Mulandu Nshi Ifyupo Ifingi Filepwila?

“AbaFarise baishile kuli [Yesu], balefwaya ukumwesha, kabili batile: ‘Bushe calisuminishiwa umuntu ukuleka umukashi wakwe pa mulandu fye onse?’”—Mateo 19:3.

ABANTU bamo abaliko mu nshiku sha kwa Yesu balefwaya ukwishiba nga ca kuti icupo kuti cabelelela nelyo cifwile ukubelelela. Yesu abaswike ati: “Bushe tamwabelenga ukuti uwababumbile pa kutendeka ababumbile umwaume no mwanakashi, kabili atile, ‘E mulandu wine umwaume akashiila wishi na nyina no kulambatila ku mukashi wakwe, kabili aba babili bakaba umubili umo’? E ico tabali babili na kabili iyo, lelo bali umubili umo. Kanshi, ico Lesa alundenye, umuntu ecilekanya.” * (Mateo 19:4-6) Ukwabula no kutwishika, Lesa alefwaya ukuti icupo cilebelelela.

Mu fyalo ifingi muno nshiku, ifyupo mupepi na hafu nelyo ukucilapo filapwa. Bushe ukufunda kwa mu Baibolo ukulanda pa cupo kwalileka ukubomba? Bushe nalimo icilenga ifyupo ukupwa mulandu wa kuti icupo cine e calubana?

Natulangilile: Tutile abaupana bashita motoka iya musango umo wine ne ishitileko abanabo. Bamo balasunga bwino motoka yabo kabili balayensha bwino. E lyo bambi bena tabaibikako amano, kabili pa kwensha bensha fye cimbi cimbi ica kuti yaonaika, baleka no kuibomfya. Bushe kuti twatila ni motoka e ishakosa e co yaonaikila bwangu nangu bene ba motoka e bali no bwafya? Icasuko cintu cayeba.

E fyo caba na ku cupo, pa mulandu fye wa kuti ifyupo ifingi filepwa tacipilibula ukuti icupo e calubana. Ifi kwaba ifyupo ifingi ifishapwa cilanga ukuti icupo caliba fye bwino. Ifyupo ifitunguluka filalenga abaupana, indupwa, na ba mu bwikashi ukuba ne nsansa. Nomba nga filya ciba kuli motoka, pa kuti icupo citwalilile kano lyonse mulecibikako amano no kucisunga bwino.

Nampo nga ni nomba line fye mwaupene nelyo napapita imyaka iingi, ukupanda amano ukwa mu Baibolo pa fyo mwingasunga icupo kuti kwamwafwa. Moneni ifya kumwenako pa mabula yakonkapo.

[Futunoti]