Ifyo Tusambilila Kuli Yesu

Ifyo Bamalaika Batukuma

Yesu ali na wishi ku muulu “ilyo icalo cishilabako.” (Yohane 17:5) Kanshi, e wafikapo ukwasuka ifipusho ifikonkelepo.

Bushe bamalaika balibikako amano kuli ifwe?

▪ Tusambilila kuli Yesu ukuti bamalaika balibikako sana amano ku bantu. Atile: “Bamalaika ba kwa Lesa balasekelela ilyo umubembu umo alapila.”—Luka 15:10.

Yesu alandile ukuti bamalaika balipeelwa umulimo wa kwafwa ababomfi ba kwa Lesa ukukosha bucibusa bwabo na Lesa. E ico ilyo Yesu asokele abasambi bakwe ukuti tabafwile ukupunwisha bambi, atile: “Cenjeleni ukuti mwisuula umo pali aba abanono; pantu ndemweba nati bamalaika wabo mu muulu balamona lyonse icinso ca kwa Tata uwaba mu muulu.” (Mateo 18:10) Pa kulanda aya amashiwi, Yesu talelosha mu kuti umo umo uwa basambi bakwe alikwata malaika uumulinda. Lelo ico alelandapo ca kuti bamalaika ababombela Lesa balibikako sana amano ku bantu ababa mu cilonganino ca Bwina Kristu.

 Bushe Satana Kaseebanya kuti atulufya shani?

▪ Yesu aebele abasambi bakwe ukuti Satana alafwaya sana ukukaanya abantu ukusambilila icine pali Lesa. Atile: ‘Uwaumfwa icebo ca pa bufumu ukwabula ukwiluka, umubifi alasompola [icine] icatandilwe mu mutima wakwe.’—Mateo 13:19.

Yesu asokolwele inshila imo iyo Satana alufishamo abantu ilyo alandile pa cilangililo ca muntu uwatandile imbuto isha ngano mwi bala lyakwe. Umwine we bala emininako Yesu, kabili ingano shimininako Abena Kristu ba cine abakateka na Yesu ku muulu. Lelo Yesu atile, umulwani wakwe aliishile no “kutandamo ifyani mu ngano.” Ifyani fimininako Abena Kristu ba bufi. “No mulwani uwafitandile ni Satana Kaseebanya.” (Mateo 13:25, 39) Filya fine ifyani fimoneka nge ngano ilyo filemena, abaitunga ukuba Abena Kristu kuti bamoneka kwati ni bakapepa ba cine. Amacalici ayasambilisha ifisambilisho fya bufi, yalenga abantu ukukanaumfwila Lesa. Pa kulufya abantu ukubafumya kuli Yehova, Satana abomfya imipepele ya bufi.

Finshi twingacita pa kutila tuicingilile kuli Satana?

▪ Yesu atile Satana e “kateka wa ici calo.” (Yohane 14:30) Mwi pepo Yesu apepele kuli Lesa, alangile ifyo twingacingililwa kuli Satana. Pa kupepelako abasambi bakwe kuli Wishi uwa ku muulu Yesu atile: “Mulebacingilila ku mubifi. Te ba muli ici calo, ifyo na ine nshili wa muli ici calo. Balengeni ukuba aba mushilo ku cine; icebo cenu e cine.” (Yohane 17:15-17) Ukusambilila Icebo ca kwa Lesa kuti kwatucingilila ku kukaanakonkelela ifyo aba mu calo ca kwa Satana bacita.

Bushe bamalaika batwafwa shani pali lelo?

▪ Yesu atile: “Ku mpela ya cino calo: bamalaika bakapaatulula ababifi ukubafumya ku balungama.” (Mateo 13:49) Nomba tuleikala “ku mpela ya cino calo,” kabili abantu abengi balepokelela imbila nsuma iya Bufumu bwa kwa Lesa.—Mateo 24:3, 14.

Lelo te bonse abatendeka ukusambilila Baibolo abo Lesa apokelela. Bamalaika e batungulula umulimo wa babomfi ba kwa Yehova, kabili balalekanya abantu abatemwa Lesa icine cine ukufuma ku bashifwaya ukukonka ifyo basambilila. Yesu atile abo Lesa apokelela, “ni balya aba kuti baliba ne mitima iisuma nga nshi, ica kuti nga baumfwa icebo, baciikatisha no kutwala ifisabo ilyo baleshipikisha.”—Luka 8:15.

Nga mulefwaya ifyebo na fimbi moneni, icipandwa 10 ica ici citabo, ico Inte sha kwa Yehova shalemba.

[Icikope pe bula 16]

Bamalaika balafwilishako ukulonganika abantu abafumacumi mu cilonganino ca Bwina Kristu