila mu ndimi muno nshiku balanda ifyo abantu bashingomfwa.

 Camoneka fye apabuuta ukuti ukulandila mu ndimi ukwa muno nshiku kwalipusana sana ne ca bupe ca mupashi wa mushilo ico Lesa apeele ku basambi ba kwa Yesu. Na kuba, takwabapo icalembwa icilanga ukuti abantu balepokelela ici ca bupe ilyo abatumwa bafwile. Ici te kuti cipapushe ababelenga Baibolo. Umupashi wa mushilo walengele umutumwa Paulo ukusobela icikacitika ku fya bupe fya kucita ifipesha amano, ukubikako no kulandila mu ndimi kwine, ukuti: “Fikapwa.” (1 Abena Korinti 13:8) Nomba, bushe kuti twaishiba shani abatungululwa no mupashi wa mushilo muno nshiku?

Bushe ni Bani Mumona Ukuti E Bakwata Umupashi wa Mushilo?

Yesu alishibe ukuti ica bupe ca kulandila mu ndimi cali no kupwa icilonganino ca Bena Kristu nga capangwa fye. Ilyo kwashele inshita iinono ukuti afwe, alilandile pa co abantu bali no kulaishibilako abasambi bakwe aba cine. Atile: “Nga muletemwana, e lyo bonse bakeshiba ukuti muli basambi bandi.” (Yohane 13:35) Na kuba, muli cilya cine cikomo umo Baibolo yasobele ukuti ifya bupe ifya kucita ifipesha amano fikapwa, yalilanda no kuti: “Ukutemwa takupwa.”—1 Abena Korinti 13:8.

Pa “fisabo” fya mupashi 9, nelyo imibele, iyo umupashi wa kwa Lesa ulenga umuntu ukukwata iyo balandapo mwi buuku lya Abena Galatia, ukutemwa e ko babalilapo ukulumbula. (Abena Galatia 5:22, 23) E ico, abantu abakwata umupashi wa mushilo, abatungululwa na Lesa, bafwile ukutemwana nga nshi. E lyo icisabo calenga butatu ica mupashi, mutende. Kanshi abakwata umupashi wa mushilo muno nshiku bafwile ukuba aba mutende, tabafwile ukuba no musobolola, akapaatulula, no lubuli.

Ibukisheni na kulya kusesema kwa kwa Yesu ukwaba pa Imilimo 1:8. Asobele ukuti abasambi bakwe bali no kupokelela amaka ayali no kulenga babe inte shakwe ukufika “ku mpela ya pano isonde.” Na kabili Yesu alandile ukuti uyu mulimo wali no kutwalilila “mpaka na ku mpela ya calo.” (Mateo 28:20) E ico, uyu mulimo wa kushimikila mu calo conse ukatwalilila ukuba ica kwishibilako abantu abo umupashi wa mushilo upeela amaka.

Bushe muletipo shani? Bantu nshi mulemona ukuti e batungululwa no mupashi wa mushilo muno nshiku? Ni bani abakwata ifisabo fya mupashi, maka maka ukutemwa no mutende, ica kuti balabacushishapo na ku mabuteko pa mulandu wa kukaana ukulwako inkondo mu calo conse? (Esaya 2:4) Bushe ni bani abesha na maka ukukanaba ne micitile ya muntu umubembu, pamo nga ubulalelale? Kabili bushe ni bani abatamfya mu cilonganino cabo abantu abacita ifi fintu ukwabula ukulapila? (1 Abena Korinti 5:11-13) Ni bani abashimikila imbila nsuma mu calo conse iya kuti Ubufumu bwa kwa Lesa e bukafumyapo amafya abantunse bapitamo?—Mateo 24:14.

Abalemba ino magazini tabalepita na mu mbali ukulanda ukuti ni Nte sha kwa Yehova fye e bakwata fyonse ifyo Baibolo yalanda ukuti e fya kwishibilako abakwata umupashi wa mushilo. Kuti cawama mwaishiba ifyo basuminamo pa kuti mwe bene mukaimwene nga cine cine batungululwa no mupashi wa mushilo uwa kwa Lesa nelyo iyo!