Ukulanshanya no Munensu Ilyashi lya mu Baibolo Bushe Umupashi wa Mushilo Cinshi?

INTE SHA KWA YEHOVA balatemwa sana ukulanshanya Baibolo na bantu. Bushe kwaliba ilyashi ilyo Baibolo yalandapo ilyo mufwaisha ukwishiba? Bushe mulafwaya ukwishiba ifyo Inte sha kwa Yehova basuminamo nelyo umulandu bashicitilako ifintu fimo? Nga e fyo caba, mukabepushe nga bamutandalila. Bakatemwa sana ukulanshanya na imwe pali ayo malyashi.

Ifi e fyo Inte sha kwa Yehova balanshanya na bantu. Natutile Nte we shina lya kuti Scott aya mu kushimikila pa ng’anda ya muntu we shina lya kuti Brad.

Bushe Mwacilosha mwi Ilyo Mwacilanda ati “Mupashi wa Mushilo”?

Brad: Bamo balanda ukuti Inte sha kwa Yehova te Bena Kristu. Tamwasumina muli mupashi wa mushilo.

Scott: Icishinka ca kuti fwe Nte sha kwa Yehova tuli Bena Kristu. E cilengele no kuti njise pano luno lucelo ni co nalisumina muli Yesu Kristu. Na kuba, Yesu e waeba abasambi bakwe ukulashimikila. Kanjipusheko, bushe mwacilosha mwi ilyo mwacilanda ati “mupashi wa mushilo”?

Brad: Nacilalanda pali mupashi wa mushilo, lesa uwalenga butatu, kabili kaafwa uo Yesu alaile ukututumina. Uyu kaafwa alicindama sana kuli ine. Mfwaya ukuti alentungulula lyonse.

Scott: Ifyo fine e fyo abengi basumina ukuti umupashi wa mushilo ni lesa. Inshita imo, nalifwailishepo pa fyo Baibolo isambilisha pali ili lyashi. Nga namukwata inshita iinono, kuti natemwa ukumulangako ifyo nasambilile.

Brad: Ee, akashita kena ninkwata.

Scott: Na kuba, ishina lyandi nine Scott. Nga imwe, ni mwe bani?

Brad: Nine Brad. Cawama twaishibana.

Scott: Na ine natemwa sana ukumwishiba ba Brad. Pa kuti nimupoosela sana inshita lekeni nande fye pa cishinka cimo. Mwacitila umupashi wa mushilo ni kaafwa uo Yesu alaile ukututumina. Ico musosele ca cine. Lelo bushe mwasumina ukuti umupashi wa mushilo walilingana na Lesa?

Brad: Ee, e fyo nasambilila.

Bushe Umupashi wa Mushilo na o ni Lesa?

Scott: Lekeni tubelenge amashiwi yaba mu Baibolo ayalatwafwa ukwishiba nga ca kuti umupashi wa mushilo na o ni lesa nelyo iyo. Nalimo mwalibelengapo aya mashiwi. Pa Imilimo 2:1-4 patila: “Nomba ilyo ubushiku bwa Pentekoste bwali tabulapwa, bonse bali pa ncende imo, kabili mu kupumikisha mu muulu mwaumfwikike icongo kwati cipuupu icikali ica mwela, kabili cakumene ing’anda yonse umo baikele. Kabili indimi ishapala umulilo  shamoneke kuli bena kabili shalisalangene, no kwikala pali umo na umo, e lyo bonse baiswilemo umupashi wa mushilo no kutendeka ukulanda indimi shalekanalekana, nge fyo umupashi walebeba.”

Brad: Ee, nalilishiba sana ili lembo.

Scott: Nomba ba Brad, bushe umuntu kuti aisula mu muntu munankwe?

Brad: Iyo.

Scott: Natubelenge amashiwi na yambi muli ici cine cipandwa, pa cikomo 17. Amashiwi ya kubalilapo muli ici cikomo yaleti: “‘Kabili mu nshiku sha kulekelesha,’ e fyo Lesa atila, ‘nkapongolwela umupashi wandi pa bantunse bonse.’” Batini ba Brad, bushe Lesa kuti apongolola Lesa munankwe, uo alingana nankwe?

Brad: Awe, nakalya.

Scott: Yohane Kabatisha abomfeshe insoselo imbi ilyo alelanda pa kwisulamo no mupashi wa mushilo. Amashiwi asosele yaba pali Mateo 3:11. Belengenipo mukwai.

Brad: “Ine ndemubatisha mu menshi pa mulandu wa kulapila kwenu; lelo uuleisa pa numa alincila amaka, kabili nshalinga ukumufuula indyato. Ulya ena akamubatishisha ku mupashi wa mushilo na ku mulilo.”

Scott: Mwabelenga bwino sana. Bushe mwamona ifyo Yohane Kabatisha atile e fyo Yesu ali no kubomfya umupashi wa mushilo?

Brad: Atile ali no kubabatishisha ku mupashi wa mushilo.

Scott: Cishinka ico. Alandile no kuti akababatishisha ku mulilo. Ukwabula no kutwishika umulilo te muntu. Bushe muletontonkanya ukuti ili lembo lilelanda ukuti umupashi wa mushilo muntu?

Brad: Iyo.

Scott: Kanshi ukulingana na malembo twabelenga umupashi wa mushilo te Lesa.

Brad: Ee, e fyo camoneka.

Bushe ni mu Nshila Nshi Umupashi wa Mushilo Wabela “Kaafwa”?

Scott: Ilyo twacitendeka ukulanshanya mwacilanda ukuti umupashi wa mushilo ni “kaafwa.” Pali Yohane 14:26 Yesu atile umupashi wa mushilo ni “kaafwa.” Lekeni tubelengele pamo ili lembo, patila: “Lelo kaafwa, umupashi wa mushilo, uo Tata akatumina mwi shina lyandi, akamusambilisha fyonse no kumwibukisha fyonse ifyo namwebele.” Bamo bamona kwati ili lembo e lilanga ukuti umupashi wa mushilo muntu, uwingafwa no kusambilisha abasambi.

Brad: Ee, na ine wine e fyo naishiba.

Scott: Bushe te nsoselo fye Yesu abomfeshe pali ili lembo? Moneni ica kumwenako na cimbi. Pa Abena Roma 5:14 patila: “Imfwa yalitekele ukufuma pali Adamu ukufika kuli Mose.” Bushe kuti mwatila imfwa muntu, kuti yaba imfumu kabili kuti yatuteka?

Brad: Awe. Iyi ni nsoselo fye.

Scott: Ca cine ico mwalanda. Ili lembo lilelanga fye ukuti imfwa yalikwata amaka pali ifwe, yalituteka ubusha. Mu Baibolo mwaliba insoselo umo balanda pa fintu fimbi kwati balelanda pa bantu. Na ifwe bene twalikwata insoselo sha musango yu. Ku ca kumwenako, bushe tamwaumfwapo abantu basosa ukuti, “we mfwa tawaba na luse”?

Brad: Nalyumfwapo! Na ine wine kuti nalanda ifyo fine.

Scott: Bushe kuti mwatila imfwa muntu umunkalwe, uushaba na luse?

Brad: Awe, nakalya. Ni nsoselo fye.

Scott: Nomba ilyo Yesu alandile pa mupashi wa mushilo ukuti ni kaafwa, nelyo kasambilisha, bushe te nsoselo fye alebomfya?

Brad: E fyo cilemoneka kwena. Ici caumfwana na yalya malembo mwacibelenga ayacilati umupashi balaupongolola no kuti abantu bakababatishisha ku mupashi. Nomba umupashi wa mushilo nga te muntu, ninshi cinshi?

 Bushe Umupashi wa Mushilo Cinshi?

Scott: Pa Imilimo 1:8, Yesu alilondolwele bwino bwino umupashi wa mushilo. Mukwai belengenipo.

Brad: “Mukapokelela amaka ilyo umupashi wa mushilo ukesa pali imwe, kabili mukaba inte shandi mu Yerusalemu na mu Yudea monse na mu Samaria, na ku mpela ya pano isonde.”

Scott: Pano Yesu alondolola umupashi wa mushilo ukuti maka. Kabili ukulingana ne lembo twabelenga, bushe mulemona ukuti aya maka yafuma kwi?

Brad: Ni kuli Lesa Wishi.

Scott: Mwalungika. Umupashi wa mushilo e maka yene ayo Lesa abomfeshe pa kubumba ifintu fyonse. E fyo icikomo calenga bubili mwi buuku lya Ukutendeka cilanga. Pa Ukutendeka 1:2 patila: “No mupashi wa kwa Lesa waleti waya uku kabili wabwelela uku pa muulu wa menshi.” Ishiwi lya ciHebere ilyo bapilibula ukuti “umupashi” balalipilibula no kuti “amaka.” Kanshi umupashi wa mushilo maka ayo Lesa abomfya pa kufikilisha ukufwaya kwakwe na pa kusokolola ubufwayo bwakwe. Lekeni imulangeko ilembo na limbi ilya kulekelesha. Ili lembo ni Luka 11:13. Belengenipo mukwai.

Brad: “Imwe nga mwalishiba ukupeela abana benu ifya bupe ifisuma nangu ca kutila muli babifi, ninshi Shinwe wa mu muulu ena akacishapo ukupeela umupashi wa mushilo ku bamulomba!”

Scott: Apo Shifwe wa mu muulu alikwata amaka pa mupashi wa mushilo, alaupeela na ku bamulomba, bushe kuti twatila umupashi wa mushilo walilingana na Shifwe?

Brad: Awe. Nomba naumfwa icishinka.

Scott: Nshilefwaya ukumupoosela inshita ba Brad. Mwacitila mukwete fye inshita iinono. Nomba lekeni imwipushe icipusho icalasupula ifyo twalanshanya. Ukulingana na malembo twabelenga, bushe kuti mwatila umupashi wa mushilo cinshi?

Brad: Maka ayo Lesa abomfya pa kucita ifintu.

Scott: Mwalungika. Na kabili pali Yohane 14:26 Yesu atile umupashi wa mushilo ni kaafwa, nelyo kasambilisha. Iyi yena ni nsoselo fye.

Brad: Nshaishibe ifi fyonse.

Scott: Kuliko na fimbi ifisuma ifyo twingasambilila ku mashiwi Yesu asosele.

Brad: Finshi ifyo fine?

Scott: Kuti twalomba Lesa ukutupeela umupashi wa mushilo ilyo tuli na mafya. Kuti twalomba no kuti umupashi wa mushilo utwafwe ukusambilila icine pali ena.

Brad: Ayo mashiwi yaumfwika bwino. Mfwile ukutontonkanyapo sana pa fyo mwasosa.

Scott: Ilyo nshilaya, lekeni imushile icipusho na cimbi ico mufwile ukutontonkanyapo. Apo umupashi wa mushilo maka ayo Lesa abomfya, kuti twatila ninshi kuti aubomfya ku kucita ifili fyonse ifyo afwaya, bushe te ifyo?

Brad: Ee, cishinka ico.

Scott: Nomba mulandu nshi ashabomfesha aya maka ayafulisha ku kupwisha amacushi yonse ne fyabipa ificitika muno calo? Bushe mwalitala amutontonkanyapo pali ici? *

Brad: Ee, nalitontonkanyapo.

Scott: Bushe teti mutemwe nabwela na kabili pa bushiku bumo bwine ne nshita pa kuti tukalanshanye pali ili lyashi?

Brad: Ndefwaisha sana ukuti mukabwele. Nkalamulolela.

[Futunoti]