“Anashishe Umutima wa kwa Yehova”
Palameni Kuli Lesa
“Anashishe Umutima wa kwa Yehova”
UMWAUME umo uwalekelepo ukukonka amafunde ya kwa Lesa ayo abafyashi bakwe bamusambilishe ukufuma ku bwaice, atile: “Naleimona uwa cabecabe.” Ilyo atendeke ukucita ifyalelanga ukuti nalapila, alemona kwati Lesa te kuti amwelele. Lelo uyu mubembu uwalapile asangile icisansamushi mu lyashi lya mu Baibolo ililanda pali Manase, ilyalembwa pali 2 Imilandu 33:1-17. Nga ca kutila mumona kwati Lesa te kuti amubelele uluse pa membu mwacitile kale, na imwe bene kuti mwasanga icisansamushi ku fyacitike kuli Manase.
Manase akushiwe na bafyashi abalepepa Lesa. Wishi, Hisekia, ali pa shamfumu ishisuma ishatekele Yuda. Manase afyelwe pa numa ya myaka nalimo itatu ukutula apo Lesa atantalisheko ubumi bwa kwa wishi mu cipesha mano. (2 Ishamfumu 20:1-11) Ukwabula no kutwishika, Hisekia alemona uyu mwana ukuti bupe ubo Lesa amupeele pa mulandu wa luse amulangile kabili alemusambilisha pa kuti atemwe ukupepa kwa cine. Lelo te lyonse abana ba bakapepa bakonka ifyo abafyashi babo babasambilisha. E fyo cali na kuli Manase.
Manase ali ne myaka nalimo 12 ilyo wishi afwile. Ku ca bulanda, Manase “acitile ifyabipa mu menso ya kwa Yehova.” (Ifikomo 1, 2) Bushe icalengele ukuti iyi mfumu yacaice ilecita ifyabipa ni mpanda mano shakwe ishasuulile ukupepa kwa cine? Baibolo tayatweba. Ico yatweba fye ca kuti Manase alepepa sana ifilubi kabili ali munkalwe. Akuulile ifiipailo ifya balesa ba bufi, atuulile abana bakwe amalambo, alepupa imipashi, kabili abikile icimpashanya icabaswa mwi tempele lya kwa Yehova mu Yerusalemu. Manase ali mumankonso, alikeene ukumfwila ifyo Yehova alemusoka libili libili, nangu cingati e walengele ukuti afyalwe pa kutantalisha ubumi bwa kwa wishi mu cipesha mano.—Ifikomo 3-10.
Pa kulekelesha, Yehova alekele Manase bamusende ku Babiloni mu makusu. Ilyo ali kulya muli bunkole, Manase alitendeke ukutontonkanya pa mibele yakwe. Bushe nomba alilwike ukuti ifilubi alepepa ifishakwete amaka kabili ifishalepeema fyalifililwe ukumucingilila? Bushe alibukishe ifyo wishi uwalepepa Lesa amusambilishe ilyo ali umwaice? Nampo nga e fyo cali nelyo iyo, Manase alyalwike. Baibolo itila: “Anashishe umutima wa kwa Yehova Lesa wakwe kabili ali-icefeshe icine cine . . . Kabili alepepa kuli Lesa.” (Ifikomo 12, 13) Bushe umuntu uwacitile imembu shabipisha ifi kuti Lesa amubelela uluse?
Yehova alitemenwe sana ilyo Manase alapile ukufuma pa nshi ya mutima. Lesa alyumfwile ilyo apapeete ukuti amubelele uluse “kabili amubweseshe ku Yerusalemu pa bufumu bwakwe.” (Icikomo 13) Pa kulanga ukuti alilapile, Manase alibombele ukufika apapelele amaka yakwe, aonawile ifilubi fyonse kabili aebele abantu “ukulabombela Yehova.”—Ifikomo 15-17.
Nga ca kutila mumona kwati Lesa te kuti amwelele pa membu mwacitile, ica kumwenako ca kwa Manase kuti camukosha nga nshi. Ili lyashi lyaba pa malyashi yafuma kuli Lesa ayaba mu Cebo cakwe. (Abena Roma 15:4) Ukwabula no kutwishika, Yehova alafwaya twishibe ukuti ‘ali-iteyanya ukwelela.’ (Amalumbo 86:5) Ico Lesa abikako sana amano te lubembu umuntu acitile, lelo fintu uulufyenye aleumfwa mu mutima. Umubembu nga apepa kuli Lesa ukufuma pa nshi ya mutima, aleka imibele yakwe iyabipa, kabili apampamina pa kucita icalungama, kuti ‘anasha umutima wa kwa Yehova’ nga filya Manase acitile.—Esaya 1:18; 55:6, 7.
Amalembo ya Kubelenga mu January: