Ababelenga Ino Magazini Balepusha Ukuti . . .

Bushe Mfwile Ukuba mu Cilonganino ca Mapepo?

▪ Bushe ubumbimunda bwa bakapepa, ukukanaikatana kwabo ne micitile yabipa iya bashimapepo e fimulenga ukushimunuka ukusala icilonganino ca mapepo mufwile ukubamo? Nga e filenga, nalimo mutontonkanya ukulingana na ili ipinda lya ciFrench ilitila, “Uuya ku calici ilingi line e wataluka sana kuli Lesa.”

Napamo mwalicindika ifyaba muli Baibolo kabili limbi mumona no kuti amabuteko e lyo na bantu bafwile ukucindika insambu sha muntu isha kusala icilonganino ca mapepo alefwaya. Lelo limbi mulepusha amuti, ‘Bushe Lesa alanda ukuti bonse abalemupepa ukulingana ne fyo afwaya bafwile ukuba mu cilonganino ca mapepo?’

Icasuko cabula no kupita mu mbali ca kuti ee. Mulandu nshi tushiletwishikila? Kabili bushe ifilonganino fya mapepo fyonse fyaliba fye bwino?

Natulande pali Yesu. Bushe ali mu cilonganino icili conse ica mapepo? Ilyo ali umwaice, Yesu aleya pamo no lupwa lwakwe na baYuda banankwe abaali no mwata wa kuya kwi tempele ku Yerusalemu mu kupepa Lesa. (Luka 2:41-43) Ilyo akulile, alepepela pamo na baYuda banankwe mwi sunagoge ilyali uko aleikala. (Luka 4:14-16) Ilyo Yesu alelanda no mwanakashi uwali mu cilonganino cimbi ica mapepo, atile: “Ifwe tupepa ico twaishiba.” (Yohane 4:22) Yesu alanda ukwabula no kupita mu mbali ukuti ali mu cilonganino ca mapepo ica baYuda.

Pa numa, Yesu asosele ukuti pa mulandu wa kuti uluko lwa baYuda lwalimukene, Lesa na o ali no kukana imipepele yabo iyabipa. (Mateo 23:33–24:2) Lelo, alangilile no kuti abalefwaya ukupepa Lesa ukulingana ne fyo afwaya baali no kuba mu cilonganino. Aebele abasambi bakwe ukuti: “Nga muletemwana, e lyo bonse bakeshiba ukuti muli basambi bandi.” (Yohane 13:35) Umusambi wa kwa Kristu aalingile ukulalongana na bakapepa banankwe pa kuti abalange ukuti alibatemenwe. Na kuba, Yesu alandiilepo fye ukuti kwaba fye imisebo ibili iimininako ifilonganino fya mapepo. Umusebo umo aulondolwele ukuti “walipabuka kabili ukalamba” e lyo utwala “ku bonaushi.” Alandile na pa musebo umbi ukuti: “Impongolo iyacepa, no musebo uwaya ku bumi walicepa nga nshi kabili banono abausanga.”—Mateo 7:13, 14.

Kanshi cailanga fye ukuti, te filonganino fyonse ifya mapepo ifyawama. Baibolo ilatusoka ukukanaingila mu filonganino fya “bamoneka kwati ni bakapepa lelo abakaana amaka ya bukapepa.” Na kabili itila, “ku ba musango yu uletalukako.” (2 Timote 3:5) Lubali lumbi, tulamwenamo nga nshi ilyo twaishiba icilonganino ca mapepo icaba pa musebo wa ku mweo kabili twatendeka no kulalongana muli ico cine cilonganino. Ilyo tuli muli ici cilonganino balatukoselesha no kutwafwa kabili tulakwata ne subilo lya kuti ifintu fikawama.—AbaHebere 10:24, 25.

Kuti mwaishiba shani icilonganino ca mapepo icaba nga umusebo uwacepa? Nga mulefwaya ukwishiba ico cilonganino ukulingana ne fyo Baibolo ilanda mukwai belengeni icipandwa 15 ica mu citabo citila Bushe Cinshi Baibolo Isambilisha? * Ifyebo fyaba muli ici cipandwa fikamwafwa ukusala bwino icilonganino ca mapepo ico mulingile ukubamo.

[Futunoti]