Sambilileni Icebo ca kwa Lesa

Bushe Lesa Mwalimwishiba?

Ici cipande cilelanda pa mepusho ayo nalimo mutontonkanyapo kabili cilemulanga na po mwingasanga amasuko muli Baibolo yenu. Inte sha kwa Yehova kuti shatemwa nga nshi ukulanshanya na imwe aya masuko.

1. Bushe Lesa mwalimwishiba?

Lesa wa cine ni Kabumba wa fintu fyonse. Baibolo imwita ati “Imfumu ya muyayaya,” ukupilibula ukuti takwata intendekelo kabili takwata impela. (Ukusokolola 15:3) Apo Lesa e ntulo ya mweo, kanshi e o tufwile fye ukulapepa.—Belengeni Ukusokolola 4:11.

2. Bushe Lesa aba shani?

Takwaba nangu umo uwamonapo Lesa pantu Mupashi, e kutila akwata umubili uwacila pa mibili ya fya mweo ifyaba pano calo. (Yohane 1:18; 4:24) Ifyo Lesa abumba filasokolola imibele yakwe. Ku ca kumwenako, nga twatontonkanya pa misango yalekanalekana iya fisabo na maluba ifyo Lesa apanga, tuleluka ukuti alikwata ukutemwa kabili wa mano. Ifyo imyulu ne calo fyakula filanga ukuti Lesa wa maka.—Belengeni Abena Roma 1:20.

Kuti twasambilila imibele na imbi iya kwa Lesa muli Baibolo. Ku ca kumwenako, ilatweba ifyo Lesa atemwa ne fyo apata, ifyo asunga abantu, ne fyo omfwa ilyo fimo fyacitika.—Belengeni Amalumbo 103:7-10.

3. Bushe Lesa alikwata ishina?

Yesu atile: “Shifwe wa mu muulu, ishina lyenu libe ilya mushilo.” (Mateo 6:9) Nangu ca kutila Lesa alikwata amalumbo ayengi, akwata fye ishina limo. Ululimi lumo na lumo lwalikwata ifyo lushimbula ili shina. Mu Cibemba, tutila “Yehova” e lyo limo limo “Yahweh.”—Belengeni Amalumbo 83:18.

Mu maBaibolo ayengi, ishina lya kwa Lesa balilifumyamo no kubikamo amalumbo ya kuti Shikulu nelyo Lesa. Lelo ilyo Baibolo yalembelwe, ishina lya kwa Lesa e mo lyali imiku nalimo 7,000. Yesu alengele ishina lya kwa Lesa ukwishibikwa pantu alelibomfya ilyo alesambilisha abantu Icebo ca kwa Lesa. Alyafwile abantu ukwishiba Lesa.—Belengeni Yohane 17:26.

  4. Bushe Yehova alatusakamana?

Yehova alitubikako amano pantu alakutika ku mapepo yesu. (Amalumbo 65:2) Bushe ifi amacushi yafula ninshi Lesa tatusakamana? Abantu bamo batila Lesa e ulenga ukuti tulecula pa kuti atweshe, lelo ubu bufi. Baibolo itila: “Lesa wa cine te kuti acite ifyabipa.”—Yobo 34:10; belengeni Yakobo 1:13.

Lesa alitupanga na maka ya kuisalila ifyo tulefwaya ukucita, icilanga ukuti alitucindika. Bushe tatutasha ifi Lesa atupeela ubuntungwa bwa kusalapo ukumubombela? (Yoshua 24:15) Amacushi yalefulilako pa mulandu wa kuti abengi basalapo ukulacita ifyabipa ku bantu banabo. Yehova alomfwa ubulanda ukumona ulufyengo lwa musango yu.—Belengeni Ukutendeka 6:5, 6.

Nomba line, Yehova ali no kubomfya Yesu ukufumyapo amacushi na bonse abacita ifyabipa. Lelo, kwaliba umulandu Yehova asuminishisha ukuti kube amacushi pali ino inshita. Icipande cimbi cikalondolola umulandu Lesa asuminishisha ukuti kube amacushi.—Belengeni Esaya 11:4.

5. Finshi Lesa afwaya ukuti tulecita?

Yehova atupangile mu nshila ya kutila kuti twamwishiba no kumutemwa. Afwaya ukuti twishibe icine pali ena. (1 Timote 2:4) Nga twasambilila Baibolo, kuti twaishiba Lesa kabili kuti aba Cibusa wesu.—Belengeni Amapinda 2:4, 5.

Apo Yehova e watupeela umweo, tufwile ukumutemwa ukucila ifyo twatemwa umuntu uuli onse. Kuti twalanga ukuti twalitemwa Lesa nga tulelanda nankwe mwi pepo no kulacita ifyo atweba. (Amapinda 15:8) Yehova atweba ukuti tuletemwa bambi.—Belengeni Marko 12:29, 30; 1 Yohane 5:3.

Nga mulefwaya ukwishibilapo na fimbi, belengeni icipandwa 1 ica mu citabo citila Bushe Cinshi Baibolo Isambilisha? icalembwa ne Nte sha kwa Yehova.

[Icikope pe bula 17]

Bushe kwaliba umulandu Lesa asuminishisha ukuti kube amacushi pali ino nshita?