Isukulu lya Gileadi Ilyalenga 129

“Buno Bushiku Bwenu Ubwa Kusangalala”

PA 11 September, 2010, abantu mupepi na 8,000 balilongene ku kumona uko abali mwi Sukulu lya Gileadi ilyalenga 129 balepwisha amasambililo. Ba Samuel Herd aba mwi Bumba Litungulula ilya Nte sha kwa Yehova baebele abalepwisha isukulu kuti: “Buno bushiku bwenu ubwa kusangalala. E co na ifwe twishiile pa kuti tusangalale pamo na imwe!”

“Ukutwi Ukuumfwa”

Pa kutendeka programu, Munyinefwe Herd alandile ifyebo ifyalekoselesha Abena Kristu bonse ukuba no “kutwi ukuumfwa,” e kutila ukulakutika ku Cebo ca kwa Lesa. (Amapinda 20:12) Munyinefwe Herd aebele abalepwisha isukulu ukuti: “Mu myeshi iinono iyapita mwalekutika kuli Yehova kabili mukatwalilila ukulakutika kuli ena ku ciyayaya.”

Bushe aba bamishonari abapya kuti babomfya shani bwino amatwi yabo? Munyinefwe Herd atile: “Kuti mwabomfya bwino amatwi yenu nga mulekutika ku Cebo ca kwa Lesa.” Ba Herd basosele no kuti: “Kwalaba amalyashi ayengi pali kuno kulongana ayalamukoselesha pa kuti mukalebomba bwino umulimo wa bumishonari.”

“Tetekela Yehova no Mutima Obe Onse”

Ba Gerrit Lösch, aba mwi Bumba Litungulula, balandile ilyashi pali uyu mutwe uo abalepwisha isukulu balingile ukutontonkanyapo sana. Balandile pa fintu fyalekanalekana ifyacitikila abantu ba kwa Lesa, aba ku kale na ba muno nshiku, ifilanga ukuti balitetekele Yehova.

Munyinefwe Lösch atile, ifi fine e fyo na “bamishonari balingile ukutetekela Yehova ilyo balebomba umulimo wabo.” Batile: “Ku ca kumwenako, nalimo kuti mwalatontonkanya ukuti: ‘Bushe nkakwanisha ukusambilila ululimi ulupya? Bushe nkakumamo ukulakonka intambi shimbi? Bushe nshakalefuluka ku ng’anda?’” Cinshi cikabafwa? Munyinefwe Lösch akonkomeshe abalepwisha isukulu ‘ukutetekela Yehova.’

Abelengele na pa Amapinda 14:26 apatila: “Uutiina Yehova alamucetekela nga nshi.” Tukatetekela sana Yehova nga tuletontonkanya pa fyo atupaala nga nshi.

Baibolo itila umuntu uutetekela Yehova “akaba ngo muti uwalimbwa pa menshi, uwalimba imishila ya uko mu mulonga; kabili takomfwe ukukaba ilyo kwaisa, lelo amabula yakwe yakaba ayalemba.”—Yeremia 17:7, 8.

Lisambililo nshi bengasambililako? Munyinefwe Lösch atile, “mufwile ukutetekela Yehova te mulandu na mafya mukalakwata.”

“Mulepashanya Bamalaika Aba Cishinka”

Uyu e mutwe we lyashi lyalandile ba Stephen Lett aba mwi Bumba Litungulula. Bamalaika balikwata imibele iyo tulingile ukupashanya. Munyinefwe Lett atile: “Fyonse ifyo Baibolo yalanda pali bamalaika, fintu ifyo tufwile ukupashanya.” Lyena alandile pa mibele ine iya bamalaika ba cishinka iyo tulingile ukupashanya, e kutila ukushipikisha, ukuicefya, ukuitemenwa ukwafwa bambi, na bukaele.

Baibolo yatila malaika umo alwishenye na ‘cilolo wa ku Persia,’ icibanda icakwata sana amaka, pa nshiku 21. (Daniele 10:13) Ulya malaika alishipikishe. Lyena Munyinefwe Lett atile Abena Kristu nabo ‘balashomboka . . . ne mipashi  ibifi.’ (Abena Efese 6:12) Aebele abalepwisha isukulu ukuti: “Mukaleshipikisha pa kuti mukatwalilile ukubomba umulimo wenu.”

Ilyo Manoa, wishi wa kwa Samsone, aipwishe malaika ishina, malaika alikeene ukumweba. Ulya malaika ali-icefeshe. (Abapingushi 13:17, 18) Munyinefwe Lett aebele abalepwisha isukulu ukuti: “Umuntu nga alemulumbilisha nelyo ukumutasha pa fyo mulebomba, mukaleicefya no kulenga uyo muntu ukutasha Yehova ne cilonganino cakwe.”—1 Abena Korinti 4:7.

Ilyo Yesu ali mwi bala lya Getsemane, ninshi kushele fye inshita iinono ukuti afwe, “malaika wa mu muulu amoneke kuli ena no kumukosha.” (Luka 22:43) Ulya malaika ali-itemenwe ukwafwa Yesu. Munyinefwe Lett atile: “Mukalepepa kuli Yehova pa kuti akalemwafwa ukwishiba ifyo abantu bakalakabila, lyena mukalebafwa.”

Apo ni bamalaika fye abanono e bakonkele Satana ilyo apondweke, kuti twatila imintapendwa ya bamalaika balitwalilila aba cishinka kuli Lesa nelyo aba kaele.—Ukusokolola 12:4.

Munyinefwe Lett akonkomeshe abapwile isukulu ukuti, “Kaaneni Satana nge fyo bamalaika ba cishinka kuli Lesa bacita. Mukaaneni na o akafulumuka.”—Yakobo 4:7.

Amalyashi Yambi Yatatu Ayaliko

“Lekeni Yehova Atwalilile Ukuba Icilibwe ca Mutima Wenu.” Ilyo ba Gary Breaux, ababa muli Komiti ya Musambo uwa ku United States, balelanda ilyashi ilyakwete uyu mutwe uwafumine pa Amalumbo 73:26, ba-afwile abasambi ukwishiba ukuti bafwile ukushintilila sana pali Yehova. Bushe Yehova aba shani nge cilibwe? Munyinefwe Breaux atile: “Nga mwabuula icilibwe mwabika pe pepala, nangu kankungwe ese, ipepala te kuti lyululuke. Ifi fine e fyo na Yehova engacingilila umutima wenu ilyo kwaba ifya kwesha.” Kwena, umutima kuti watulufya lintu tuleshipikisha ifya kwesha. (Yeremia 17:9) Imiceele iyo mushabelesha, ifya kulya, nelyo ifibusa ifipya ifyo mukalaikala na fyo mu ng’anda, nalimo kuti fyalenga mwalatontonkanya pa kuleka umulimo wenu. Munyinefwe Breaux atile: “Fimo ifikalacitika fikalakabila ukuti mutontonkanyepo sana no kupingulapo ifya kucita. Bushe mukalasalapo ukucita ifikalenga Yehova ukusekelela? Nga mukalacita ifi, ninshi Yehova akaba icilibwe ca mutima wenu, kabili akalamutungulula.”

“Bushe Icitetekelo Cenu Calikosa ica Kutila Kuti Mwanyanta na mu Menshi?” Ba Sam Roberson, abasambilisha aba mwi Sukulu lya Gileadi, e balandile ilyashi lyakwete uyu mutwe ilyafumine muli Yoshua icipandwa 3. Bushe abena Israele abafulile sana bali no kwabuka shani umumana wa Yordani pa nshita waiswile nga nshi? Yehova aebele Yoshua ukweba bashimapepo ‘ukwiminina mu Yordani.’ Lesa abalaile ukuti: “Ilyo amakasa ya bashimapepo . . . yanyanta mu menshi ya Yordani . . . yakaleka ukupita, kabili yakeminina nga menshi ya mu cishiba.” (Yoshua 3:8, 13) Munyinefwe Roberson aebele abapwile isukulu ukuti: “Nga filya umumana wa Yordani wali no kucilikila abena Israele ku kupokelela amapaalo, e fyo na mafya yengamunenuna ica kuti mwapanya na mapaalo yaba mu mulimo wa bumishonari.” Ku ca kumwenako, nalimo mukalakwata amafya na bamishonari banenu. Bushe mukalacita shani? “Mwikalabika amano ku filecita abanenu, lelo mukalebika amano ku mulimo.” Munyinefwe Roberson akonkomeshe abapwile isukulu ukuti: “Nga mwaba ne citetekelo cakosa ica kutila kuti mwanyanta na mu menshi, Yehova akamwafwa ukulacimfya amafya ayakalaba ngo mumana wa Yordani mu mulimo wenu uwa bumishonari.”

“Pampamikeni Amapange Yenu.” Uyu e mutwe wa lyashi lyalandile ba William Samuelson, abasambilisha aba mwi Sukulu lya Gileadi. Ilyashi lyabo lyafumine pa Amapinda 16:3 apatila: “Tuulila Yehova imilimo yobe e lyo yakapampamikwa amapange yobe.” Munyinefwe Samuelson aipwishe abapwile isukulu ukuti: “Bushe ili  lembo lilepilibula ukuti nga ‘mwatuulila Yehova imilimo yenu’ ninshi tamwakalecitapo nangu cimo pa kuti amapange yenu yapampamikwe?” Ayaswike ukuti iyo, pantu Amapinda 16:1 yatila: “Umuntu umwine e upekanya ifyaba mu mutima wakwe.” Munyinefwe Samuelson atile: “Yehova takacite icipesha amano ica kupekanya ifyaba mu mutima wenu. Lelo mufwile ukushininkisha ukuti ifyo mulecita nafilungama. Nga muleisambilisha Baibolo, mulepepa, no kulanshanya na ba ku musambo wa mu calo mukalabombelamo, mukatwalilila ukuba no mutima uukalamwafwa ukucita icalungama, kabili Yehova akapampamika amapange yenu.”

Ukushimika Ifyacitike mu Mulimo no Kwipusha Abapita Kale mu Sukulu

Nga tabalesambilila nelyo ukubelenga, abana be sukulu balaya mu kushimikila pamo ne filonganino fya Nte sha kwa Yehova ifyaba mupepi. Ba Mark Noumair, abasambilisha aba mwi Sukulu lya Gileadi, baipwishe abalepwisha isukulu ukushimika ifyacitike mu mulimo wa kushimikila. Ico balandilepo sana ca kuti ukupepa ilyo bashilaya mu kushimikila kwalebafwa ukusanga abalefwaya ukumfwa imbila nsuma.

Ku ca kumwenako, abaupana abali mu sukulu bali mwi tuuka umo baliila ifya kulya. Uwalebomba mwi tuuka alibamwene balepepa mu mutalalila. Aile apo baikele no kubepusha nga bali ni ba Nte. Ilyo bamwebele ukuti bali ni ba Nte, atile akulile mu ng’anda ya ba Nte lelo alilekele ukupepa. Alicitilepo no mulandu ica kuti balimupoosele na mu cifungo. Nomba uyu mulumendo alefwaya ukuti alebombela Yehova na kabili. Asosele no kuti ilyo balya baupana bashilaingila mwi tuuka, alepepa kuli Lesa ukuti amwafwe ukutendeka ukucita icalungama na kabili. Ipepo lyakwe lyalyaswikwe!

Ba Rudi Hartl, ababombela muli dipartimenti ya Writing Correspondence, balandile ilyashi lyakwete umutwe waleti “Sondeni no Kumona Ukuti Yehova Musuma,” kabili baipwishe ba Wayne Wridgway abafumine ku Mozambique, ba Jason Reed abafumine ku Chile, na ba Kenji Chichii abafumine ku Nepal. Bonse batatu abo baipwishe ni ba mishonari. Aba bamunyinefwe balilandile pa mafya yamo ayo bapitilemo ilyo batendeke fye bumishonari, pamo nga ukusambilila ululimi ulupya, ukutampa ukukonka intambi ishipya, no kufuluka ku mwabo. Munyinefwe Chichii atile: “Cimo ica-afwile ine no mwina mwandi, kupanga ifibusa mu cilonganino lilya line fye twaile. Ukupalama kuli bamunyinefwe kwalitwafwile ukukanalafuluka ku mwesu.”

Ilyo bonse 56 bapokele fye amadipuloma, umo pa bali mu kalasi abelengele kalata ya kutasha iyo abapwishishe isukulu balembele. Ifyebo fimo ifyali muli kalata umo baletasha aba mwi Bumba Litungulula fya kuti: “Fwe bali mu sukulu, natuimwena ifyo mwaipeelesha, ukutupekanishisha amasambililo, ukutusambilisha ifyebo fya kwa Lesa, no kututandalila mu kalasi. Apo twali-imwena ifyo mwatutemwa, na ifwe tukalaesha na maka ukulapashanya imibele yenu iya kutemwa, ukutekanya, ukuicefya, no kubika amano kuli bambi ilyo tukatendeka ukubomba umulimo wesu.”

[Amashiwi pe bula 28]

“Umuntu nga alemulumbilisha . . . , mukaleicefya no kulenga uyo muntu ukutasha Yehova ne cilonganino cakwe”

[Amashiwi pe bula 29]

‘Mukalakwata amafya ayakalaba ngo mumana wa Yordani’

 [Chari na Mapu pe bula 31]

IFIPENDO FYA BALI MU KALASI

Bafumine mu fyalo: 9

Abasambi bonse pamo bali: 56

Bonse balyupa no kuupwa: 28

Imyaka ya kufyalwa: 33.0

Imyaka baba mu cine: 17.9

Imyaka babomba mu

mulimo wa nshita yonse: 13.3

[Mapu]

(Nga mulefwaya ukumona mapu, moneni muli magazini)

Babatumine mu fyalo 25 ifili pe samba

IFYALO BABATUMINEKO

BOLIVIA

BOTSWANA

BULGARIA

CONGO (KINSHASA)

CÔTE D’IVOIRE

GAMBIA

GERMANY

INDIA

INDONESIA

KENYA

LIBERIA

MACEDONIA

MADAGASCAR

MALAYSIA

MOZAMBIQUE

PANAMA

PERU

POLAND

ROMANIA

SERBIA

SIERRA LEONE

SWAZILAND

TANZANIA

UGANDA

ZIMBABWE

[Icikope pe bula 30]

Abali mwi sukulu balelangilila ifyo cali ilyo baleshimikila

[Icikope pe bula 31]

Abapwishishe Isukulu lya Gileadi Ilyalenga 129

Ukupenda kutampile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.

(1) Munaretto, R.; Olofsson, Y.; Budden, K.; Najdzion, L.; Moya, G.; Treviño, G.; Dion, A.; Fleegle, A.

(2) Smith, J.; Michael Raj, J.; Smith, S.; Paramo, A.; McDonald, J.; Deans, M.; Joyal, S.; Watson, L.

(3) Joyal, C.; Crawley, T.; Hacker, D.; Shynkarenko, J.; Knapp, T.; Ayling, J.; Highley, C.; Olofsson, B.

(4) Fitzpatrick, M.; Najdzion, B.; Skallerud, L.; Harris, A.; Harris, S.; Budden, R.; Paramo, Y.; Skallerud, K.

(5) Crawley, B.; Michael Raj, J.; Lodge, A.; Lodge, R.; Herms, N.; Fitzpatrick, J.; Moya, R.; Munaretto, P.

(6) Watson, S.; Deans, M.; Hacker, J.; McDonald, J.; Treviño, J.; Harris, S.; Herms, C.; Harris, P.

(7) Shynkarenko, V.; Highley, T.; Smith, A.; Dion, J.; Ayling, R.; Smith, B.; Knapp, T.; Fleegle, B.